ଟ୍ୱିନ୍ ଟାୱାର ଭାଙ୍ଗିବା ପରେ ଅଳିଆ ହଟାଇବାକୁ ଲାଗିବ ୩ ମାସ । ଜାଣନ୍ତୁ ବିସ୍ଫୋରଣ ପରେ କଣ ରହିଛି ପ୍ରଶାସନ ପାଇଁ ଚ୍ୟାଲେଞ୍ଜ
କନକ ବ୍ୟୁରୋ : ନୋଏଡା ସେକ୍ଟର ୯୩(ଏ) ରେ ବେଆଇନ ଭାବେ ନିର୍ମାଣ ହୋଇଥିବା ଟ୍ୱିନ୍ ଟାୱାର ଆଜି ଅପରାହ୍ନରେ ମାଟିରେ ମିଶିବ । ଏହି ଟାୱାରକୁ ଧ୍ୱଂସ କରିବାକୁ ଟାୱାର ମଧ୍ୟରେ ୯,୬୪୦ ଟି କଣା କରାଯାଇଥିବା ବେଳେ ସେହି କଣା ବା ଗାତ ମଧ୍ୟରେ ୩୭୦୦ କିଲୋଗ୍ରାମ ବାରୁଦ ଭରା ଯାଇଛି । ଦେଶରେ ପ୍ରଥମଥର ପାଇଁ ଏଭଳି ବିଶାଳକାୟ ଟାୱାର ଧ୍ୱଂସ କରାଯିବ । ଏହାକୁ ନେଇ ଏବେ ଲୋକମାନଙ୍କ ମନରେ ଅନେକ ପ୍ରଶ୍ନ ରହିଛି । ତାହା ମଧ୍ୟରେ ଟାୱାର ଧ୍ୱଂସ ପରେ ସେଠାରେ ଯେତେ ଅଳିଆ ପଡିବ ତାହାକୁ ପ୍ରଶାସନ କଣ କରିବ । ଏହି ଟାୱାରକୁ ଭାଙ୍ଗିବାକୁ କେତେ ସମୟ ଲାଗିବ ? ଏହାସହ ବିସ୍ଫୋରଣ ଫଳରେ ସୃଷ୍ଟି ହେବାକୁ ଥିବା ବାୟୁ ପ୍ରଦୂଷଣକୁ କିଭଳି ମ୍ୟାନେଜ କରିବ ପ୍ରଶାସନ ?
Kanak News is now on WhatsApp
Join and get latest news updates delivered to you via WhatsApp
କିଛି ସୂଚନା ମୁତାବକ ଟ୍ୱିନ ଟାୱାର ଭଙ୍ଗାଯିବା ପରେ ସେଠାରେ ୫୫ ହଜାରରୁ ୮୦ ହଜାର ଟନ୍ ପର୍ଯ୍ୟନ୍ତ ଅଳିଆ ବାହାରିବ । ଏହାକୁ ସ୍ଥାନାନ୍ତର କିରବାକୁ ପ୍ରଶାସନକୁ ସର୍ବନିମ୍ନ ୩ ମାସ ଲାଗିବ । ଏହି ବିସ୍ଫୋରଣ ବେଳେ କଂକ୍ରିଟରୁ ଯେଉଁ ଧୂଳି ଉଡିବ ତାହା ଦ୍ୱାରା ସ୍ଥାନୀୟ ଅଞ୍ଚଳରେ ବାୟୁ ପ୍ରଦୂଷଣ ହେବ । ଏଥିରୁ ରକ୍ଷା ପାଇବାକୁ ନୋଇଡା ପ୍ରାଧିକରଣ ଦ୍ୱାରା ଅନେକ ବ୍ୟବସ୍ଥା କରାଯାଇଛି ।
ନୋଏଡା ପ୍ରାଧିକରଣ ମୁତାବକ ଟାୱାର ବିସ୍ଫୋରଣ ପରେ ଯେଉଁ ଧୂଳି ଉଡିବ ସେଥିରୁ ରକ୍ଷା ପାଇବା ପାଇଁ ୧୦୦ ଟ୍ୟାଙ୍କର ପାଣି ସ୍ପ୍ରେ କରାଯିବାର ବ୍ୟବସ୍ଥା ହୋଇଛି । ଏହାସହ ୧୫ ଟି ଆଣ୍ଟି ସ୍ମଗ ଗନ, ୬ ମେକାନିକଲ ସ୍ୱିପିଂ ମେସିନ ଓ ୨୦୦ ସଫେଇ କର୍ମଚାରୀଙ୍କୁ ନିୟୋଜିତ କରାଯାଇଛି । ହଠାତ ଅଳିଆ ଉଠାଇବାକୁ ୨୦ ଟି ଟ୍ରାକ୍ଟର ମଧ୍ୟ ନିୟୋଜିତ କରାଯାଇଛି । ଏହାସହ ସ୍ଥାନୀୟ ଅଞ୍ଚଳରେ ଥିବା ଗଛରୁ ଧୂଳି ସଫା କରିବାର ମଧ୍ୟ ବ୍ୟବସ୍ଥା ହୋଇଛି ।
ସେପଟେ ବାୟୁ ପ୍ରଦୂଷଣକୁ ରୋକିବାକୁ ୬ ଟି ସ୍ଥାନରେ ମାନୁଆଲ ଏମ୍ବିଏଣ୍ଟ ଏୟାର କ୍ୱାଲିଟି ମନିଟରିଂ ଷ୍ଟେସନ ସ୍ଥାପନ କରାଯାଇଛି । ଯାହା ମାଧ୍ୟମରେ ପବନର ଗୁଣବତ୍ତା ମପାଯାଇ ପାରିବ । ଏହାସହ ସ୍ଥାନୀୟ ଅଞ୍ଚଳର ଲୋକଙ୍କୁ କିଛିଦିନ ପାଇଁ ମାସ୍କ ବ୍ୟବହାର କରିବାକୁ ପରାମର୍ଶ ଦିଆଯାଇଛି ।