ଇରାଶିଷଙ୍କୁ କାଉଣ୍ଟର ଟାର୍ଗେଟ କଲା ବିଜେଡି । ଚିନ୍ମୟ ସାହୁ କହିଲେ, ବିଜେପି ଯୁବ ମୋର୍ଚ୍ଚା ସଭାପତି ଜଣେ ଅଭ୍ୟାସଗତ ଅପରାଧୀ ।
କନକ ବ୍ୟୁରୋ: ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିବା ପରେ ରାଜ୍ୟ ବିଜେପିର ଯୁବ ମୋର୍ଚ୍ଚା ସଭାପତିଙ୍କୁ କାଉଣ୍ଟର ଟାର୍ଗେଟ କରିଛି ଶାସକ ବିଜେଡି । ବିଜେଡି ମୁଖପାତ୍ର ଚିନ୍ମୟ ସାହୁ ଗଣମାଧ୍ୟମକୁ ପ୍ରତିକ୍ରିୟା ଦେବା ସହିତ ଇରାଶିଷଙ୍କ ଉପରେ ବର୍ଷିଛନ୍ତି । ତାଙ୍କ କହିବା କଥା, ବିରୋଧୀ ଦଳ ନେତା ଜୟ ନାରାୟଣ ମିଶ୍ରଙ୍କ ଭଳି ବିଜେପି ଯୁବ ମୋର୍ଚ୍ଚାର ସଭାପତି ମଧ୍ୟ ଜଣେ ଅଭ୍ୟାସଗତ ଅପରାଧୀ । ଉଭୟ ଜୟ ନାରାୟଣ ଓ ଇରାଶିଷ ଅପରାଧୀ ବୋଲି ବିଜେଡି ମୁଖପାତ୍ର କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଜଣେ ଯୁବକଙ୍କୁ ହତ୍ୟା କରିବା ଅଭିଯୋଗରେ ରାଜ୍ୟ ବିଜେପି ଯୁବ ମୋର୍ଚ୍ଚାର ସଭାପତି ଜେଲ୍ ଯାଇ ଆସିଛନ୍ତି । ଆଉ କ୍ରମାଗତ ଭାବରେ ସେ ଆଇନକୁ ହାତକୁ ନେଇଛନ୍ତି । ଅତୀତରେ ଜୟ ନାରାୟଣଙ୍କଠାରୁ ଚପଲ ମାଡ ଖାଇ ଲହୁ ଲୁହାଣ ହୋଇଥିଲେ ରାଜ୍ୟ ବିଜେପି ସଭାପତି ସମୀର ମହାନ୍ତି । ଏଭଳି ଅଭ୍ୟାସଗତ ଅପରାଧୀଙ୍କୁ ଧରି ସେ କେମିତି କାମ କରୁଛନ୍ତି ବୋଲି ଚିନ୍ମୟ ସାହୁ ପ୍ରଶ୍ନ କରିଛନ୍ତି ।
ସୂଚନାଯୋଗ୍ୟ ଯେ, ଆଜି ପ୍ରେସମିଟ୍ କରି ବିଜେଡି ଉପରେ ବର୍ଷିଥିଲେ ଯୁବ ମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ । ନବଦାସଙ୍କ ହତ୍ୟାକାଣ୍ଡରେ ସିବିଆଇ ତଦନ୍ତ ସହ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରିଥିଲା ବିଜେପି ଯୁବମୋର୍ଚ୍ଚା । କ୍ୟାବିନେଟ ମନ୍ତ୍ରୀଙ୍କୁ ଦିନ ଦ୍ୱିପ୍ରହରରେ ହତ୍ୟା କରାଗଲା ହେଲେ ଏପର୍ଯ୍ୟନ୍ତ ମୁଖ୍ୟମନ୍ତ୍ରୀ ନୀରବ ଅଛନ୍ତି । ଏହି ପ୍ରସଙ୍ଗକୁ ନେଇ ଯୁବମୋର୍ଚ୍ଚା ତୃଣମୂଳ ସ୍ତରରୁ ଆନ୍ଦୋଳନ କରିବ । ଆଜିଠାରୁ ଆଗାମୀ ୩ ଦିନ ପର୍ଯ୍ୟନ୍ତ ପ୍ରତ୍ୟେକ ବିଧାନସଭା କ୍ଷେତ୍ରରେ ଆନ୍ଦୋଳନ ହେବ ବୋଲି ଇରାଶିଷ କହିଥିଲେ ।