କନକ ବ୍ୟୁରୋ : ଅଧା ହୋଇ ପଡି ରହିଛି ରାଡ଼ାର ନିର୍ମାଣ । ବାତ୍ୟା, ଲଘୁଚାପ ଓ ସୁନାମୀ ଭଳି ସାମୁଦ୍ରିକ ବିପର୍ଯ୍ୟୟ ସଂପର୍କରେ ଆଗୁଆ ସୂଚନା ପାଇଁ ପୁରୀ ଜିଲ୍ଲାର ଉପକୂଳିଆ ବ୍ଲକ୍ ଅସ୍ତରଙ୍ଗ ଓ କାକଟପୁରରେ ପ୍ରତିଷ୍ଠା ହେଉଛି ଏହି ରାଡ଼ାର ପ୍ରକଳ୍ପ । ହେଲେ ରାଜ୍ୟ ସରକାରଙ୍କ ବାତ୍ୟା ପ୍ରଶମନ ବିଭାଗ ପକ୍ଷରୁ ନିର୍ମାଣ ହେଉଥିବା ଏହି ପ୍ରକଳ୍ପ ଅଧାରୁ ବନ୍ଦ ରହିଛି । ମୁଖ୍ୟ ରାଡ଼ାର ସହ ସମୁଦ୍ରକୂଳିଆ ଅଂଚଳ ସହନ, ଡାଳୁଅକଣି, ନଗର ଓ ତାଳଦା ଠାରେ ଚାଲିଛି ମିନି ରାଡାର ନିର୍ମାଣ । ତେବେ ନିର୍ମାଣକାରୀ ଠିକା କଂପାନୀ ପକ୍ଷରୁ ଏହି ପ୍ରକଳ୍ପ ଅଧାପନ୍ତରିଆ ହୋଇ ପଡି ରହିଛି । ଯାହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ ।
Kanak News is now on WhatsApp
Join and get latest news updates delivered to you via WhatsApp
ସାମୁଦ୍ରିକ ଝଡ଼, ବାତ୍ୟା କିମ୍ବା ସୁନାମୀ ଆସିବା ପୂର୍ବରୁ ସାଇରନ୍ ମାଧ୍ୟମରେ ଆଗୁଆ ସୂଚନା ଦେଇଥାଏ ଏହି ରାଡାର । ମିନି ଟାୱାରର ସାଇରନ୍ ୪ କିଲୋମିଟର ଓ ବ୍ଲକରେ ସ୍ଥାପିତ ମୁଖ୍ୟ ଟାୱାରର ୧୫ କିଲୋମିଟର ପର୍ଯ୍ୟନ୍ତ ସାଇରନ୍ ଶୁଭିବାର କ୍ଷମତା ରହିଛି । ତେବେ ହାଇଦ୍ରାବାଦର ଏକ ଠିକା କଂପାନୀ ଏହାର ନିର୍ମାଣ କାର୍ଯ୍ୟ ହାତକୁ ନେଇଛି । ଆଉ ଠିକ୍ ସମୟରେ ଏହା କାର୍ଯ୍ୟକ୍ଷମ ହେବ ବୋଲି କହିଛନ୍ତି ଅସ୍ତରଙ୍ଗ ବ୍ଲକ୍ ଅଧ୍ୟକ୍ଷ । ତେବେ କେତେ ଶୀଘ୍ର ଏହି ପ୍ରକଳ୍ପ ନିର୍ମାଣ ଶେଷ ହେଉଛି ଏହା ଉପରେ ରହିଛି ସ୍ଥାନୀୟ ଲୋକଙ୍କ ନଜର ।