କର୍ଣ୍ଣାଟକରେ ବିଜେପିର ପରାଜୟ : ଚିନ୍ତାରେ କେନ୍ଦ୍ରୀୟ ନେତୃତ୍ୱ, ବଦଳିବ ରଣନୀତି
କନକ ବ୍ୟୁରୋ : କର୍ଣ୍ଣାଟକରେ ବିଜେପିର ପରାଜୟ ପରେ ଚିନ୍ତାରେ କେନ୍ଦ୍ରୀୟ ନେତୃତ୍ୱ । ୨୦୨୪ ସାଧାରଣ ନିର୍ବାଚନ ପୂର୍ବରୁ ଚଳିତ ବର୍ଷ ମଧ୍ୟପ୍ରଦେଶ, ରାଜସ୍ଥାନ, ତେଲେଙ୍ଗାନା, ଛତିଶଗଡ଼ ବିଧାନସଭା ନିର୍ବାଚନ ହେବାର ଅଛି । ଏହି ୪ ରାଜ୍ୟରୁ କେବଳ ମଧ୍ୟପ୍ରଦେଶରେ ବିଜେପି ସରକାରରେ ଅଛି । ତେବେ କର୍ଣ୍ଣାଟକରେ ହାଇଭୋଲଟେଜ ପ୍ରଚାର ସତ୍ୱେ ବିଜେପି ପଦର୍ଶନ ଖରାପ ରହିଥିଲା । ଯାହା ଦଳୀୟ ନେତାମାନଙ୍କୁ ଚିନ୍ତାରେ ପକାଇଦେଇଛି ।
Kanak News is now on WhatsApp
Join and get latest news updates delivered to you via WhatsApp
ବିଜେପିର ଜଣେ ବରିଷ୍ଠ ନେତାଙ୍କ କହିବା ଅନୁସାରେ, ଆଗାମୀ ନିର୍ବାଚନରେ ପ୍ରାର୍ଥୀ ଚୟନ ବେଳେ ବିଜେପି ଜାତିଗତ ଭୋଟକୁ ଦୃଷ୍ଟିରେ ରଖି ପ୍ରାର୍ଥୀ ଚୟନ କରିବ । କାରଣ କର୍ଣ୍ଣାଟକ ନିର୍ବାଚନରୁ ବିଜେପିକୁ ଶିକ୍ଷା ମିଳିଛି । ବିଏସ ୟେଦୁରୂପାଙ୍କୁ ଦଳ ମୁଖ୍ୟ ପଦବୀରୁ ହଟାଇବା ଏବଂ ଜଗଦୀଶ ସେଟ୍ଟର, ଲକ୍ଷ୍ମଣ ସଦାଭୀ ଭଳି ନେତାଙ୍କୁ ଟିକେଟ ନଦେବା ବିଜେପି ପାଇଁ ମହଙ୍ଗା ସାବ୍ୟସ୍ଥ ହୋଇଛି । କୁହାଯାଉଛି ଲିଙ୍ଗାୟତ ଭୋଟ ପାଇଁ ବିଜେପିକୁ ପରାଜୟର ସାମ୍ନା କରିବାକୁ ପଡିଛି । ତେବେ ଆଗାମୀ ନିର୍ବାଚନରେ ବିଜେପି ଛୋଟ ଛୋଟ ଦଳର ମେଂଟ କରି ନିର୍ବାଚନ ଲଢିବାକୁ ଯୋଜନା କରିଛି ।
କର୍ଣ୍ଣାଟକରେ ଏଥର କେନ୍ଦ୍ରୀୟ ନେତା ଏବଂ ବିଜେପି ଶାସିତ ରାଜ୍ୟଗୁଡିକର ମୁଖ୍ୟମନ୍ତ୍ରୀମାନେ ପ୍ରଚାରର ମଙ୍ଗ ଧରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହା, ଉତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ ସମେତ ବିଜେପିର କେନ୍ଦ୍ରୀୟ ନେତା ଏବଂ କେନ୍ଦ୍ରମନ୍ତ୍ରୀ ମାନେ କର୍ଣ୍ଣାଟକରେ ପ୍ରଚାର କରିଥିଲେ । ହେଲେ ରାଜ୍ୟ ଏବଂ ସ୍ଥାନୀୟ ନେତୃତ୍ୱର ଅଭାବ ରହିଥିବାରୁ ଦଳକୁ ପରାଜୟର ସାମ୍ନା କରିବାକୁ ପଡିଥିଲା । ତେଣୁ ଆଗାମୀ ନିର୍ବାଚନରେ ସ୍ଥାନୀୟ ଏବଂ ରାଜ୍ୟ ନେତୃତ୍ୱଙ୍କୁ ଗୁରୁତ୍ୱ ଦେବାକୁ ବିଜେପି ରଣନୀତି ପ୍ରସ୍ତୁତ କରୁଛି ।