କ୍ରିପ୍ଟୋରେ ନିବେଶ ନାଁରେ ହଜାରେ କୋଟି ଟଙ୍କାର ଠକେଇ ମାମଲା : ବଲିଉଡ, ବିଦେଶ ଲିଙ୍କ ଓ ଆର୍ଥିକ କାରବାର ନେଇ ଦୁଇ ଅଭିଯୁକ୍ତଙ୍କୁ ମାରାଥନ ଜେରା
କନକ ବ୍ୟୁରୋ : କ୍ରିପ୍ଟୋରେ ନିବେଶ ନାଁରେ ହଜାରେ କୋଟି ଟଙ୍କାର ଠକେଇ ମାମଲା । ବଲିଉଡ, ବିଦେଶ ଲିଙ୍କ ଓ ଆର୍ଥିକ କାରବାର ନେଇ ଦୁଇ ଅଭିଯୁକ୍ତଙ୍କୁ ମାରାଥନ ଜେରା କରୁଛି ଅର୍ଥନୈତିକ ଅପରାଧ ଶାଖା । ଗୋବିନ୍ଦାଙ୍କ ବ୍ୟତିତ ଆଉ କେଉଁ ଅଭିନେତା, ଅଭିନେତ୍ରୀ ପ୍ରଚାର କରୁଥିଲେ ତାହାର ଖୋଳତାଡ ଜାରି ରହିଛି । ଜେରାର ପ୍ରଥମ ଦିନରେ ଦୁଇ ଅଭିଯୁକ୍ତଙ୍କୁ ବଲିଉଡ ଲିଙ୍କ ନେଇ ଜୋରଦାର ପଚରାଉଚରା କରାଯାଇଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଗୋବିନ୍ଦାଙ୍କ ବ୍ୟତିତ ଆଉ କେଉଁ ଅଭିନେତା ଅଭିନେତ୍ରୀ ପ୍ରଚାର କରୁଥିଲେ ଏବଂ ସେଥିପାଇଁ ସେମାନଙ୍କୁ କେତେ ଟଙ୍କା ଦିଆଯାଉଥିଲା ତାକୁ ନେଇ ଜେରା କରିଛି । ତେବେ ସଂସ୍ଥା ଆରବିଆଇ ସ୍ୱିକୃତିପ୍ରାପ୍ତ ହୋଇନଥିବା ବେଳେ କେଉଁ ପରିସ୍ଥିତିରେ ସେଲିବ୍ରିଟିମାନେ ସଂସ୍ଥାର ପ୍ରଚାର ପାଇଁ ଯାଇଥିଲେ, ସଂସ୍ଥାର ବାସ୍ତବତା ଜାଣିଥିଲେ ନା ଅର୍ଥ ଲୋଭରେ ପ୍ରଚାର କରିଥିଲେ, ଏସବୁ ପ୍ରସଙ୍ଗରେ ଖୋଳତାଡ ଚାଲିଛି । ଆବଶ୍ୟକ ପଡ଼ିଲେ ଉକ୍ତ ବଲିଉଡ ତାରକାଙ୍କୁ ମଧ୍ୟ ଜେରା କରାଯାଇପାରେ ବୋଲି ସୂଚନା ମିଳିଛି ।
ଏହି ସଂସ୍ଥା ମୁଖ୍ୟତଃ ୟୁରୋପର ଆଇସଲ୍ୟାଣ୍ଡରୁ ପରିଚାଳିତ ହେଉଥିଲା, ଏହାର ମୁଖ୍ୟ ଡେଭିଡ ଗେଜ୍ ବିଭିନ୍ନ ସମୟରେ ଭାରତକୁ ଆସି ଓଡ଼ିଶା ସମେତ ବିଭିନ୍ନ ରାଜ୍ୟ ବୁଲି ରାତାରାତି ଧନୀ ହେବାର ସ୍ୱପ୍ନ ଦେଖାଇ ଲୋକଙ୍କୁ ସଦସ୍ୟ ହେବାକୁ ପ୍ରବର୍ତାଉଥିଲେ । ତେଣୁ ମାମଲାର ବିଦେଶ ଲିଙ୍କ ନେଇ ମଧ୍ୟ ତଦନ୍ତ ହେଉଛି । କେଉଁମାନେ ବିଦେଶରୁ ଆସିଥିଲେ, ସଂସ୍ଥା କେଉଁମାନଙ୍କୁ ବିଦେଶ ପଠାଇଥିଲା ଓ ଏଥିପାଇଁ କେତେ ଟଙ୍କା ଖର୍ଚ୍ଚ ହୋଇଥିଲା ସେ ନେଇ ମଧ୍ୟ ଖୋଳତାଡ କରୁଛି ଅର୍ଥନୈତିକ ଅପରାଧ ଶାଖା ।