କନକ ବ୍ୟୁରୋ : ରାନିଲ୍ ବିକ୍ରମସିଂଘେ ହେଲେ ଶ୍ରୀଲଙ୍କାର ନୂଆ ରାଷ୍ଟ୍ରପତି । ଶ୍ରୀଲଙ୍କା ସଂସଦ ତାଙ୍କୁ ଦେଶର ନବମ ରାଷ୍ଟ୍ରପତି ଭାବେ ନିର୍ବାଚିତ କରିଛି । ପୋଷ୍ଟାଲ ବାଲାଟରେ ହୋଇଥିବା ଭୋଟିଂରେ ରାନିଲଙ୍କ ସପକ୍ଷରେ ୧୩୪ ଜଣ ସାଂସଦ ମତଦାନ କରିଛନ୍ତି । ତାଙ୍କ ପ୍ରତିଦ୍ୱନ୍ଦ୍ୱୀ ଦୁଲ୍ଲାସ ଅଲ୍ଲାପେରୁମା ୮୨ ଭୋଟ୍ ପାଇଥିବା ବେଳେ ଅନୁରା କୁମାରା ଦିସାନାୟକେ ମାତ୍ର ୩ ଖଣ୍ଡ ଭୋଟ୍ ପାଇଛନ୍ତି । ନୂଆ ରାଷ୍ଟ୍ରପତି ନିର୍ବାଚନ ପାଇଁ ଶ୍ରୀଲଙ୍କା ସଂସଦରେ ସମସ୍ତ ସାଂସଦ ଉପସ୍ଥିତ ଥିଲେ । ପୂର୍ବତନ ପ୍ରଧାନମନ୍ତ୍ରୀ ମହିନ୍ଦା ରାଜପାକ୍ଷେ ମଧ୍ୟ ଉପସ୍ଥିତ ରହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀଲଙ୍କାରେ ରାଜନୈତିକ ଅସ୍ଥିରତା ଏବଂ ବିଦେଶକୁ ପଳାୟନ କରିଥିବା ରାଷ୍ଟ୍ରପତି ଗୋଟାବାୟା ରାଜପାକ୍ଷେଙ୍କ ଇସ୍ତଫା ପରେ ବିକ୍ରମସିଂଘେ କାମଚଳା ରାଷ୍ଟ୍ରପତି ଭାବେ ଦାୟିତ୍ୱ ତୁଲାଉଥିଲେ । ଗୋଟିଏ ପଟେ ରାଷ୍ଟ୍ରପତି ନିର୍ବାଚନ ପାଇଁ ମତଦାନ ଚାଲିଥିବା ବେଳେ ଅନ୍ୟପଟେ ରାଜଧାନୀ କଲମ୍ବୋରେ ରାଷ୍ଟ୍ରପତି ସଚିବାଳୟରେ କାମଚଳା ରାଷ୍ଟ୍ରପତି ରାନିଲ ବିକ୍ରମସିଂଘେଙ୍କ ବିରୋଧରେ ଜନତାଙ୍କ ଜୋରଦାର ପ୍ରତିବାଦ ଦେଖିବାକୁ ମିଳିଛି । ଏପରିକି ରାନିଲଙ୍କ ବିରୋଧରେ କିଛି ଲୋକେ ମଉନ ପ୍ରତିବାଦ ମଧ୍ୟ କରିଥିଲେ । ଶ୍ରୀଲଙ୍କାର ସଂସଦରେ ୪୪ ବର୍ଷ ପରେ ପ୍ରଥମଥର ଆଜି ସିଧାସଳଖ ରାଷ୍ଟ୍ରପତି ନିର୍ବାଚନ ହୋଇଛି ।
ଏହାପୂର୍ବରୁ ୧୯୯୩ରେ ତକ୍ରାଳୀନ ରାଷ୍ଟ୍ରପତି ରଣସିଂଘେ ପ୍ରେମଦାସାଙ୍କୁ ହତ୍ୟା କରାଯାଇଥିଲା । ଯାହା ପରେ ରାଷ୍ଟ୍ରପତି ପଦ ଖାଲି ପଡ଼ିଥିଲା । ସେହି ସମୟରେ ଡିବି ବିଜେତୁଙ୍ଗାଙ୍କୁ ସଂସଦ ସର୍ବସମ୍ମତି କ୍ରମେ ରାଷ୍ଟ୍ରପତି ଦାୟିତ୍ୱ ହସ୍ତାନ୍ତର କରିଥିଲା । ଏଥର ରାଷ୍ଟ୍ରପତି ଦୌଡ଼ରେ କାମଚଳା ରାଷ୍ଟ୍ରପତି ରାନିଲ ବିକ୍ରମସିଂଘେଙ୍କ ବ୍ୟତୀତ ଦୁଲ୍ଲାସ ଅଲ୍ଲାପେରୁମା ଓ ଅନୁରା କୁମାରା ଦିସାନାୟକେ ମଇଦାନରେ ଥିଲେ । ବହୁମତ ପାଇଁ ୨୨୫ ସାଂସଦଙ୍କ ମଧ୍ୟରୁ ୧୧୩ ଜଣଙ୍କର ସମର୍ଥନ ଆବଶ୍ୟକ ଥିଲା । ରାନିଲ ୧୩୪ ଭୋଟ୍ ପାଇ ବିଜୟୀ ହୋଇଛନ୍ତି ।
ରାନିଲ ବିକ୍ରମସିଂଘେ କିଏ ?
