କାକଟପୁର ମା ମଙ୍ଗଳାଙ୍କ ନିଆରା ନୀତି : ମା’ଙ୍କ ପାଖରେ ଲାଗି ହୁଏ ଆମିଷ ଭୋଗ
କନକ ବ୍ୟୁରୋ : କାକଟପୁରର ଅଧିଷ୍ଠାତ୍ରି ଦେବୀ ମାଆ ମଙ୍ଗଳା । ପାର୍ବଣ ଋତୁରେ ଆରମ୍ଭ ହୋଇଛି ମା’ଙ୍କ ପାଖରେ ଷୋଡଶ ଉପଚାର ବିଧି । ଅନ୍ୟ ଦିନରେ ମା’ଙ୍କର ପଂଚ ଉପଚାରରେ ପୂଜା କରାଯାଉଥିବା ବେଳେ ପାର୍ବଣରେ ମା’ଙ୍କୁ ଷୋଡଶ ଉପଚାରରେ ପୂଜା କରାଯାଉଛି । ଏହି ସମୟରେ ମା’ଙ୍କ ପାଖରେ ଅନେକ ଗୁପ୍ତ ନୀତି ସଂପାଦନ କରାଯାଇଥାଏ ।
Kanak News is now on WhatsApp
Join and get latest news updates delivered to you via WhatsApp
ପାର୍ବଣରେ କାକଟପୁର ମା ମଙ୍ଗଳା’ଙ୍କର ସବୁ ନୀତି ଭିତରେ ନିଆରା ନୀତି, ମା’ଙ୍କ ପାଖରେ ଲାଗି ହେଉଥିବା ଆମିଷ ଭୋଗ ନୀତି । ମନ୍ଦିର ରୋଷଶାଳାରେ ସୁପକାର ସେବାୟତଙ୍କ ଦ୍ୱାରା ପ୍ରସ୍ତୁତ ହୁଏ ମାଛ ଭୋଗ । ଯାହାକୁ ୧୬ ଦିନ ଧରି ମନ୍ଦିରରେ ମଙ୍ଗଳାଙ୍କ ପାଶ୍ୱର୍ଦେବୀ ଭାବେ ପୂଜା ପାଉଥିବା ବନଦୁର୍ଗାଙ୍କ ପାଖରେ ଦ୍ୱିପହର ଧୂପ ଓ ରାତ୍ରି ଧୂପରେ ଲାଗି କରାଯାଏ । ତନ୍ତ୍ର ଉପଚାରରେ ଆମିଷ ଭୋଗକୁ ମାଆ ଦୁର୍ଗାଙ୍କ ଉଦେଶ୍ୟରେ ସମର୍ପଣ କରାଯାଏ ।
ବନଦୁର୍ଗାଙ୍କ ପାଖରେ ଆମିଷ ଭୋଗ କରାଯିବା ପରେ ପୂଜା ପଣ୍ଡା ଏହି ପ୍ରସାଦକୁ ପୁଣି ମନ୍ଦିରର ଦକ୍ଷିଣ ଦ୍ୱାର ଦେଇ ବାହାରକୁ ନେଇଆସିଥାନ୍ତି । ଏହାପରେ ମନ୍ଦିରକୁ ପୁଣି ଶୁଦ୍ଧ କରାଯାଏ । ଷୋଡଶ ଉପଚାରରେ ପୂଜା ସମୟରେ ଏମିତି ଦିନକୁ ଦୁଇ ଥର ସ୍ୱତନ୍ତ୍ର ନୀତି କରାଯାଇଥାଏ । ମଙ୍ଗଳା ମନ୍ଦିରରେ ଲାଗି ହେଉଥିବା ଆମିଷ ଭୋଗକୁ ପାଇବା ପାଇଁ ରାଜ୍ୟର ବିଭିନ୍ନ ସ୍ଥାନରୁ ଶ୍ରଦ୍ଧାଳୁଙ୍କ ସୁଅ ଛୁଟିଥାଏ । ପାର୍ବଣରେ ଶୋଡଷ ଉପଚାରରେ ମଙ୍ଗଳାଙ୍କ ପୂଜାର୍ଚ୍ଚନା ଚାଲିଥିବା ବେଳେ ପ୍ରତିଦିନ ମାଆ ଭିନ୍ନ ଭିନ୍ନ ବେଶରେ ଭକ୍ତଙ୍କୁ ଦର୍ଶନ ଦେଇଥାନ୍ତି ।