ଲାଲଗଡ଼ରେ ପୁଲିସର ପ୍ରଚଣ୍ଡ ପାହାର ! ଛତିଶଗଡ ବିଜାପୁର ଜଙ୍ଗଲରେ ବଡ଼ ଧରଣର ଏନକାଂଉଟର, ୬ ମହିଳା ମାଓବାଦୀଙ୍କ ସମେତ ଟଳିପଡିଲେ ୧୨ ମାଓବାଦୀ
କନକ ବ୍ୟୁରୋ : ଲାଲବାହିନିକୁ ଜବରଦସ୍ତ ଝଟକା । ଜଙ୍ଗଲ ଭିତରେ ଲୁଚି ରହିଥିବା ମାଓବାଦୀଙ୍କୁ ଖୋଜି ମାରିଲା ପୁଲିସ୍ । ମାଲକାନଗିରି ସୀମାନ୍ତ ଛତିଶଗଡରେ ବଡ ଧରଣର ମାଓ ବିରୋଧୀ ଅପରେସନ । ତେଲେଙ୍ଗାନା ଓ ଛତିଶଗଡ ପୁଲିସର ମିଳିତ ଅଭିଯାନରେ ଟଳିପଡିଛନ୍ତି ୧୨ ମାଓବାଦୀ । ବସ୍ତରରେ ମାଓ ବିରୋଧୀ ଅପରେସନକୁ ଜୋରଦାର କରିବା ପରେ ବିଜାପୁର ପୂଜାରୀ କାଙ୍କେର ଜଙ୍ଗଲରେ ଛପି ରହିଥିଲେ ମାଓବାଦୀ । ଗୁଇନ୍ଦା ସୂଚନା ଆଧାରରେ ଆଜି ଭୋରରୁ ଆରମ୍ଭ ହୋଇଥିଲା ବିରାଟ ଅପରେସନ୍ । ଏଥିରେ ତେଲେଙ୍ଗାନା ମାଓ ମୁଖ୍ୟ ଜଗନକୁ ଏନକାଂଉଟର କରିଛି ସୁରକ୍ଷାବାହିନୀ । ସେପଟେ ଅପରେସନରେ ଜଣେ ଗ୍ରେହାଉଣ୍ଡ କନେଷ୍ଟବଳ ମଧ୍ୟ ସହୀଦ୍ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଓଡିଶାର ମାଲକାନଗିରି ସୀମାନ୍ତରୁ ପ୍ରାୟ ଶହେ କିଲୋମିଟର ଦୂର ଛତିଶଗଡର ପୂଜାରୀକାଙ୍କେର ଜଙ୍ଗଲରେ ବଡଧରଣର ମାଓ ବିରୋଧୀ ଅପରେସନ୍ । ମାଓବାଦୀମାନେ ଜଙ୍ଗଲରେ ଲୁଚି ରହିଥିବା ଗୁଇନ୍ଦା ସୂଚନାକୁ ଆଧାର କରି ଆରମ୍ଭ ହୋଇଥିଲା ଅପରେସନ୍ । ତିନିପଟୁ ଘେରିଯାଇଥିଲେ ସୁରକ୍ଷାକର୍ମୀ । ଅପରେସନରେ ସାମିଲ ହୋଇଥିଲେ ସ୍ୱତନ୍ତ୍ର ପ୍ରଶିକ୍ଷଣପ୍ରାପ୍ତ ଗ୍ରେହାଉଣ୍ଡ ପୋଲିସ, ଏସଟିଏଫ ଓ ଡିଆରଜି ଫୋର୍ସ । ଶୁକ୍ରବାର ସକାଳୁ ଆରମ୍ଭ ହଇଥିବା ଏହି ଏନକାଉଂଟରରେ ଟଳି ପଡିଥିଲେ ୬ ମହିଳା କ୍ୟାଡର ମାଓବାଦୀଙ୍କ ସମେତ ୧୨ଜଣ । ଏମାନଙ୍କ ଭିତରେ ବି ଅଛି ମାଓ ନେତା ହରିଭୂଷଣ । ଆନ୍ଧ୍ରଠାରୁ ଅଲଗା ହୋଇ ତେଲେଙ୍ଗାନା ସ୍ୱତନ୍ତ୍ର ପ୍ରଦେଶ ହେବା ଦିନରୁ ଏଠାରେ ମାଓ ସଂଗଠନର ନେତୃତ୍ୱ ନେଉଥିଲା ହରିଭୂଷଣ ଓରଫ ଜଗନ୍ । ମିଳିତ ଅପରେସନରେ ଜଗନର ମୁଣ୍ଡ ଗଡିବା ପୋଲିସର ବଡ ସଫଳତା ବୋଲି କୁହାଯାଉଛି । ମାଓ କମାଣ୍ଡର ଲାଛନା ଓ ଛୁକା ରାଓର ମଧ୍ୟ ମୃତ୍ୟୁ ହୋଇଥିବା ଅନୁମାନ କରାଯାଉଛି । ଆଉ କେତେକ ମାଓବାଦୀ ଖସିଯାଇଥିବା ଅନୁମାନ କରି ଦିନତମାମ କମ୍ବିଂ ଅପରେସନ କରିଛି ମିଳିତ ପୋଲିସ ବାହିନୀ ।
ଘଟଣାସ୍ଥଳରୁ ଏକେ-୪୭ ସହ ୫ଟି ବନ୍ଧୁକ, ଗୋଟିଏ ସ୍କାନର, ଗୋଟିଏ ଲାପଟପ, ବିସ୍ଫୋରକ, ମାଓ ସାମଗ୍ରୀ ଓ ୪୧ ହଜାର ଟଙ୍କା ଜବତ ହୋଇଛି । ମାଓ ବିରୋଧୀ ଅପରେସନରେ ଜଣେ ଗ୍ରେ ହାଉଣ୍ଡ କନେଷ୍ଟବଳ ସୁଶୀଲ କୁମାର ସହିଦ ହୋଇଥିବାବେଳେ ଅନ୍ୟ ତିନିଜଣ ଆହତ ହୋଇଥିବା ସୂଚନା ମିଳିଛି । ଏମାନଙ୍କୁ ଏୟାରଲିଫ୍ଟ କରି ଭଦ୍ରାଚଳମରେ ହସ୍ପିଟାଲରେ ଭର୍ତ୍ତି କରାଯାଇଛି ।