– ଶ୍ରୀଲଙ୍କାର ୯ମ ରାଷ୍ଟ୍ରପତି ହୋଇଛନ୍ତି ରାନିଲ ବିକ୍ରମସିଂଘେ
– ରାଜନୀତିରେ ରହିଛି ତାଙ୍କର ଦୀର୍ଘ ଦିନର ଅଭିଜ୍ଞତା
– ବିକ୍ରମସିଂଘେ ୧୯୭୦ ମସିହାରେ ରାଜନୀତିରେ ପାଦ ଦେଇଥିଲେ
– ୟୁନାଇଟେଡ୍ ନ୍ୟାସନାଲ ପାର୍ଟିର ମୁଖ୍ୟ ଥିଲେ
– ନିଜ ଦଳର ଜଣେ ମାତ୍ର ସାଂସଦ ଭାବେ ନିର୍ବାଚିତ ହୋଇଥିଲେ
– ରାନିଲ ୧୯୯୩ରୁ ୨୦୧୯ ମଧ୍ୟରେ ଶ୍ରୀଲଙ୍କାର ୫ଥର ପ୍ରଧାନମନ୍ତ୍ରୀ ଦାୟିତ୍ୱ
– ୧୯୭୭ରେ ବିକ୍ରମସିଂଘେ ପ୍ରଥମ ଥର ସାଂସଦ ଭାବେ ନିର୍ବାଚିତ
– ୨ଥର ବିରୋଧୀ ଦଳ ନେତା ବି ରହିଛନ୍ତି ବିକ୍ରମସିଂଘେ
– ଗତ ମେ ମାସରେ ମହିନ୍ଦା ରାଜପକ୍ଷେଙ୍କ ଇସ୍ତଫା ପରେ ଶ୍ରୀଲଙ୍କାର ପ୍ରଧାନମନ୍ତ୍ରୀ ଦାୟିତ୍ୱ ନେଇଥିଲେ
– ୧୪ ଜୁଲାଇରେ ଶ୍ରୀଲଙ୍କାର କାର୍ଯ୍ୟନିର୍ବାହୀ ରାଷ୍ଟ୍ରପତି ହୋଇଥିଲେ
– ରାଷ୍ଟ୍ରପତି ଗୋଟାବାୟା ରାଜପକ୍ଷେ ଫେରାର ହେବା ପରେ ନୂଆ ଦାୟିତ୍ୱ ମିଳିଥିଲା
– ଏବେ ରାଷ୍ଟ୍ରପତି ନିର୍ବାଚନରେ ନୂଆ ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି
ଶ୍ରୀଲଙ୍କାରେ ଆର୍ଥିକ ସଙ୍କଟ କାହିଁକି ?
– ୨୦୧୦ରୁ ଶ୍ରୀଲଙ୍କାରେ ଋଣ ଭାର ବଢି ଚାଲିଛି
– ଚୀନ, ଜାପାନ, ଭାରତରୁ ଅଣାଯାଇଥିବା ଋଣ ଠିକ୍ ଭାବେ ବିନିଯୋଗ ହୋଇନି
– ଅନ୍ତର୍ଜାତୀୟ ବଜାରରୁ ମଧ୍ୟ ବିପୁଳ ଋଣ କରି ପରିଶୋଧ କରିପାରିନି ଶ୍ରୀଲଙ୍କା
– ୨୦୧୯ରେ ଗୋଟବାୟା ଟିକସ ହ୍ରାସ କରିବା ବୁମେରାଂ ହୋଇଥିଲା
– ଟିକସ ହ୍ରାସ ଯୋଗୁ ଦେଶର ଲୋକଙ୍କୁ ଫାଇଦା ମିଳିଥିଲା
– କିନ୍ତୁ ସରକାରୀ ରାଜକୋଷ ୩୦ ପ୍ରତିଶତ ଖାଲି ହୋଇଯାଇଥିଲା
– କୋଭିଡ୍ ମହାମାରୀ ଯୋଗୁ ପର୍ଯ୍ୟଟନ ଶିଳ୍ପ ସଂପୂର୍ଣ୍ଣ ପ୍ରଭାବିତ ହୋଇଛି
– ଦେଶରେ ପର୍ଯ୍ୟଟନ ଶିଳ୍ପର ଆୟ ତୃତୀୟ ସର୍ବବୃହତ୍ ମାଧ୍ୟମ ଥିଲା
– ୨୦୧୮ରେ ଦେଶକୁ ୨୩ ଲକ୍ଷ ବିଦେଶୀ ପର୍ଯ୍ୟଟକ ଆସିଥିଲେ
– ୨୦୧୯ରେ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ୧୯ ଲକ୍ଷକୁ ହ୍ରାସ ପାଇଥିଲା
– କରୋନା ଯୋଗୁ ୨୦୨୦ ଓ ୨୦୨୧ରେ ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଇଥିଲା
– ସରକାର ଦେଶରେ ଅର୍ଗାନିକ୍ ଫାର୍ମକୁ ଅଗ୍ରାଧିକାର ଦେବାକୁ ଚେଷ୍ଟା କରିଥିଲେ
– ରାସାୟନିକ ସାର ଓ କୀଟନାଶକ ପ୍ରୟୋଗକୁ ସଂପୂର୍ଣ୍ଣ ବନ୍ଦ କରିଦେଲେ
– ଫଳରେ ଧାନ ଓ ଅନ୍ୟାନ୍ୟ ଫସଲର ଉତ୍ପାଦନ ହ୍ରାସ ପାଇଥିଲା
– ଉତ୍ପାଦନ ହ୍ରାସ ଯୋଗୁ ଦେଶରେ ଦରଦାମ୍ ବୃଦ୍ଧି ପାଇବାରେ ଲାଗିଥିଲା