କନକ ବ୍ୟୁରୋ: ମାଆ ହାତରୁ ପୁଅକୁ ଟାଣିନେଲା କୁମ୍ଭୀର । ପହଲି ରଜ ପାଇଁ ସବୁବେଳେ ଉତ୍ସବର ପରିବେଶ ଥିବା ବେଳେ କେନ୍ଦ୍ରାପଡା ପଟ୍ଟାମୁଣ୍ଡାଇ ନିମପୁର ଅଂଚଳରୁ ଏହି ଦୁଃଖଦ ଖବର ଆସିଛି । ଶୌଚ ପାଇଁ ବ୍ରାହ୍ମଣୀ ନଦୀକୁ ଯାଇଥିବା ବେଳେ ମା’ ସାମ୍ନାରେ ପୁଅକୁ ଟାଣି ନେଇ ମାରିଦେଇଛି କୁମ୍ଭୀର । ବାରମ୍ବାର ଏଭଳି ଘଟଣା ଘଟୁଥିଲେ ବି ପ୍ରଶାସନ ପଦକ୍ଷେପ ନେଉନଥିବା ଗାଁଲୋକେ ଅଭିଯୋଗ କରିଛନ୍ତିି ।
Kanak News is now on WhatsApp
Join and get latest news updates delivered to you via WhatsApp
ପହଲି ରଜ ପାଳିବା ପାଇଁ ସାରା ରାଜ୍ୟ ଯେତେବେଳେ ସକାଳୁ ସକାଳୁ ପ୍ରସ୍ତୁତ ହେଉଥିଲା, ସେତିକିବେଳେ କେନ୍ଦ୍ରାପଡା ପଟ୍ଟାମୁଣ୍ଡାଇ ନିମପୁର ଅଂଚଳରୁ ଆସିଥିଲା ଏହି ଦୁଃଖଦ ଖବର ।
ସକାଳ ପ୍ରାୟ ୭ଟା ୩୦
ନିମପୁର, ପଟ୍ଟାମୁଣ୍ଡାଇ
ସକାଳ ସକାଳୁ ଶୌଚ ପାଇଁ ବ୍ରାହ୍ମଣୀ ନଦୀକୁ ଯାଇଥିଲେ ମା’ ପୁଅ । ଆଉ ପାଣିରେ ପଶିବା ମାତ୍ରେ ନଦୀରେ ଛକି ରହିଥିବା କୁମ୍ଭୀରଟି ୧୦ବର୍ଷର ଆଶୁତୋଷକୁ ଟାଣି ନେଇଥିଲା । ପାଖରେ ଗାଧୋଉଥିବା ମା’ ପୁଅ ବୁଡି ଯାଉଥିବା ଭାବି ହାତ ଧରି ଟାଣିବାକୁ ଉଦ୍ୟମ କରିଥିଲେ । କିନ୍ତୁ ପୁଅଟି ହାତରୁ ଖସି ଯାଇଥିଲା । ଆଶୁତୋଷ ବଂଚାଅ ବଂଚାଅ ଚିକ୍ରାର କରିଥିଲେ ବି ତାକୁ କୁମ୍ଭୀର ମୁହଁରୁ ଛଡାଇ ଆଣିବା ସମ୍ଭବ ହୋଇନଥିଲା । ନଦୀର ଅଥଳ ପାଣି ଭିତରକୁ ଟାଣି ନେଇଥିଲା କୁମ୍ଭୀର ।
ଆଶୁତୋଷକୁ ପାଣି ଭିତରେ ବୁଡାଇ କ୍ଷତବିକ୍ଷତ କରିବା ପରେ, ଉପରକୁ ଉଠି ପହଁରିଥିଲା କୁମ୍ଭୀର । ପ୍ରତ୍ୟକ୍ଷଦର୍ଶୀକଙ୍କ କହିବା ଅନୁସାରେ କୁମ୍ଭୀରଟି ଆଶୁତୋଷକୁ ପାଣିରେ ଦୁଇରୁ ତିନି ଥର ବୁଡାଇଥିଲା । ଆଉ ତାପରେ ଉଠି ପହଁରିଥିଲା । ହେଲେ, ସେତବେଳକୁ ଚାଲିଯାଇଥିଲା ଛୋଟ ପିଲାଟିର ଜୀବନ । ବହୁ ଖୋଜା ଖୋଜି ପରେ ଉଦ୍ଧାର ହୋଇଥିଲା ଆଶୁତୋଷଙ୍କ ମୃତଦେହ । ହେଲେ, ମୃତଦେହ ଉଦ୍ଧାର ପରେ ବି ନଦୀରେ ଖୋଜି ବୁଲୁଛି କୁମ୍ଭୀର ।
କୁମ୍ଭୀର ଆକ୍ରମଣରେ ନାବାଳକ ମୃତ୍ୟୁ ଘଟଣାକୁ ନେଇ ଗାଁଲୋକଙ୍କ ପ୍ରତିବାଦ । କ୍ଷତିପୂରଣ ଦାବିରେ ପଟ୍ଟାମୁଣ୍ଡାଇ-କଟକ ରାସ୍ତାରେ ମୃତଦେହ ରଖି ଗ୍ରାମବାସୀ ପ୍ରତିବାଦ କରିଛନ୍ତି । ବାରମ୍ବାର ଏଭଳି ଘଟଣା ଘଟୁଥିଲେ ବି ପ୍ରଶାସନ ପଦକ୍ଷେପ ନେଉନଥିବା ଅଭିଯୋଗ କରିଛନ୍ତିି ।
ମା’ ଆଗରୁ ପୁଅକୁ କୁମ୍ଭୀର ଝାମ୍ପିନେବା ନେବା ପରେ, ବାହୁନି ବାହୁନି କାନ୍ଦୁଛି ମା । କାନ୍ଦବୋବାଳିରେ ଫାଟି ପଡୁଛି ସମଗ୍ର ଅଂଚଳ । ପହଲି ରଜରେ ଏଭଳି ଅଘଟଣ ଘଟିଥିବାରୁ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି ।