ପୁଣି ଥରେ କଂଗ୍ରେସକୁ ଲାଗିବ ଗୁଲାମ ଝଟକା । ଜମ୍ମୁ-କାଶ୍ମୀରରେ ଏକାଥରକେ ଇସ୍ତଫା ଦେଇପାରନ୍ତି ୫୧ କଂଗ୍ରେସ ନେତା, ଆଜାଦଙ୍କ ଦଳରେ ହେବେ ସାମିଲ ।
କନକ ବ୍ୟୁରୋ : ଗୁଲାମନବୀ ଆଜାଦ କଂଗ୍ରେସରୁ ଇସ୍ତଫା ଦେଇ ଦଳକୁ ବଡ ଝଟକା ଦେଇଥିଲେ । ଆଉ ଏବେ ପୁଣିଥରେ ଜମ୍ମୁୁ-କାଶ୍ମୀରରେ କଂଗ୍ରେସକୁ ଲାଗିବାକୁ ଯାଉଛି ବଡ ଝଟକା । କାରଣ ଜମ୍ମୁ-କାଶ୍ମୀର କଂଗ୍ରେସ ରାଜନୀତିରେ ସବୁଠୁ ବଡ ଚେହେରା କୁହାଯାଉଥିବା ଗୁଲାମନବୀଙ୍କ ରାସ୍ତା ଆପଣାଇବାକୁ ମନସ୍ଥିର କରିଛନ୍ତି ଅନେକ କଂଗ୍ରେସ ନେତା ଓ କର୍ମୀ । ଜମ୍ମୁ-କାଶ୍ମୀରର ପୂର୍ବତନ ଉପ-ମୁଖ୍ୟମନ୍ତ୍ରୀ ତାରା ଚ. ପୂର୍ବ ମନ୍ତ୍ରୀ ମାଜିଦ ୱାନି, ମନୋହର ଲାଲ ଶର୍ମାଙ୍କ ସମେତ ୫୧ରୁ ଅଧିକ ନେତା ଖୁବଶୀଘ୍ର କଂଗ୍ରେସର ହାତ ଛାଡିପାରନ୍ତି । ଆଉ କଂଗ୍ରେସ ଛାଡିବାକୁ ମନସ୍ଥିର କରିଥିବା ଏହି ନେତା ମାନେ ଖୁବଶୀଘ୍ର ଆଜାଦ ଘୋଷଣା କରିବାକୁ ଥିବା ଦଳରେ ଯୋଗଦେବେ ।
Kanak News is now on WhatsApp
Join and get latest news updates delivered to you via WhatsApp
ଦୀର୍ଘ ଦିନ ଧରି କଂଗ୍ରେସ ନେତୃତ୍ୱଙ୍କ ଉପରେ ନାରାଜ ଥିବା ଗୁଲାମନବୀ ଗତ ସପ୍ତାହରେ ଦଳରୁ ଇସ୍ତଫା ଦେଇଥିଲେ । କଂଗ୍ରେସ ନେତୃତ୍ୱଙ୍କ ଉପରେ ଅସନ୍ତୁଷ୍ଟ ଥିବା ଜି-୨୩ ଗ୍ରୁପରେ ସାମିଲ ଥିଲେ ଗୁଲାମନବୀ । କଂଗ୍ରେସ ଦଳରେ ଅନେକ ପରିବର୍ତ୍ତନ ଆବଶ୍ୟକ ବୋଲି କହିବା ଦଳର ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଚିଠି ମଧ୍ୟ ଲେଖିଥିଲା ଜି-୨୩ ଗ୍ରୁପ୍ । ଆଉ ଏହାପର ଠାରୁ ଜି-୨୩ ଗ୍ରୁପ୍ ଓ କଂଗ୍ରେସର ଶୀର୍ଷ ନେତୃତ୍ୱଙ୍କ ମଧ୍ୟରେ ଏକ ଶୀତଳଯୁଦ୍ଧ ଆରମ୍ଭ ହୋଇଥିବା ନେଇ ଚର୍ଚ୍ଚା ହୋଇଥିଲା । ଏପରିକି ଜି-୨୩ ଗ୍ରୁପର ନେତା ମାନେ ଗୁଲାମନବୀଙ୍କ ଇସ୍ତଫା ପରେ ମଧ୍ୟ କଂଗ୍ରେସ ନେତୃତ୍ୱଙ୍କୁ ଟାର୍ଗେଟ କରିବାକୁ ପଛାଇ ନାହାନ୍ତି । କଂଗ୍ରେସରେ ବଡ ପରିବର୍ତ୍ତନର ଆବଶ୍ୟକତା ରହିଛି ବୋଲି ବାରମ୍ବାର କହି ଆସିଛି ଏହି ସମୂହ ।
ଗୁଲାମନବୀ ଇସ୍ତଫା ଦେବା ପରେ ବିଜେପିରେ ସାମିଲ ହେବା ନେଇ ଚର୍ଚ୍ଚା ହେଉଥିଲା । କିନ୍ତୁ ଏଥିରେ ପୂର୍ଣ୍ଣଚ୍ଛେଦ ପକାଇ ଗୁଲାମନବୀ କହିଛନ୍ତି, ଖୁବଶୀଘ୍ର ନିଜର ଏକ ଦଳ ଗଢିବି ଏବଂ ଜମ୍ମୁ-କାଶ୍ମୀରର ବିଧାନସଭା ନିର୍ବାଚନକୁ ଓହ୍ଲାଇବୁ ।