କନକ ବ୍ୟୁରୋ : ସାଧାରଣତଃ ନେତା ଓ ବଡ଼ ବଡ଼ିଆଙ୍କୁ ବନ୍ଧୁକ ସହ ସୁରକ୍ଷା ଦିଆଯାଉଥିବା ଦେଖିବାକୁ ମିଳେ । କିନ୍ତୁ କେବେ ଛୋଟିଆ ଠେଲା ଦୋକାନୀଙ୍କୁ ବନ୍ଧୁକ ସହ ସୁରକ୍ଷା ଦେଇଥିବା ଦେଖିଛନ୍ତି କି ? ଉତ୍ତର ପ୍ରଦେଶର ଏଟାରୁ ଆସିଛି କିଛି ଏମିତି ଚିତ୍ର, ଯେଉଁଠି ଜଣେ ଠେଲା ବା ଉଠା ଦୋକାନୀଙ୍କୁ ଦୁଇ ବନ୍ଧୁକଧାରୀ ସୁରକ୍ଷା ଦେଇଛନ୍ତି । ବନ୍ଧୁକଧାରୀ ହାତରେ ଏକେ-୪୭ ବନ୍ଧୁକ ଧରି ଉଠା ଦୋକାନୀଙ୍କୁ ସୁରକ୍ଷା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାସ୍ତା କଡ଼ରେ କପଡ଼ା ବେପାର କରୁଥିବା ଏହି ଉଠାଦୋକାନୀକୁ ଯେ କେହି ବି ଦେଖୁଛି, ସିଏ ଆଶ୍ଚର୍ଯ୍ୟ ହୋଇ ପଡ଼ୁଛି । ପ୍ରଥମେ ସମସ୍ତେ ଭାବିଲେ ଯେ ଏହି ଦୁଇ ବନ୍ଧୁକଧାରୀ ଗ୍ରାହକ ହୋଇଥିବେ । କିନ୍ତୁ ପରେ ଜାଣିବାକୁ ପାଇଲେ ଯେ ଦୁଇ ବନ୍ଧୁକଧାରୀ ଉଠା ଦୋକାନୀଙ୍କୁ ସୁରକ୍ଷା ଦେବା ପାଇଁ ନିୟୋଜିତ ହୋଇଛନ୍ତି । ରାମେଶ୍ୱର ଦୟାଲ ନାମକ ଏହି ଉଠା ଦୋକାନୀ ରାସ୍ତା କଡ଼ରେ କପଡ଼ା ବିକ୍ରି କରନ୍ତି । ରାମେଶ୍ୱରଙ୍କ ଜୀବନକୁ ବିପଦ ଅଛି, ତେଣୁ ତାଙ୍କୁ କୋର୍ଟ ସୁରକ୍ଷା ଯୋଗାଇ ଦେଇଛନ୍ତି । ଯାହା ପରେ ତାଙ୍କ ଉଠା ଦୋକାନୀ ଆଗରେ ଦୁଇଜଣ ବନ୍ଧୁକଧାରୀଙ୍କୁ ନିୟୋଜିତ କରାଯାଇଛି ।
ଜୁନ୍ ୩ ତାରିଖରେ ରାମେଶ୍ୱର କୋର୍ଟରେ ଏକ ମାମଲା କରିଥିଲେ ଯେ ପୂର୍ବତନ ବିଧାୟକ ଓ କିଛି ନେତା ତାଙ୍କ ଠାରୁ ଜୋରଜବରଦସ୍ତି ଜମି ଛଡ଼ାଇ ନେଇଥିଲେ । ଏବେବି କୋର୍ଟରେ ମାମଲା ଚାଲିଥିବା ବେଳେ ଅଭିଯୁକ୍ତମାନେ ରାମେଶ୍ୱରଙ୍କ ଅଭିଯୋଗକୁ ମିଛ ବୋଲି କହି ମାମଲାକୁ ଖାରଜ କରିବା ପାଇଁ ଆବେଦନ କରିଥିଲେ । ତେବେ ମାମଲାର ଶୁଣାଣି ବେଳେ ରାମେଶ୍ୱରଙ୍କୁ କୌଣସି ସୁରକ୍ଷା ଦିଆଯାଇନଥିବା ଦେଖି ବିଚାରପତି ଆଶ୍ଚର୍ଯ୍ୟ ହୋଇଥିଲେ । ଯାହା ପରେ ଜଜ୍ ପୋଲିସକୁ ରାମେଶ୍ୱରଙ୍କୁ ସୁରକ୍ଷା ଦେବା ପାଇଁ ନିର୍ଦ୍ଦେଶ ଦେଇଥିଲେ । ଆଉ କୋର୍ଟଙ୍କ ଆଦେଶ ପରେ ରାମେଶ୍ୱରଙ୍କ ସୁରକ୍ଷା ପାଇ ୨ଜଣ ବନ୍ଧୁକଧାରୀଙ୍କୁ ମୁତୟନ କରାଯାଇଛି ।