ନିର୍ବାଚନର ଢେର ପୁର୍ବରୁ କଂଗ୍ରେସର କସରତ ! ୪୪ ପ୍ରାର୍ଥୀଙ୍କ ନାଁ ଚୂଡାନ୍ତ କଲା ସ୍କ୍ରିନିଂ କମିଟି, ବୈଠକରେ ନବ ଦାସଙ୍କ ଅନୁପସ୍ଥିତିକୁ ନେଇ ଚର୍ଚ୍ଚା, ସେପଟେ ପଦରୁ ଇସ୍ତଫା ଦେଲେ କୃଷ୍ଣ ସଗରିଆ ।
କନକ ବ୍ୟୁରୋ : ୨୦୧୯ ମହାସମର ପାଇଁ ପ୍ରସ୍ତୁତ ହେଉଛି ରଣକ୍ଷେତ୍ର । ଆଉ ଏହି ମହାମୁକାବିଲା ପାଇଁ କଂଗ୍ରେସର ପ୍ରସ୍ତୁତି ବିଜେଡି ଓ ବିଜେପି ଠାରୁ ଦୁଇ ପାଦ ଆଗରେ ରହିଛି । ଆଜି ୪୪ ଜଣ କଂଗ୍ରେସ ପ୍ରାର୍ଥୀଙ୍କ ନାଁ ଚୂଡ଼ାନ୍ତ କରିଛି ରାଜ୍ୟ କଂଗ୍ରେସ । ୧୫ ଜଣ ଷ୍ଟାଣ୍ଡିଂ ଏମଏଲଏଙ୍କ ବ୍ୟତୀତ ଆଉ ୨୯ ଜଣ ପ୍ରାର୍ଥୀଙ୍କ ନାଁ ସ୍କ୍ରିନିଂ କମିଟି ବୈଠକରେ ଚୂଡାନ୍ତ ହୋଇଛି । ଯେଉଁମାନେ କଂଗ୍ରେସ ଟିକେଟରେ ନିର୍ବାଚନ ଲଢ଼ିବେ । ହେଲେ ଅପେକ୍ଷା ବିଧିବଦ୍ଧ ନାଁ ଘୋଷଣାକୁ ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନର ଢ଼େର ପୂର୍ବରୁ, ଏମିତି କି ନିର୍ବାଚନର ତାରିଖ ଘୋଷଣା ହେବା ଆଗରୁ ୨୦୧୯ ଲଢ଼େଇ ପାଇଁ ପ୍ରସ୍ତୁତ ନିରଞ୍ଜନଙ୍କ ଟିମ୍ ଓଡ଼ିଶା । କିଏ କେଉଁ ନିର୍ବାଚନ ମଣ୍ଡଳୀରୁ ଲଢ଼ିବେ ? କେଉଁ ଆସନ ପାଇଁ କିଏ ଫିଟ୍ ? ଏକ ପ୍ରକାର ଚୂଡାନ୍ତ ହୋଇଛି କଂଗ୍ରେସର ପ୍ରାର୍ଥୀ ତାଲିକା । ରାଜ୍ୟରେ କ୍ଷମତାରେ ଥିବା ବିଜେଡି ଏବଂ କେନ୍ଦ୍ରରେ କ୍ଷମତାରେ ଥିବା ବିଜେପିଠାରୁ ଗୋଟିଏ ପାଦ ଆଗକୁ ବଢ଼ିଛି କଂଗ୍ରେସର ନିର୍ବାଚନ ପ୍ରସ୍ତୁତି ।
ଚୂଡ଼ାନ୍ତ ହେଲା ୪୪ ଜଣ ପ୍ରାର୍ଥୀଙ୍କ ନାଁ । ପ୍ରାର୍ଥୀଙ୍କ ନାଁରେ ସ୍କ୍ରିନିଂ କମିଟିର ମୋହର । ସ୍କ୍ରିନିଂ କମିଟି ଅଧ୍ୟକ୍ଷ, ଓଡ଼ିଶା ପ୍ରଭାରୀ ଏବଂ ପିସିସି ସଭାପତି ଏବଂ ପିଇସି ସଦସ୍ୟଙ୍କ ଉପସ୍ଥିତିରେ ୪୪ ଜଣ ପ୍ରାର୍ଥୀଙ୍କ ନାଁ ଚୂଡ଼ାନ୍ତ କରାଯାଇଛି । ଯେଉଁଥିରେ, ଦକ୍ଷିଣ ଓଡ଼ିଶାରୁ ୨୦ ଜଣ । ପଶ୍ଚିମ ଓଡ଼ିଶାରୁ ୧୧ ଜଣ ଏବଂ ଉପକୂଳ ଓଡ଼ିଶାରୁ ୯ ଜଣ ପ୍ରାର୍ଥୀଙ୍କ ନାଁ ଚୁଡ଼ାନ୍ତ ହୋଇଛି । ସେହିପରି ୧୫ ଜଣ ଷ୍ଟାଣ୍ଡିଂ ଏମଏଲଏ ନିର୍ବାଚନୀ ମୈଦାନରେ ପୁଣି ଥରେ ଓହ୍ଲାଇବା ନେଇ ସ୍ପଷ୍ଟ ହୋଇଛି । ୨୦୧୯ ମହାମୁକାବିଲା ପାଇଁ କଂଗ୍ରେସର ଏହି ଟିମରେ ଯୁବ ପୀଢ଼ିଙ୍କୁ ମିଳିଛି ଅଧିକ ଗୁରୁତ୍ୱ ।
