କନକ ବ୍ୟୁରୋ: ପୂର୍ବରୁ ଖରାଦିନ ଛୁଟିରେ ପିଲାମାନେ, ଯେମିତି ବୁଲୁଥିଲେ, ଏଣିକି ଆଉ ସେମିତି ବୁଲି ପାରିବେନି । ପିଲାମାନେ ଅବସର ସମୟକୁ କେମିତି ଉପଯୁକ୍ତ ଭାବରେ ବିନିଯୋଗ କରିପାରିବେ, ପାଠ ସହ ଯୋଡି ହୋଇ ରହିବେ, ସେଥିପାଇଁ ସେମାନଙ୍କୁ ହୋମୱାର୍କ ଦିଆଯାଇଛି । ଅଭିଭାବକମାନଙ୍କୁ ଏକ ବୁକଲେଟ୍ ଦିଆଯାଇଛି । ଯେଉଁଥିରେ ରହିଛି, ପିଲାଙ୍କ ଦକ୍ଷତା ଓ କୌଶଳର ଅଭିବୃଦ୍ଧି ପାଇଁ ବିଭିନ୍ନ କାର୍ଯ୍ୟସୂଚୀ । ନବମ ଶ୍ରେଣୀ ପାଇଁ ଦିଆଯାଇଥିବା ବୁକଲେଟରେ ରହିଛି ବିଭିନ୍ନ ପ୍ରକାରର ଅଭ୍ୟାସ ପ୍ରଶ୍ନ ସାଂଗକୁ ପିଲାମାନେ କଣ ପଢ଼ିବେ, କେମିତି ପଢ଼ିବେ ସେଥିପାଇଁ ପରାମର୍ଶ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ପିଲାମାନଙ୍କ ଭିତରେ ସ୍ମାର୍ଟଫୋନ ବ୍ୟବହାର ବଢ଼ି ବଢ଼ି ଚାଲିଥିବାରୁ, ତାକୁ କେମିତି ନିୟନ୍ତ୍ରଣରେ ରଖାଯାଇପାରିବ ସେଥିପାଇଁ ଅଭିଭାବକମାନଙ୍କୁ ସଚେତନ କରାଯାଇଛି । କୁହାଯାଇଛି, ଛୁଟି ସମୟରେ ପିଲାମାନଙ୍କର ମୋବାଇଲ ବ୍ୟବହାର ବଢ଼ିବ । ତେଣୁ ମୋବାଇଲ ଜରିଆରେ ଯେମିତି ସେମାନେ ସାଇବର ଠକାମିର ଶିକାର ନହୁଅନ୍ତି ତା ଉପରେ ନଜର ଦେବେ । ବିଶେଷକରି ପିଲାମାନେ କଉଁ ଆପ୍ ବ୍ୟବହାର କରୁଛନ୍ତି, କଣ ଦେଖୁଛନ୍ତି, କେଉଁ ଅଜଣା ଲୋକଙ୍କ ସହ କଥା ହେଉଛନ୍ତି, ତା ଉପରେ ନଜର ରଖିବାକୁ ଅଭିଭାବକଙ୍କୁ ପରାମର୍ଶ ଦିଆଯାଇଛି ।
ଛୁଟିବେଳେ ପିଲାମାନେ କେମିତି ପଢ଼ୁଛନ୍ତି, କଣ ପଢ଼ୁଛନ୍ତି ତାହା ମନିଟରିଂ କରିବେ ଶିକ୍ଷକ । କୌଣସି ପାଠ ବୁଝିନପାରିଲେ, ଶିକ୍ଷକମାନଙ୍କୁ ଫୋନ କରି ସହାୟତା ନେଇପାରିବେ । ଏପରିକି ଶିକ୍ଷକମାନେ ହ୍ୱାଟ୍ସଆପ୍ ଗ୍ରୁପ ମାଧ୍ୟମରେ ପିଲାମାନଙ୍କୁ ଅବୁଝା ରହିଯାଇଥିବା ପାଠ ବୁଝାଇବେ । ଶିକ୍ଷକମାନେ, ପିଲାମାନଙ୍କୁ ଫୋନ କରି କେତେ ପଢ଼ୁଛନ୍ତି, ତାହା ବୁଝିବେ । ଆବଶ୍ୟକ ପଡିଲେ ଘରକୁ ଯାଇ ବୁଝାଇବେ ।
ଗ୍ରୀଷ୍ମ ଛୁଟି ପରେ ଏବେ ଅଧିକାଂଶ ଘରୋଇ ବିଦ୍ୟାଳୟ ଅନଲାଇନ କ୍ଲାସ ଉପରେ ଗୁରୁତ୍ୱ ଦେଉଛନ୍ତି । ଯାହାକୁ ଦୃଷ୍ଟିରେ ରଖି ସରକାରୀ ସ୍କୁଲ ପିଲାମାନେ ବି ଯେମିତି ପଛରେ ପଡି ନଯାନ୍ତି,ସେଥିପାଇଁ ଏହି ଯୋଜନା ଆରମ୍ଭ କରିଛି ଗଣଶିକ୍ଷା ବିଭାଗ ।