ବିଜେଡିର ଗ୍ୟାସ ବନାମ ବିଜେପିର ବିଜୁଳି: ଚୁଲି ଜାଳି ପ୍ରତିବାଦ କଲା ବିଜେଡି, ବିଞ୍ଚଣା ବୁଲାଇ କଟାକ୍ଷ କଲା ବିଜେପି
କନକ ବ୍ୟୁରୋ: ବିଜୁଳି କାଟକୁ ନେଇ ବିଜେପି ଆନ୍ଦେଳନକୁ ଓହ୍ଲାଇଥିବା ବେଳେ ରନ୍ଧନ ଗ୍ୟାସର ଅହେତୁକ ଦରବୃଦ୍ଧି ବିରୋଧରେ ଧାରଣା ଦେଇଛି ବିଜେଡି । ପାୱାର କଟକୁ ନେଇ ରାଜ୍ୟ ସରକାରଙ୍କୁ ବିଜେପି ଘେରିଥିବା ବେଳେ ଗ୍ୟାସ ଓ ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧିକୁ ପ୍ରସଙ୍ଗ କରିଛି ବିଜେଡି । ରାଜଭବନ ସମ୍ମୁଖରେ ଗ୍ୟାସ୍ ସିଲିଣ୍ଡର ରଖି ପ୍ରତିବାଦ କରିଛନ୍ତି ଦଳୀୟ ନେତା ଓ କର୍ମୀ । ଧାରଣା ସ୍ଥଳରେ ଚୁଲି ଜାଳି ପ୍ରତିବାଦ କରାଯାଇଛି । ରାଜ୍ୟପାଳଙ୍କୁ ସ୍ମାରକପତ୍ର ଦେବା ସହ ଦଳ ଅଭିଯୋଗ କରିଛି, ଗ୍ୟାସ୍ ଦର ହ୍ରାସ ପାଇଁ ବାରମ୍ବାର ଦାବି ହେଉଥିଲେ ବି କେନ୍ଦ୍ର ସରକାର ନିରବ ରହିଛନ୍ତି । ତୁରନ୍ତ ଦର ହ୍ରାସ ନକଲେ ଆଗାମୀ ଦିନରେ ରାଜ୍ୟର ସମସ୍ତ ଆରଡିସି, ଜିଲ୍ଲାପାଳ, ବ୍ଲକ, ପଂଚାୟତ ଓ ଗାଁ ସ୍ତରରେ ଆନ୍ଦୋଳନକୁ ବ୍ୟାପକ କରାଯିବ ବୋଲି ଚେତାବନୀ ଦେଇଛି ବିଜେଡି ।
Kanak News is now on WhatsApp
Join and get latest news updates delivered to you via WhatsApp
ଏପଟେ ଅଘୋଷିତ ବିଜୁଳି କାଟ ଯୋଗୁଁ ଲୋକେ ହନ୍ତସନ୍ତ ହେଉଥିବା ବେଳେ ଏହି ପ୍ରସଙ୍ଗକୁ ହାତଛଡ଼ା କରିବାକୁ ଚାହୁଁନାହିଁ ବିଜେପି । ବିଜୁଳି କାଟ ପ୍ରତିବାଦରେ ଦୁଇଦିନିଆ ବିକ୍ଷୋଭକୁ ଓହ୍ଲାଇଛି ଦଳ । ରାଜ୍ୟର ବିଭିନ୍ନ ସ୍ଥାନରେ ଟାଟା ପାୱାର କାର୍ଯ୍ୟାଳୟ ସମ୍ମୁଖରେ ବିଜେପି ନେତା ଓ କର୍ମୀମାନେ ବିକ୍ଷୋଭ ପ୍ରଦର୍ଶନ କରୁଛନ୍ତି । ହାତରେ ବିଂଚଣା ଧରି ପ୍ରତିବାଦ କରିଛନ୍ତି । ଆଉ କେତେ ଘଂଟା ବିଦ୍ୟୁତ୍ କାଟ କଷ୍ଟ ସହିବାକୁ ହେବ, ଶ୍ୱେତପତ୍ର ଜରିଆରେ ରାଜ୍ୟ ସରକାର ସ୍ପଷ୍ଟ କରନ୍ତୁ ବୋଲି କହିଛି ବିଜେପି ।
ଏପଟେ ବିଦ୍ୟୁତ କାଟକୁ ନେଇ ପ୍ରତିବାଦ କରିବା ପାଇଁ ପ୍ରସ୍ତୁତ ହେଉଛି କଂଗ୍ରେସ । ଆସନ୍ତା ୧୯ ତାରିଖରେ ଗ୍ରୀଡକୋ କାର୍ଯ୍ୟାଳୟ ଘେରାଉ କରିବା ସହ ପରେ ସବୁ ଜିଲ୍ଲା ସ୍ତରରେ ଆନ୍ଦୋଳନ କରିବ ବୋଲି ଦଳ ପକ୍ଷରୁ ଚେତାବନୀ ଦିଆଯାଇଛି । ରାଜ୍ୟରେ ବିଦ୍ୟୁତ ଭିତିଭୂମିକୁ ସୁଦୃଢ଼ କରିବା ପାଇଁ ୨୦ହଜାର କୋଟି ଆସିଥିଲା । ସେଥିରୁ ଟାଟାକୁ ମାତ୍ର ୫ ହଜାର କୋଟି ଟଙ୍କା ଦିଆଯାଇଥିଲା ବେଳେ ବାକି ଟଙ୍କା କୁଆଡ଼େ ଗଲା ବୋଲି ପ୍ରଶ୍ନ କରିଛି କଂଗ୍ରେସ ।
୨୦୨୪ ପାଖେଇ ଆସୁଥିବା ବେଳେ ଆରମ୍ଭ ହୋଇଯାଇଛି ରାଜନୈତିକ ଦଳ ମଧ୍ୟରେ ବଳ କଷାକଷି । ଲୋକଙ୍କ ସମସ୍ୟାକୁ ପ୍ରସଙ୍ଗ କରି ପରସ୍ପର ଉପରେ ବିଷ ଉଦ୍ଗାର କରିଛନ୍ତି ବିରୋଧୀ ଓ ଶାସକ ଦଳର ନେତା ।