କନକ ବ୍ୟୁରୋ: ଦେଶରେ ଗୋଟିଏ ପରେ ଗୋଟିଏ ବ୍ୟାଙ୍କ ଦେବାଳିଆ ଅବସ୍ଥାକୁ ଯାଉଛନ୍ତି । ଏହି କ୍ରମରେ ୟସ ବ୍ୟାଙ୍କର ମାମଲା ଏପର୍ଯ୍ୟନ୍ତ ତୁଟି ନଥିବା ବେଳେ ପୁଣି ଏକ ଜାତୀୟକରଣ ବ୍ୟାଙ୍କ ଦେଶରେ ତାର ୧୩ ପ୍ରତିଶତ ଶାଖା ବନ୍ଦ କରିବାକୁ ଯୋଜନା କରୁଥିବା ଜାତୀୟ ଗଣମାଧ୍ୟମରେ ପ୍ରକାଶ ପାଇଛି । ରାଷ୍ଟ୍ରାୟତ ବ୍ୟାଙ୍କ ନିଜର ଆର୍ଥିକ ସ୍ଥିତି ସୁଧାରିବାକୁ ସାରା ଦେଶରେ ୬୦୦ ଟି ବ୍ରାଞ୍ଚ ବନ୍ଦ କରିବ ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମର ରିପୋର୍ଟ ମୁତାବକ ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ ୨୦୨୩ ମାର୍ଚ୍ଚ ସୁଦ୍ଧା ନିଜର ୬୦୦ ଟି ଶାଖା ବନ୍ଦ କରିବ କିମ୍ବା ଏହାକୁ ନିକଟତମ ଶାଖା ସହ ମିଶାଇ ଦେବ ବୋଲି କୁହାଯାଇଛି । କହିରଖୁ କି ସାରା ଦେଶରେ ଏବେ ଏହି ବ୍ୟାଙ୍କର ୪୫୯୪ ଟି ଶାଖା ରହିଛି । ଏବେ ୬୦୦ ଟି ଶାଖା ବନ୍ଦ ହେବା ପରେ ଏହାର ଶାଖା ସଂଖ୍ୟା ୪୦୦୦ ତଳକୁ ଖସିଯିବ । ସେପଟେ କେବଳ ଶାଖା ବନ୍ଦ କରିବା ନୁହେଁ ଏହାସହ ବ୍ୟାଙ୍କ ନିଜର କିଛି ରିଅଲ ଇଷ୍ଟେଟ୍ ସମ୍ପତ୍ତି ବିକ୍ରି କରିବ ବୋଲି ରିପୋର୍ଟ ପ୍ରକାଶ ପାଇଛି । ଏଭଳି କରି ବ୍ୟାଙ୍କ ନିଜର ଆର୍ଥିକ ସ୍ଥିତିର ସୂଧାର ଆଣିବାକୁ ଚେଷ୍ଟା କରୁଛି ।
ସୂଚନା ଥାଉକି ଖରାପ ଆର୍ଥିକ ସ୍ଥିତି ଓ ରେଗୁଲେଟରୀ କ୍ୟାପିଟାଲ ନିୟମ ଉଲଙ୍ଘନ ଯୋଗୁଁ ୨୦୧୭ ମସିହାରେ ଭାରତୀୟ ରିଜର୍ଭ ବ୍ୟାଙ୍କ ତରଫରୁ ସେଣ୍ଟ୍ରାଲ ବ୍ୟାଙ୍କ ସମେତ ଅନ୍ୟ କିଛି ବ୍ୟାଙ୍କକୁ ପ୍ରମ୍ପଟ କରେକ୍ଟିଭ ଆକ୍ସନ (ପିସିଏ) ଅଧିନରେ ରଖିଥିଲା । ଏହି କଟକଣା ମାଧ୍ୟମରେ ରିଜର୍ଭ ବ୍ୟାଙ୍କ ସେହି ବ୍ୟାଙ୍କମାନଙ୍କ ଋଣ ପ୍ରଦାନ, ଜମା, ନୂଆ ନିଯୁକ୍ତି ଓ ସଂପ୍ରସାରଣ ଉପରେ କଟକଣା ଲଗାଇଥାଏ ।