କନକ ବ୍ୟୁରୋ: ୨୦୨୪ ନିର୍ବାଚନରେ ମୋଦୀଙ୍କୁ ଟକ୍କର ଦେବା ପାଇଁ ଏକାଠି ହୋଇଛନ୍ତି ବିରୋଧୀ । ପାଟନା ପରେ ବେଙ୍ଗଳୁରୁରେ ୨୪ ବିରୋଧୀ ଦଳଙ୍କୁ ଆୟୋଜିତ ହୋଇଛି ଦୁଇ ଦିନିଆ ବୈଠକ । ଏହି ବୈଠକର ନେତୃତ୍ୱ ନେଉଛି କଂଗ୍ରେସ । ସେପଟେ ବେଙ୍ଗାଳୁରୁରେ ମୋଦୀ ବିରୋଧୀଙ୍କ ମେଳିକୁ ଟକ୍କର ଦେବା ପାଇଁ, ଦିଲ୍ଲୀରେ ଏନଡିଏ ମେଂଟ ଦଳଙ୍କ ମହାସମାବେଶ ଅନୁଷ୍ଠିତ ହେବାକୁ ଯାଉଛି । ହେଲେ ଏହି ଦୁଇଟି ବୈଠକରୁ ଦୂରରେ ରହିଛି ବିଜେଡି । ପୁଣିଥରେ ସମଦୂରତାର କଥା ଦୋହରାଇଛି ବିଜୁ ଜନତା ଦଳ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
୨୦୨୪ ଲଢେଇର ରୂପରେଖ କିଭଳି ହେବ ତାର ନୀଳ ନକ୍ସା ଆଙ୍କିବାକୁ ବେଙ୍ଗଳୁରୁରେ ଏକାଠି ହେଉଛନ୍ତି ମୋଦୀ ବିରୋଧୀ । ବହୁ ବାଦ ବିବାଦ ପରେ ଗୋଟିଏ ଛାତ ତଳେ ଏକାଠି ହେଉଛନ୍ତି କଂଗ୍ରେସ ଓ ଆମ ଆଦମୀ ପାର୍ଟି । ଦିଲ୍ଲୀ ସରକାରଙ୍କ କ୍ଷମତା ସଂକୁଚିତ କରିବାକୁ କେନ୍ଦ୍ରର ଅଧ୍ୟାଦେଶ ନେଇ, ଦୁଇ ଦଳ ଭିତରେ ମତଭେଦ ରହିଥିଲା । କୁହାଯାଉଛି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ମଧ୍ୟସ୍ଥତାରେ ଏହି ମତାନ୍ତର ଦୂର ହୋଇଛି । ତେଣୁ ପାଟନା ବୈଠକରୁ ଦୂରେଇ ରହିଥିବା ଆମ ଆଦମୀ ପାର୍ଟି ବେଙ୍ଗଳୁରୁ ବୈଠକରେ ସାମିଲ ହେଉଛି । ସୋମବାର ରାତିରେ ଡିନର ଡିପ୍ଲୋମାସି ପରେ ମଙ୍ଗଳବାର ଶକ୍ତି ପ୍ରଦର୍ଶନ କରିବେ ବିଜେପି ଓ ମୋଦୀ ବିରେଧୀ । ନିଜ ନିଜ ଭିତରେ ଥିବା ସବୁ ବୈଚାରିକ ମତଭେଦକୁ ଭୁଲି ପାଟ୍ରିଓଟିକ ଡେମୋକ୍ରାଟିକ ଆଲାଏନ୍ସର ସଦସ୍ୟ ଦଳ ବିଜେପି ବିରୋଧୀ ରଣନୀତି ପ୍ରସ୍ତୁତ କରିବେ । ନଜର ପକାନ୍ତୁ ଏହି ପରିସଂଖ୍ୟାନ ଉପରେ …
ପିଡିଏ ମେଂଟ
