କନକ ବ୍ୟୁରୋ : ୨୦୨୩ ବିଶ୍ୱକପ୍ ପୂର୍ବରୁ ୨ଥର ବିଶ୍ୱ ଚମ୍ପିଆନ ହୋଇଥିବା ୱେଷ୍ଟଇଣ୍ଡିଜ ଟିମକୁ ବଡ ଝଟକା ଲାଗିଛି । ୨୦୨୩ ବିଶ୍ୱକପରୁ ବିଦା ହୋଇଛି ୱେଷ୍ଟଇଣ୍ଡିଜ୍ ଟିମ୍ । ବିଶ୍ୱ କ୍ରିକେଟରେ ପାଖାପାଖି ୩୦ ବର୍ଷ ରାଜ୍ କରିଥିବା ୱେଷ୍ଟଇଣ୍ଡିଜ ଟିମ୍ ୨ ଥର ବିଶ୍ୱକପ ଜିତିବାରେ ସଫଳ ହୋଇଥିଲା । ୧୯୭୫ ଓ ୧୯୭୯ରେ ୱେଷ୍ଟଇଣ୍ଡିଜ ଟିମ୍ ବିଶ୍ୱକପ୍ ଜିତିଥିବା ବେଳେ ୧୯୮୩ରେ ଫାଇନାଲରେ ପହଂଚିଥିଲା । କେବଳ ଏକଦିବସୀୟ ନୁହେଁ ୱେଷ୍ଟଇଣ୍ଡିଜ ଟିମ ୨ଥର ଟି-୨୦ ବିଶ୍ୱକପ ମଧ୍ୟ ଜିତିଛି । ଯଦି ବିଶ୍ୱକପ କଥା କହିବା ତେବେ ଅଷ୍ଟ୍ରେଲିଆ ପରେ ସବୁଠାରୁ ଅଧିକ ସଫଳ ହୋଇଥିବା ଟିମ୍ ହେଉଛି ୱେଷ୍ଟଇଣ୍ଡିଜ କ୍ରିକେଟ ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ୨୦୨୩ ବିଶ୍ୱକପ ଖେଳିବା ପୂର୍ବରୁ ୱେଷ୍ଟଇଣ୍ଡିଜ ଟମକୁ ଆଇସିସିର ଏକଦିବସୀୟ ବିଶ୍ୱକପ କ୍ୱାଲିଫାୟର ମ୍ୟାଚ ଖେଳିବାକୁ ପଡିଥିଲା । ଗୋଟିଏ ସମୟରେ ବିଶ୍ୱର ମଜବୁତ କ୍ରିକେଟ ଟିମ୍ ଭାବେ ପରିଗଣିତ ହେଉଥିବା ଏହି ଟିମ୍ କିନ୍ତୁ କ୍ୱାଲିଫାୟରରେ ଭଲ ପ୍ରଦର୍ଶନ କରିପାରି ନଥିଲା । ପ୍ରଥମେ ଜିମ୍ବାୱେ ଓ ପରେ ନେଦରଲ୍ୟାଣ୍ଡ ଠାରୁ ପରାଜିତ ହୋଇଥିଲା । ଏହାପରେ ବି ୱେଷ୍ଟଇଣ୍ଡିଜ ଟିମ୍ ସୁପର ସିକ୍ସରେ ସ୍ଥାନ ପାଇଥିଲା । ହେଲେ ସେଠାରେ ବି ସ୍କଟଲ୍ୟାଣ୍ଡ ଠାରୁ ପରାଜିତ ହୋଇଥିଲା । ଏହି ପରାଜୟ ପରେ ଆଇସିସିର ନିୟମ ମୁତାବକ ୱେଷ୍ଟଇଣ୍ଡିଜ ଟିମ୍ ୨୦୨୩ ବିଶ୍ୱକପରୁ ବାଦ ପଡିଛି ।
ୱେଷ୍ଟଇଣ୍ଡିଜ ଟିମର ଏଭଳି ଖରାପ ପ୍ରଦର୍ଶନ ପଛରେ କଣ ରହିଛି କାରଣ । ଏନେଇ କ୍ରିକେଟ ବିଶ୍ଳେଷକଙ୍କ ମତ ହେଉଛି କି ୨୦୦୦ ମସିହାରୁ ୱେଷ୍ଟଇଣ୍ଡିଜ କ୍ରିକେଟ ବୋର୍ଡ ତାର ଖେଳାଳୀଙ୍କୁ ମ୍ୟାନେଜ କରିବାରେ ବିଫଳ ହୋଇଛି । ଖେଳାଳୀ ଚୟନ ବେଳେ ବୋର୍ଡ ଭେଦଭାବ କରୁଥିବା ନେଇ ବିଭିନ୍ନ ସମୟରେ ଖବର ଆସିଛି । ଏହାସହ ଯଦି କୌଣସି ଭଲ ଖେଳାଳୀ ଅଧିକ ଟଙ୍କା ଓ ସୁବିଧା ମାଗୁଥିଲା ତାକୁ ଦଳରୁ ବୋର୍ଡ ବିଦା କରୁଥିଲା । ଏହାସହ ବୋର୍ଡ କିମ୍ବା ଷ୍ଟାର ଖେଳାଳୀଙ୍କ ବିରୋଧରେ ବୟାନ ଦେଉଥିବା ଖେଳାଳୀଙ୍କୁ ମଧ୍ୟ ବୋର୍ଡ ଟିମରେ ସାମିଲ କରୁନଥିଲା ।