ଜଳଘେରରେ ପ୍ରଭୁ ଶ୍ରୀଲୋକନାଥ : ବାହାରେ ପୂଜା ପାଇଲା ପ୍ରତିମା ! ପୂଜକ ଏବଂ କାଉଡିଆଙ୍କ ମଧ୍ୟରେ ଦେଖାଗଲା ଅସନ୍ତୋଷ ।
ପବିତ୍ର ଶ୍ରାବଣ ମାସରେ ଲକ୍ଷାଧିକ କାଉଡିଆ ଭକ୍ତ ଭୋଳାନାଥଙ୍କୁ ଜଳଲାଗି କରିବା ପାଇଁ ବିଭିନ୍ନ ଶୈବପୀଠରେ ଗହଳି ଲଗାଇଛନ୍ତି । କିନ୍ତୁ ଚଳିତ ବର୍ଷ ଲଗାଣ ବର୍ଷା ଯୋଗୁଁ ପୁରୀ ସହର ଓ ସଦର ଅଞ୍ଚଳରେ ଲକ୍ଷାଧିକ ଲୋକ ଜଳବନ୍ଦୀ ହୋଇ ରହିଛନ୍ତି। କିନ୍ତୁ ଉତ୍ସବମୁଖର ହୋଇ ଉଠୁଥିବା ପ୍ରସିଦ୍ଧ ଲୋକନାଥ ପୀଠ ଆଜି ଅସରାଏ ବର୍ଷାରେ ପାଣିରେ ବୁଡ଼ି ରହିବା ଘଟଣା କାଉଡିଆ ଓ ଭକ୍ତଙ୍କୁ ନିରାଶ କରିଛି। ଲୋକନାଥଙ୍କ ପୀଠରେ ପାଣି ଜମିବା ଏକ ସାଧାରଣ କଥା ହୋଇଥିବାବେଳେ ଚଳିତ ବର୍ଷ ମାତ୍ରାଧିକ ବର୍ଷା ଯୋଗୁଁ ପାଣି ଛାଡ଼ିବାର ନାଁ ଧରୁନି। ପାର୍ବତୀ ସାଗର ଜଳ ପତ୍ତନ ବୃଦ୍ଧି ପାଇବା ଯୋଗୁଁ ମହାପ୍ରଭୁ ଲୋକନାଥଙ୍କ ମୂଳପୀଠ(ଆସ୍ଥାନ) ବୁଡ଼ି ରହିଛି।
Kanak News is now on WhatsApp
Join and get latest news updates delivered to you via WhatsApp
ମନ୍ଦିର ବାହାରେ ପୂଜାର୍ଚ୍ଚନା ପାଇଁ ଶ୍ରୀ ଲୋକନାଥଙ୍କ ପ୍ରତିମା ରଖାଯାଇଛି। ଠାକୁରଙ୍କ ପାଖକୁ ଯାଇ ପୂଜାର୍ଚ୍ଚନା କରିବା ସହଜ ହେଉନଥିବାରୁ ପୂଜକ ଓ ଭକ୍ତଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି। ଆଜି ୪ଟି ପାଣି ପମ୍ପ ଲଗାଯାଇ ଜଳ ନିଷ୍କାସନ କରାଯାଉଛି। ଆସନ୍ତାକାଲି ଶ୍ରାବଣ ତୃତୀୟ ସୋମବାର ଥିବାରୁ ପୀଠରେ ଲକ୍ଷାଧିକ ଶ୍ରଦ୍ଧାଳୁ ପାଣି ଢାଳିବେ। ପ୍ରତିବର୍ଷ ବର୍ଷାରେ ଲୋକନାଥଙ୍କ ପୀଠ ବୁଡି ରହୁଥିବା ବେଳେ ଏହାର ସ୍ଥାୟୀ ପ୍ରତିକାର କରାଯାଉନଥିବା ଅଭିଯୋଗ ହୋଇଛି। ପ୍ରସିଦ୍ଧ ଶୈବ ପୀଠ ଲୋକନାଥଙ୍କ ପ୍ରତି ଅବିଚାର କରାଯାଉଛି। ସରକାର ଲୋକନାଥ ମନ୍ଦିର ବିକାଶ ଓ ଜଳ ନିଷ୍କାସନ ପାଇଁ ସ୍ୱତନ୍ତ୍ର ବ୍ୟବସ୍ଥା କରିବାକୁ ଦାବି ହୋଇଛି।