ଶ୍ୱେତପତ୍ରରୁ ମିଳିଲା ସାଂଘାତିକ ତଥ୍ୟ । ଓଡ଼ିଶାରେ ହେଉଛି ଦୈନିକ ହାରାହାରି ୯ ଦୁଷ୍କର୍ମ ଓ ୩୦ ଦୁର୍ଘଟଣା ।
କନକ ବ୍ୟୁରୋ : ଓଡ଼ିଶାରେ ଦିନକୁ ଦିନ ବୃଦ୍ଧି ପାଉଛି ମହିଳା ନିର୍ଯାତନା ଘଟଣା । ମହିଳାଙ୍କ ସୁରକ୍ଷାକୁ ନେଇ ଅନେକବାର ସରକାରଙ୍କୁ ଘେରିଛନ୍ତି ବିରୋଧୀ । ଆଉ ଏସବୁ ଭିତରେ ଗୃହ ବିଭାଗ ପକ୍ଷରୁ ପ୍ରକାଶିତ ଶ୍ୱେତପତ୍ରରୁ ମିଳିଛି ସାଂଘାତିକ ତଥ୍ୟ । ରାଜ୍ୟରେ ଦୈନିକ ହାରାହାରି ୯ ଜଣ ମହିଳା ଦୁଷ୍କର୍ମର ଶିକାର ହେଉଥିବା ଶ୍ୱେତପତ୍ରରୁ ସାମ୍ନାକୁ ଆସିଛି । କାରଣ ଗୃହ ବିଭାଗର ଶ୍ୱେତପତ୍ରରେ ୨୦୨୧ରେ ମୋଟ ୩୩୨୭ଟି ଦୁଷ୍କର୍ମ ମାମଲା ପଞ୍ଜିକରଣ ହୋଇଥିଲା । ପଞ୍ଜିକରଣ ହୋଇଥିବା ୩୩୨୭ଟି ଦୁଷ୍କର୍ମ ମାମଲାରୁ ୩୨୪୪ଟି ମାମଲା ସତ୍ୟ ଅଟେ । ଏହାସହ ବର୍ଷ ଶେଷ ସୁଦ୍ଧା ୨୩୩୫ଟି ମାମଲାର ଦୋଷାରପ ଫର୍ଦ୍ଦ ଦାଖଲ କରାଯାଇଥିବା ନେଇ ଶ୍ୱେତପତ୍ରରେ ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ୨୦୨୧ ମସିହାରେ ରାଜ୍ୟରେ ଦୁର୍ଘଟଣା ସଂଖ୍ୟା ମଧ୍ୟ କିଛି କମ ନୁହେଁ । ବର୍ଷ ଶେଷସୁଦ୍ଧା ୧୦୯୮୩ଟି ମୋଟରଯାନ ଦୁର୍ଘଟଣା ମାମଲା ରୁଜୁ ହୋଇଥିବା ବେଳେ ଦୈନିକ ହାରାହାରି ପ୍ରାୟ ୩୦ଟି ଦୁର୍ଘଟଣା ମାମଲା ସାମ୍ନାକୁ ଆସୁଛି । ଏହି ସମସ୍ତ ମାମଲାରୁ ୧୦୯୦୯ଟି ମାମଲା ସତ୍ୟ ହୋଇଥିବା ବେଳେ ବର୍ଷ ଶେଷ ସୁଦ୍ଧା୭୧୦୮ଟି ମାମଲାର ଦୋଷାରୋପ ଫର୍ଦ୍ଦ ଦାଖଲ କରାଯାଇଛି ।
ଏହାବାଦ୍ ୨୦୨୧ରେ ୨୨୨୦ଟି ଦଙ୍ଗା ମାମଲା ରୁଜୁ ହୋଇଥିବା ବେଳେ ଏହାମଧ୍ୟରୁ ୨୧୫୫ଟି ମାମଲା ସତ୍ୟ ଅଟେ । ରୁଜୁ ହୋଇଥିବା ମାମଲାରୁ ୧୩୭୭ଟି ମାମଲାରେ ଦୋଷାରୋପ ଫର୍ଦ୍ଦ ବର୍ଷ ଶେଷ ସୁଦ୍ଧା ଦାଖଲ କରାଯାଇଛି ।