ତେଲେଙ୍ଗାନାରେ ବିଶ୍ୱର ସବୁଠାରୁ ବଡ ମନ୍ଦିର: କଳା ଗ୍ରାନାଇଟ ପଥରରେ ତିଆରି ହୋଇଛି, ଲାଗିଛି ୧୪୦ କେଜି ସୁନା
କନକ ବ୍ୟୁରୋ: ଆମ ଦେଶରେ ଅନେକ ଦେବାଦେବୀଙ୍କ ମନ୍ଦିର ରହିଛି । ଯାହାର ଇତିହାସ ବହୁତ ପୁରୁଣା । ଆମେ ଆଜି ଆପଣଙ୍କ ସେମିତି ଏକ ମନ୍ଦିର ବିଷୟରେ କହିବୁ ଯାହାର ଇତିହାସ ହଜାର ବର୍ଷର ପୁରୁଣା । ଆଉ ଯାହାକୁ ତିଆରି କରିବାକୁ ପ୍ରାୟ ୧୨ ଶହ କୋଟି ଟଙ୍କା ଖର୍ଚ୍ଚ କରିଛନ୍ତି ସରକାର । ଯାହାକି ବର୍ତ୍ତମାନ ବିଶ୍ୱର ସବୁଠାରୁ ବଡ ମନ୍ଦିର ଭାବେ ଠିଆ ହୋଇଛି । ଏହାସହ ମନ୍ଦିରରେ ୧୪୦ କିଲୋ ସୁନା ବ୍ୟବହାର ହୋଇଛି । ଯେଉଁଥିରୁ କେବଳ ୧୨୫ କିଲୋ ସୁନା ଗର୍ଭଗୃହସ୍ଥ ଗମ୍ବୁଜରେ ବ୍ୟବହାର ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ତେଲେଙ୍ଗାନାରେ ନିର୍ମିତ ହୋଇଥିବା ଲକ୍ଷ୍ମୀ ନୃସିଂହଙ୍କ ଏହି ଭବ୍ୟ ମନ୍ଦିରକୁ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଉଦଘାଟନ କରିଛନ୍ତି । ଏହାକୁ ବର୍ତ୍ତମାନ ଶ୍ରଦ୍ଧାଳୁଙ୍କ ପାଇଁ ମଧ୍ୟ ଖୋଲିଦିଆଯାଇଛି । ଗତ ଶହେ ବର୍ଷ ମଧ୍ୟରେ କଳା ଗ୍ରାନାଇଟ ପଥରରେ ତିଆରି ହୋଇଥିବା ଏହା ବିଶ୍ୱର ସବୁଠାରୁ ବଡ ମନ୍ଦିର । ଏହା ସୌନ୍ଦର୍ଯ୍ୟରେ ବଡବଡ ମହଲକୁ ମଧ୍ୟ ଫିକା କରିଦେବ । ଏଠାରେ କଳା ଗ୍ରାନାଇଟ ପଥରକୁ ଏଭଳି ଭାବେ ଲଗାଯାଇଛି ଯାହା ହଜାରେ ବର୍ଷ ପର୍ଯ୍ୟନ୍ତ କୌଣସି କ୍ଷତି ହେବ ନାହିଁ ।
ତେଲେଙ୍ଗାନାର ୟଦାଦ୍ରି ଭୁବନଗିରି ଜିଲ୍ଲାରେ ଥିବା ଭଗବାନ ନୃସିଂହଙ୍କ ଏହି ମନ୍ଦିର ହଜାରେ ବର୍ଷ ପୁରୁଣା । ୫୧୦ ଫୁଟ ଉଚ୍ଚ ପାହାଡରେ ଭଗବାନ ନୃସିଂହ ବିରାଜମାନ କରିଛନ୍ତି । ଆନ୍ଧ୍ରପ୍ରଦେଶଠାରୁ ତେଲେଙ୍ଗାନା ଅଲଗା ହେବା ପରେ ସରକାର ଏହି ମନ୍ଦିରକୁ ଭବ୍ୟ ବନାଇବାକୁ ବିଚାର କରିଥିଲେ । ଆନ୍ଧ୍ର ଓ ତାମିଲନାଡୁର ୫୦୦ ମୂର୍ତ୍ତିକାରଙ୍କୁ ଏହି ମନ୍ଦିର କାମରେ ନିୟୋଜିତ କରାଯାଇଥିଲା । ଏମାନେ ୪ ବର୍ଷ ପର୍ଯ୍ୟନ୍ତ ରହି ମନ୍ଦିର ନିର୍ମାଣ କରିଥିଲେ । ୨୦୧୬ରୁ ମନ୍ଦିର କାମ ଆରମ୍ଭ ହୋଇଥିଲା ।
ଏହି ମନ୍ଦିର ନିର୍ମାଣରେ ଆଦୌ ସିମେଣ୍ଟର ବ୍ୟବହାର କରାଯାଇନାହିଁ । ପଥର ଯୋଡିବା ପାଇଁ ବାଲି ସିମେଣ୍ଟ ବଦଳରେ ଚୂନ ପଥର ବ୍ୟବହାର କରାଯାଇଥିଲା । ଗୁଡ, ଘିକୁଆଁରୀ, ଚୂନ, ନଡିଆକତା ଆଦିରୁ ପ୍ରସ୍ତୁତ ୧୦ ହଜାର ମେଟ୍ରିକ ଟନ ଲାଇମ ମୋର୍ଟାର ଲଗାଯାଇଥିଲା ପରୀକ୍ଷାଗାରରେ ଏହାର ଅସ୍ତିତ୍ୱ ପରୀକ୍ଷା କରାଯାଇଥିଲା । ଏହା ସିମେଣ୍ଟ ଅପେକ୍ଷା ଅନେକ ଗୁଣ ମଜବୁତ ଓ ଖର୍ଚ୍ଚ ୪୦ ଗୁଣ କମ ବୋଲି ଜଣାପଡିଛି । ମନ୍ଦିର ଭିତରେ ପାହଚ ମଧ୍ୟ ପଥରରେ ନିର୍ମାଣ କରାଯାଇଛି । କଳା ଗ୍ରାନାଇଟ ପଥର ଯୋଗୁଁ ଏହା ମନ୍ଦିରକୁ ଶୀତ ଦିନେ ଗରମ ଓ ଗରମ ଦିନେ ଥଣ୍ଡା ରଖିବ ।