ପଞ୍ଚାୟତ ନିର୍ବାଚନ ପୂର୍ବରୁ ବିଜେଡି ଖେଳିଲା ଓବିସି କାର୍ଡ । ନିର୍ବାଚନରେ ୨୭ ପ୍ରତିଶତ ଓବିସି ପ୍ରାର୍ଥୀ ଦେବାକୁ ନିଷ୍ପତ୍ତି ନେଲା ବିଜେଡି ।
- ପଞ୍ଚାୟତ ନିର୍ବାଚନ ପୂର୍ବରୁ ବିଜେଡି ଖେଳିଲା ଜାତି କାର୍ଡ
- ପଞ୍ଚାୟତ ନିର୍ବାଚନରେ ୨୭% ଓବିସିଙ୍କୁ ପ୍ରାର୍ଥୀ କରିବ ବିଜେଡି
Kanak News is now on WhatsApp
Join and get latest news updates delivered to you via WhatsApp
ପଞ୍ଚାୟତ ନିର୍ବାଚନ ପାଇଁ ରାଜନୈତିକ ଦଳ ମାନେ ଏବେଠୁ ରଣନୀତି ତିଆରି କରିବା ଆରମ୍ଭ କରିଦେଇଛନ୍ତି । ପୂର୍ବରୁ ସରକାର ସଙ୍କେତ ଦେଇସାରିଛନ୍ତି ଯେ, ନିର୍ଦ୍ଧାରିତ ସମୟରେ ନିର୍ବାଚନ ହେବାକୁ ଯାଉଛି । ଆଉ ଏପରି ସମୟରେ ଓଡ଼ିଶାରେ ୨୦୦ଟି ଜାତି ଓ ଉପଜାତି ଓବିସି ତାଲିକା ଅର୍ନ୍ତଭୁକ୍ତ ଅଛି । ଏହି ବର୍ଗର ଜନସଂଖ୍ୟା ମୋଟ୍ ଜନସଂଖ୍ୟାର ହେଉଛନ୍ତି ସିଂହ ଭାଗ । ତେଣୁ ଏକ ସାମ୍ବାଦିକ ସମ୍ମିଳନୀ କରି ଶାସକ ଦଳ କହିଛି, ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ସୋସିଆଲି ଇକୋନମିକାଲି ବେକୱାର୍ଡ କାଷ୍ଟ-ଏସଇବିସି ଅର୍ଥାତ ଓବିସିଙ୍କ ପାଇଁ ୨୭% ଦଳୀୟ ପ୍ରାର୍ଥୀ ଘୋଷଣା କରିବା ପାଇଁ ଦଳ ନିଷ୍ପତ୍ତି ନେଇଛି ।
କିଛି ଦିନ ପୂର୍ବରୁ ବିଜେଡି ସାଂସଦଙ୍କ ଏକ ପ୍ରତିନିଧି ଦଳ ଦିଲ୍ଲୀରେ ଗୃହମନ୍ତ୍ରୀ ଅମିତ୍ ଶାହାଙ୍କୁ ଭେଟି, ଜାତିଗତ ସଂଖ୍ୟା ଅନୁସାରେ ଲୋକଙ୍କୁ ସଂରକ୍ଷଣ ମିଳିବା ଦରକାର ବୋଲି ଯୁକ୍ତି ବାଢ଼ିଥିଲେ । ତେଣୁ ସୁପ୍ରିମକୋର୍ଟଙ୍କ ୫୦ ପ୍ରତିଶତ ସଂରକ୍ଷଣ କଟକଣା ହଟାଇବା ପାଇଁ କେନ୍ଦ୍ର ସରକାର ସୁପ୍ରିମକୋର୍ଟରେ ଆବେଦନ କରନ୍ତୁ ବୋଲି ଦାବି କରିଥିଲେ । କାରଣ ଏହି କଟକଣା ପାଇଁ ଚାକିରି ଓ ଶିକ୍ଷା କ୍ଷେତ୍ରରେ ଓବିସିମାନେ ୨୭% ସଂରକ୍ଷଣ ପାଉନାହାନ୍ତି ।
ବିଜେଡି କହିଛି ପଞ୍ଚାୟତ ନିର୍ବାଚନ ଓ ପରବର୍ତ୍ତୀ ନିର୍ବାଚନ ଗୁଡିକରେ ୨୭% ଓବିସି ପ୍ରାର୍ଥୀଙ୍କୁ ଟିକଟ ମିଳିବ । ଦଳ ଏହା ପୂର୍ବରୁ ଲୋକସଭା ନିର୍ବାଚନରେ ମହିଳା ମାନଙ୍କୁ ମଧ୍ୟ ୩୩% ସଂରକ୍ଷଣ ଦେଇଥିଲା । ଏହା ବାଦ୍ ଅନୁସୂଚିତ ଜାତି ଓ ଜନଜାତିଙ୍କ ପାଇଁ ସଂରକ୍ଷଣ ରହିଛି । ଏହାପରେ ଆଉ କେତେ ପ୍ରତିଶତ ସିଟ୍ ବଞ୍ଚିବ ଓ କିଏ ଟିକଟ ପାଇବ ତାହା ବଡ ପ୍ରଶ୍ନ ପାଲଟିଛି ।