ବର୍ଷାରେ ବେହାଲ ଅର୍କକ୍ଷେତ୍ର : ହାତରେ ଛତା ଧରି ବିଶ୍ୱ ଐତିହ୍ୟକୁ ଦେଖୁଛନ୍ତି ପର୍ଯ୍ୟଟକ
କନକ ବ୍ୟୁରୋ : ବର୍ଷାରେ ବେହାଲ ବିଶ୍ୱ ଐତିହ୍ୟ କୋଣାର୍କ ମନ୍ଦିର । ଲଗାଣ ବର୍ଷାରେ ସୂର୍ଯ୍ୟ ମନ୍ଦିର ପରିସରରେ ପାଣି ଜମି ରହିଛି । ବର୍ଷା ଲାଗି ରହିଥିବାରୁ କୋଣାର୍କ ମନ୍ଦିର ଚାରି ପାଖରେ ଜମି ରହିଛି ପାଣି । ଆଉ ଏହି ବର୍ଷା ପାଣି ଭିତରେ ପଶି କୋଣାର୍କ ମନ୍ଦିର ବୁଲି ଦେଖୁଛନ୍ତି ପର୍ଯ୍ୟଟକ । ଏମିତି କି ବର୍ଷା ଯୋଗୁଁ କୋଣାର୍କ ବୁଲିବାକୁ ଆସିଥିବା ପର୍ଯଟକ ଛତା ଧରି ଗୋଟିଏ ସ୍ଥାନରେ ଠିଆ ହୋଇ ରହିଥିବା ବି ଦେଖିବାକୁ ମିଳିଛି । ଅନ୍ୟ ଦିନ ଭଳି ପର୍ଯ୍ୟଟକଙ୍କ ଭିଡ ଜମି ନଥିଲେ ମଧ୍ୟ ସକାଳୁ ସକାଳୁ କିଛି ପର୍ଯ୍ୟଟକ କୋଣାର୍କ ମନ୍ଦିର ପରିସରରେ ବୁଲିବା ସହ ବର୍ଷାର ମଜା ଉଠାଇଛନ୍ତି । ତେବେ ତୁହାକୁ ତୁହା ବର୍ଷା ଯୋଗୁ କିଛି ଦୋକାନ ବଜାର ବନ୍ଦ ରହିଥିବା ଦେଖିବାକୁ ମିଳିଛି । କୋଣାର୍କ ମନ୍ଦିର ଠାରୁ ଅତି କମରେ ୧୦୦ ମିଟର ଅଂଚଳରେ ପାଣି ଜମି ରହିଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଏହାସହ ପୁରୀ ଜିଲ୍ଲାରେ ସର୍ବାଧିକ ବର୍ଷା ରେକର୍ଡ ହୋଇଥିବା ବେଳେ ଅସ୍ତରଙ୍ଗରେ ଦେଖିବାକୁ ମିଳିଛି ଏହାର ବଡ ପ୍ରଭାବ । ଅସ୍ତରଙ୍ଗ ବ୍ଲକରେ ୨୪ ଘଂଟା ଧରି ଲଗାତର ବର୍ଷା ଲାଗି ରହିବା ପରେ ଏବେ ଚାରି ଆଡେ ପାଣି ପାଣି ସ୍ଥିତି । ରାସ୍ତାରେ ପାଣି । ଧାନ ଜମିରେ ପାଣି । ସବୁଠାରୁ ଅଧିକ କ୍ଷତି ଗ୍ରସ୍ତ ହୋଇପାରନ୍ତି ଧାନ ଚାଷୀ । କାରଣ ଧାନ ଜମିରେ ଜମି ରହିଛି ପାଣି । ଏହାରି ଭିତରେ ହେକ୍ଟର ହେକ୍ଟର ଜମିର ଧାନ ଫସଲ ପାଣିରେ ଶୋଇ ରହିଛି । ଧୋଡ ଧରି ସାରିଥିବା ଧାନ ଗଛ ପାଣିରେ ଶୋଇଥିବା ଦେଖିବା ପରେ ଚାଷୀକୁ ଲାଗିଛି ଶକ୍ତ ଝଟକା ।