ଖାଉଟିଙ୍କ ପକେଟ୍ ଖାଲି କରୁଛି ଡାଲି ଦର । ଉତ୍ପାଦନ କମିଛି, ଦର ବୃଦ୍ଧି ପାଉଛି । ପରିଚାଳନାଗତ ତ୍ରୁଟି ପାଇଁ ଡାଲି ଦର ବଢୁଥିବା ଅଭିଯୋଗ
କନକ ବ୍ୟୁରୋ : ଖୋଲା ବଜାରରେ ହରଡ ଡାଲି ମୂଲ୍ୟ କିଲୋ ପିଛା ୧୪୫ ରୁ ୧୫୦ ଟଙ୍କାରେ ବିକ୍ରୀ ହେଉଛି । ୬ମାସ ଭିତରେ ଡାଲି କିଲୋ ପିଛା ୪୦ଟଙ୍କା ବୃଦ୍ଧି ଘଟିଛି। ଚଳିତ ବର୍ଷ ଦେଶରେ ଡାଲି ଉତ୍ପାଦନ ୧୦ ପ୍ରତିଶତ କମିଛି । ତେଣୁ ଗୋଦାମରେ ଡାଲି ଅଭାବ ଦେଖା ଦେଉଛି । ଡାଲି ଭିତରେ ସବୁଠୁ ଅଧିକ ଚାହିଦା ହରଡ ଡାଲିର ରହିଛି । ଏହାର ସିଧା ପ୍ରଭାବ ଖାଉଟିମାନଙ୍କୁ ଉପରେ ପଡୁଛି। ଗତ ଜାନୁଆରୀ ମାସରେ ଡାଲିର ପାଇକାରୀ ଦର କିଲୋ ପିଛା ୧୦୦ ଟଙ୍କା ଥିଲା ଏହା ଖୋଲା ବଜାରରେ ୧୦୪ ରୁ ୧୧୦ ଟଙ୍କାରେ ବିକ୍ରୀ ହେଉଥିଲା । କ୍ରମେ ପ୍ରତିମାସରେ ୧୦ ରୁ ୧୨ ଟଙ୍କା ବୃଦ୍ଧି ପାଇ ଏବେ ୧୫୦ରେ ପହଞ୍ଚିଛି । ଡାଲି କିଣିବା ବେଳେ ଲୋକଙ୍କୁ ଡର ଲାଗୁଛି। ଯେଉଁ ଲୋକ ଏକ କିଲୋ ଡାଲି ନେଉଥିଲେ ଏବେ ସେମାନେ ଅଧକିଲୋ ନେଉଛନ୍ତି । ଗରିବ ଲୋକ ଡାଲି ଖାଇବା ଭଳି ଦର ହେବା ଆବଶ୍ୟକ । ଡାଲି କିଣିବା ବେଳେ ପ୍ରବଳ ବାଧୁଥିବା କହୁଛନ୍ତି ଗ୍ରାହକ । ଏବେ ଡାଲି କିଣିକି ପିଲାଙ୍କୁ ଖୁଆଇବା ଗରିବଙ୍କ ପାଇଁ ସ୍ବପ୍ନ ହୋଇଯିବ । ଡାଲି ଯେପରି ସବୁ ଶ୍ରେଣୀର ଲୋକ କିଣି ପାରିବେ ସରକାର ସେଭଳି ଦର ନିର୍ଦ୍ଧାରିତ କରିବା ଉଚିତ୍।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ବ୍ୟବସାୟୀଙ୍କ କହିବା କଥା ଗୋଦାମରେ ଡାଲି ଷ୍ଟକ୍ ନଥିବାରୁ ଦର ବୃଦ୍ଧି ହେଉଛି । ହରଡ ଡାଲି କିଲୋ ପିଛା ୪୦ ରୁ ୪୫ ଟଙ୍କା ବୃଦ୍ଧି ପାଇଛି ଫଳରେ ଡାଲି ଦର କିଲୋ ପିଛା ୧୫୦ ରେ ପହଞ୍ଚିଛି । ଡାଲି ଦର ବୃଦ୍ଧି ଯୋଗୁଁ ଖାଉଟି ବେଶି ଡାଲି କିଣୁ ନାହାନ୍ତି । ଫଳରେ ଡାଲି ବ୍ୟବସାୟ ମାନ୍ଦା ହେବାରେ ଲାଗୁଛି । ଯେଉଁ ବ୍ୟବସାୟୀଙ୍କ ଦିନକୁ ୨୦୦ କିଲୋ ଡାଲି ବିକ୍ରି ହେଉଥିଲା ତାହା ଏବେ କମି ୮୦ ରୁ ୯୦ କିଲୋରେ ପହଞ୍ଚିଛି । ଡାଲି ବ୍ୟବସାୟରେ ବିଶେଷ ଲାଭ ହେଉ ନାହିଁ ବରଂ ଏବେ କ୍ଷତି ସହିବାକୁ ପଡୁଥିବା ବ୍ୟବସାୟୀ କହିଛନ୍ତି।
ସେପଟେ ସରକାରଙ୍କ ପରିଚାଳନାଗତ ତୃଟି ପାଇଁ ଡ଼ାଲି ଦର ବୃଦ୍ଧି ହେଉଛି ଅଭିଯୋଗ କରୁଛି ଓଡ଼ିଶା ବ୍ୟବସାୟୀ ମହାସଂଘ । କର୍ପୋରେଟ ହାଉସ ମାନେ ଶହଶହ କାଉଣ୍ଟର ଖୋଲି ଅହେତୁକ ଭାବେ ଡାଲି ଷ୍ଟକ୍ ଗଛିତ ରଖିଛନ୍ତି । ସେମାନଙ୍କ ପାଖରେ ଯେହେତୁ ଗୋଦାମ ସୁବିଧା ଅଛି ଆର୍ଥିକ କ୍ଷେତ୍ରରେ ମଧ୍ୟ ସେମାନେ କୌଣସି ସମସ୍ୟା ନାହିଁ ତେଣୁ ଏହାର ଦୁରୁପଯୋଗ କରି ସେମାନେ ବାଜାରରେ ଦରବୃଦ୍ଧି କରୁଛନ୍ତି । ଚଳିତ ବର୍ଷ ୧୦% ଡାଲି ଉତ୍ପାଦନ କମିଛି ଏହାର ଅର୍ଥ ନୁହେଁ କି ଡାଲି ଦର କିଲୋ ପିଛା ୫୦ଟଙ୍କା ବୃଦ୍ଧି ହେବ । ଖାଉଟି ଓ ବ୍ୟବସାୟୀ ଉଭୟେ କ୍ଷତି ସହୁଛନ୍ତି । ଖାଉଟିମାନଙ୍କୁ ଡାଲି କିଣିବାକୁ ବାଧୁଛି ଫଳରେ ଗ୍ରାହକ ଡାଲି କମ୍ କିଣୁଛନ୍ତି।ଅନ୍ୟ ପଟେ ବ୍ୟବସାୟୀ ମାନେ ବି ଅଧିକ ଟଙ୍କା ବ୍ୟୟ କରିବାକୁ ପଡୁଛି । ବିଶେଷ କରି ହରଡ ଡାଲି ଦର ବୃଦ୍ଧି ରୋକିବା ପାଇଁ ସରକାର ପଦକ୍ଷେପ ନେବା ଆବଶ୍ୟକ। ସରକାର ବ୍ୟବସାୟୀମାନଙ୍କ ସହ ଆଲୋଚ କରି ଡାଲି ଦର ନିୟନ୍ତ୍ରଣ କରନ୍ତୁ।