କନକ ବ୍ୟୁରୋ: ୮୦ ବର୍ଷର ବୃଦ୍ଧା ବର୍ଷାରେ ଭିଜୁଥିଲେ ଏବଂ କଇଁକଇଁ ହୋଇ କାନ୍ଦୁଥିଲେ । ଏହା କିଛି ସହୃଦୟ ଲୋକଙ୍କ ଆଖିରେ ପଡିଥିଲା ଏବଂ ସେମାନେ ପୁଲିସକୁ ଖବର ଦେଇଥିଲେ । ତୁରନ୍ତ ଜଣେ ଥାନାଧିକାରୀ ଆସି ଘଟଣା ସ୍ଥଳରେ ପହଞ୍ଚିଥିଲେ ଏବଂ ବୃଦ୍ଧାଙ୍କୁ ପ୍ରଥମେ ଖାଇବାକୁ ଦେଇ ହସ୍ପିଟାଲ ନେଇଥିଲେ । ସେଠାରେ ତାଙ୍କର ସ୍ୱାସ୍ଥ୍ୟାବସ୍ଥା ପରୀକ୍ଷା କରାଇ ପଚରାଉଚୁରା କରିଥିଲେ । ଆଉ ଯାହା ଶୁଣିଥିଲେ ସେଥିରେ ପାଖରେ ଥିବା ଅନ୍ୟ ପୁଲିସ କର୍ମୀଙ୍କ ଆଖି ବି ଓଦା ହୋଇଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ବୃଦ୍ଧା ଜଣକ ହେଉଛନ୍ତି ଉତ୍ତରପ୍ରଦେଶ ହରଦୋଇ ଜିଲ୍ଲା ସୁରସା ଥାନା ଅଧିନରେ ଥିବା ଖରଜୁରହା ଗାଁର ରାମବେଟି ମିଶ୍ରା । ତାଙ୍କ ସ୍ୱାମୀ ହେଉଛନ୍ତି ରାମବାହାଦୁର ମିଶ୍ରା । ତାଙ୍କର ୨ ପୁଅ ଓ ଗୋଟିଏ ଝିଅ । ସମସ୍ତେ ବିବାହିତ । ସ୍ୱାମୀ କେବେଠୁ ଆରପାରିକୁ ଚାଲିଗଲେଣି । ଆଉ ତା’ ପରେ ବୃଦ୍ଧାଙ୍କ ଦୁଃଖ । ପୁଅମାନେ ଘରଦ୍ୱାର ବିକି ମା’କୁ ଅସହାୟ ଅବସ୍ଥାରେ ଛାଡିଦେଇ କେଉଁଆଡେ ଚାଲିଯାଇଛନ୍ତି ଯେ ତାଙ୍କର ଠିକଣା ମିଳୁନି । ଏପରି ଅବସ୍ଥାରେ ମା’ ଭିକାରୀ ଭଳି ରାସ୍ତାରେ ଘୁରି ବୁଲୁଛି । ଏହା ଜାଣିବା ପରେ କୃଷ୍ଣାନଜର ପୁଲିସ ତାଙ୍କୁ ଉଦ୍ଧାର କରିଛି । ପୁଅମାନଙ୍କ ସହ କିଛି ଯୋଗାଯୋଗ ହୋଇନପାରିବାରୁ ଝିଅ ସହ ଯୋଗାଯୋଗ କରିଥିଲା । ହେଲେ ମା’କୁ ରଖିପାରିବ ନାହିଁ ବୋଲି ଝିଅ ରୋକଠୋକ୍ ମନାକରିଦେବାରୁ ଏକ ବୃଦ୍ଧାଶ୍ରମରେ ବୃଦ୍ଧାରାମବେଟିଙ୍କୁ ସ୍ଥାନାନ୍ତର କରିଛି ପୁଲିସ ।