କେଉଁ ନେତାଙ୍କ ସଂଗଠନ କେମିତି ? କେଉଁ ନେତାଙ୍କ ବିଜୟ ସଂଭାବନା ଅଧିକ ? ଏହି ଭଳି ସବୁ ଗୁରୁତ୍ୱ ପୂର୍ଣ୍ଣ ଦିଗ ଉପରେ ଦୁଇ ଦିନ ଧରି ଆଲୋଚନା କରାଯାଇଥିଲା । ଆଉ ଏସବୁ ଭିତରେ ବର୍ତମାନ କଂଗ୍ରେସରୁ ନିର୍ବାଚିତ ହୋଇଥିବା ବିଧାୟକମାନେ ନିଜର ସାଂଗଠନିକ ସ୍ଥିତି ଏବଂ କାହିଁକି ଛିଡ଼ା ହେବେ ସେନେଇ ଅବଗତ କରିବେ । ହେଲେ କେବେ ଏହି ଚୁଡ଼ାନ୍ତ ପ୍ରାର୍ଥୀ ତାଲିକା ବିଧିବଦ୍ଧ ଭାବରେ ଘୋଷଣା ହେବ ସେ ନେଇ କୌଣସି ସ୍ପଷ୍ଟ ସୂଚନା ମିିିଳି ନାହିଁ । ଭୁବନେଶ୍ୱରରେ ପ୍ରସ୍ତୁତ ହୋଇଥିବା ଏହି ତାଲିକା ଦିଲ୍ଲୀ ଯିବ । କେନ୍ଦ୍ରୀୟ ନିର୍ବାଚନ କମିଟିର ମୋହର ପରେ ଦଳୀୟ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ପାଖକୁ ଯିବ । ଆଉ ରାହୁଲ ଗାନ୍ଧୀଙ୍କ ଅନୁମୋଦନ ପରେ ଘୋଷଣା ହେବ କଂଗ୍ରେସ ପ୍ରାର୍ଥୀଙ୍କ ନାଁ ।
ଏପଟେ ମୁଖ୍ୟମନ୍ତ୍ରୀଙ୍କ ସହ ନବ ଦାସଙ୍କ ପରିବାର ଲୋକଙ୍କ ଫୋଟୋ ଭାଇରାଲ ହେଉଥିବା ବେଳେ ସ୍କ୍ରିିନିଂ କମିଟି ବୈଠକରେ ଝାରସୁଗଡ଼ା ବିଧାୟକ ତଥା କାର୍ଯ୍ୟକାରୀ ସଭାପତିଙ୍କ ଅନୁପସ୍ଥିତି ଅନେକ ଚର୍ଚ୍ଚା ସୃଷ୍ଟି କରିଥିଲା । ହେଲେ ସେ ବିଜେଡିରେ ଯୋଗ ଦେଉ ନାହାନ୍ତି ବୋଲି ଟ୍ୱିଟ୍ ଜରିଆରେ ଖଣ୍ଡନ କରିଛନ୍ତି ନବ ଦାସ । ଆଉ ଏସବୁ ଭିତରେ ଅପେକ୍ଷା କଂଗ୍ରେସ ପ୍ରାର୍ଥୀ ତାଲିକାର ବିଧିବଦ୍ଧ ଘୋଷଣାକୁ ।
ଗୋଟିଏ ପଟେ ନିର୍ବାଚନ ପାଇଁ କସରତ ଚାଲିଥିବା ବେଳେ ଅନ୍ୟପଟେ ଦଳର ସାଧାରଣ ସଂପାଦକ ପଦରୁ ଇସ୍ତଫା ଦେଇଛନ୍ତି କୋରାପୁଟ ବିଧାୟକ କୃଷ୍ଣ ଚନ୍ଦ୍ର ସଗରିଆ । ତାଙ୍କ ବିରୋଧରେ ଷଡଯନ୍ତ୍ର ଚାଲିଥିବା ସେ ଅଭିଯୋଗ କରିଛନ୍ତି । ତେବେ ଦଳ ଛାଡ଼ିବା ଭଳି ନିଷ୍ପତି ନେଇ ନଥିବା କହିଛନ୍ତି କୃଷ୍ଣ ସଗରିଆ ।