କଳାପଥରର କଳା କାହାଣୀ । ମାଟି ଅତଡା ଖସିବା ପରେ ଚାପି ହୋଇ ଶ୍ରମିକ ମୃତ୍ୟୁ । ଯାଜପୁର ଡଙ୍କାରି ପାହାଡ଼ର କଳାପଥର ମାଇନ୍ସରୁ ବେଆଇନ ଖଣି ଖନନକୁ ନେଇ ଉଠିଲା ପ୍ରଶ୍ନ ।
କନକବ୍ୟୁରୋ : ପେଟ ପାଇଁ ଖଦାନରେ କାମ କରୁଥିବା ଜଣେ ଶ୍ରମିକଙ୍କ ଜୀବନ ଯାଇଥିବା ବେଳେ ଏକାଧିକ ଶ୍ରମିକ ନିଖୋଜ ଥିବା ଆଶଙ୍କା କରାଯାଉଛି । ଯାଜପୁର ଡଙ୍କାରି ପାହାଡ଼ର କଳାପଥର ଖାଦାନରେ ଏଭଳି ଏକ ଅଘଟଣ ଦେଖିବାକୁ ମିଳିଛି । ମାଟି ଅତଡ଼ା ଧସିବା ଫଳରେ ପାଖାପାଖି ପ୍ରାୟ ଶହେ ଟ୍ରିପ କଳାପଥର ଖସି ପଡ଼ିଛି । ଆଉ ଏହାରି ଭିତରେ ଜଣେ ଚାପି ହୋଇମୃତ୍ୟୁବରଣ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କଳା ପଥର ଖାଦାନରେ ବିଳମ୍ବିତ ରାତିରେ ଡ୍ରିଲ ହେଉଥିବା ବେଳେ ମାଟି ଅତଡ଼ା ଧସି ତା ତଳେ ୩ଜଣ ଆନ୍ଧ୍ରପ୍ରଦେଶର ଶ୍ରମିକ ଚାପି ହୋଇ ରହିଥିବା ସନ୍ଦେହ କରାଯାଉଛି । ମାଫିଆଙ୍କ ଭୟରେ ସ୍ଥାନୀୟ ଲୋକ ଘଟଣାସ୍ଥଳକୁ ଆସିପାରୁନଥିବା ଅଭିଯୋଗ ହୋଇଥିବା ବେଳେ ଜେନାପୁର ପୋଲିସର ନିଷ୍କ୍ରିିୟତା ନେଇ ସ୍ଥାନୀୟ ଅଂଚଳରେ ଅଭିଯୋଗ ହୋଇଛି ।
ଏପଟେ ଘଟଣାସ୍ଥଳରେ ବିଜେପି ନେତ୍ରୀ ସ୍ମୃତିରେଖା ପହି ପହଂଚି ମୃତକଙ୍କୁ ତୁରନ୍ତ କ୍ଷତିପୂରଣ ଦେବାକୁ ଦାବି କରିବା ସହ ବେଆଇନ ଖଦାନ ଚଳାଉଥିବା ବ୍ୟକ୍ତିଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ତେବେ ଏହି ଘଟଣ ପାଇଁ ଦାୟୀ କିଏ? ଏବଂ କାହିଁକି ଘଟିଲା ଅଘଟଣ? ତାକୁ ନେଇ କୌଣସି ସନ୍ତୋଷଜନକ ଉତର କାହା ପାଖରେ ନାହିଁ ।