– କଂଗ୍ରେସ ନେତୃତ୍ୱାଧୀନ ପିଡିଏ ମେଂଟରେ ପ୍ରାୟ ୨୪ଟି ବିରୋଧୀ ରାଜନୈତିକ ଦଳ
– ୨୦୨୪ ସାଧାରଣ ନିର୍ବାଚନରେ ଏକାଠି ହୋଇ ଏନଡିଏ ବିରୋଧରେ ଲଢିବେ
– ୨୦୧୯ ନିର୍ବାଚନରେ ବିଜେପି ବିରୋଧୀ ୨୨ଟି ଦଳକୁ ମିଲିଥିଲା ୧୨୪ ଆସନ
– ଏଥର ବିରୋଧୀ ମେଂଟରେ ଅଛନ୍ତି ଶିବସେନା (ୟୁବିଟି) ଓ ଏନସିପି ଶରଦ ପାୱାର ଗୋଷ୍ଠୀ
ମଙ୍ଗଳବାର ଜାତୀୟ ରାଜନୀତିର ସବୁଠୁ ବଡ ଶକ୍ତି ପ୍ରଦର୍ଶନ ହେବାକୁ ଯାଉଛି । କାରଣ ବେଙ୍ଗାଳୁରୁରେ ମୋଦୀ ବିରୋଧୀଙ୍କ ମେଳିକୁ ଟକ୍କର ଦେବା ପାଇଁ, ଦିଲ୍ଲୀରେ ହେବ ଏନଡିଏ ମେଂଟ ଦଳଙ୍କ ମହାସମାବେଶ । ଏଥିପାଇଁ ଏନଡିଏର ପୂର୍ବ ସହଯୋଗୀଙ୍କୁ ଆମନ୍ତ୍ରଣ କରାଯାଇଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ପୂର୍ବରୁ ବିଜେପି ସହ ମେଂଟ ସରକାରରେ ଥିବା ବିଜୁ ଜନତା ଦଳ କିନ୍ତୁ ପୁଣିଥରେ ସମଦୂରତା କଥା କହି କଳ୍ପନା ଜଳ୍ପନାର ଅନ୍ତ ଘଟାଇଛି ।
୧୮ ତାରିଖ ଦିଲ୍ଲୀ ଏନଡିଏ ବୈଠକରେ ସାମିଲ ହେବେ ଏକନାଥ ସିନ୍ଦେଙ୍କ ଶିବସେନା ଓ ଅଜିତ ପାୱାରଙ୍କ ଏନସିପି ଗୋଷ୍ଠୀ । ହେଲେ ଏଯାଏ କାର୍ଡ ଖୋଲି ନାହାନ୍ତି ଓଡିଶାର ବିଜେଡି ଏବଂ ଆନ୍ଧ୍ରପ୍ରଦେଶର ୱାଇଏସଆର କଂଗ୍ରେସ । ରାଜନୈତିକ ସମୀକ୍ଷକଙ୍କ ମତରେ ଜାତୀୟ ପ୍ରସଙ୍ଗରେ ବିଜେପି ପ୍ରତି ବିଜେଡିର ସମର୍ଥନ ରହିଆସିଛି ।
୨୦୧୯ ନିର୍ବାଚନରେ ଏନଡିଏ ମେଂଟକୁ ୩୧୭ଟି ଲୋକସଭା ଆସନ ମିଳିଥିଲା । ବିରୋଧୀ ମେଂଟକୁ ନେଇ ଚିତ୍ର ସ୍ପଷ୍ଟ ହୋଇସାରିଥିବାବେଳେ ଜେଡିଏସ, ବିଏସପି, ଶିରୋମଣି ଅକାଳି ଦଳ ଓ ତେଲୁଗୁ ଦେଶମ ପାର୍ଟିର ସମର୍ଥନ ବିଜେପିକୁ ମିଳିବ ନା ନାହିଁ ତାହା ସ୍ପଷ୍ଟ ହୋଇନାହିଁ । ନୀତିଶ କୁମାରଙ୍କ ଜେଡିୟୁକୁ ମଧ୍ୟ ଏନଡିଏକୁ ଆଣିବାରେ ବିଫଳ ହୋଇଛି ବିଜେପି ।