ଶିବସେନାରେ ଛକାପଞ୍ଝା : ଆଜି ଜାତୀୟ କାର୍ଯ୍ୟକାରିଣୀ ବୈଠକ; ବିଦ୍ରୋହୀ ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ହୋଇପାରେ ବିଚାର ବିମର୍ଷ
କନକ ବ୍ୟୁରୋ : ଶିବସେନା ଓ ମହାରାଷ୍ଟ୍ର ସରକାରରେ ଚାଲିଥିବା ସଂକଟ ମଧ୍ୟରେ ଶିବସେନା ପ୍ରମୁଖ ଉଦ୍ଧବ ଠାକରେ ଆଜି ଦଳର ଜାତୀୟ କାର୍ଯ୍ୟକାରିଣୀ ଡକାଇଛନ୍ତି । ଅପରାହ୍ନରେ ଏହି ବୈଠକ ଡକାଯାଇଛି । ଏହି ବୈଠକରେ ବିଦ୍ରୋହୀ ବିଧାୟକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଓ ପରବର୍ତ୍ତୀ କାର୍ଯ୍ୟପନ୍ଥା ନେଇ ବିଚାର ବିମର୍ଷ ହୋଇପାରେ । ସେହିପରି ଆହିତ୍ୟ ଠାକରେ ଆଜି ସଂଧ୍ୟାରେ ବିରଲା ମାତୋଶ୍ରୀ ସଭାଗୃହଠାରେ ଏକ ଜନସଭା କରିବେ ।
Kanak News is now on WhatsApp
Join and get latest news updates delivered to you via WhatsApp
ଶିବସେନା ଭବନରେ ଏକାଠି ହୋଇଥିବା ଦଳର ଜିଲ୍ଲା ବିଭାଗ ମୁଖ୍ୟ ଏବଂ ଅନ୍ୟ କାର୍ଯ୍ୟକର୍ତ୍ତାଙ୍କୁ ଭର୍ଚୁଆଲ୍ ଭାବେ ଉଦ୍ବୋଧନ ଦେଇ ଠାକରେ କହିଛନ୍ତି, ବିଦ୍ରୋହ ସତ୍ତ୍ବେ ଦଳ ପୂର୍ବରୁ ୨ ଥର କ୍ଷମତାକୁ ଆସିଛି । ମୁଁ ସରକାରୀ ବାସଭବନ ଛାଡ଼ି ଥାଇପାରେ କିନ୍ତୁ ମୋ ଲଢ଼ିବା ଶକ୍ତିକୁ ଛାଡ଼ିନି । ଠାକ୍ରେ କହିଛନ୍ତି, ତାଙ୍କ ଖରାପ୍ ସ୍ବାସ୍ଥ୍ୟ ସତ୍ତ୍ବେ ଗତ ଅଢ଼େଇ ବର୍ଷ ହେବ ସେ କରୋନା ମହାମାରୀ ସହ ଲଢ଼ିଛନ୍ତି । କିନ୍ତୁ ବିରୋଧୀମାନେ ଏହି ସ୍ଥିତିର ଫାଇଦା ଉଠାଇଛନ୍ତି । ମୁଖ୍ୟମନ୍ତ୍ରୀଙ୍କ ଉଦ୍ବୋଧନ ସମୟରେ ଶିବସେନା ନେତା ଏବଂ ମନ୍ତ୍ରୀ ଆଦିତ୍ୟ ଠାକରେ ମଧ୍ୟ ଶିବସେନା ଭବନରେ ଉପସ୍ଥିତ ଥିଲେ ।
ଠାକରେ କହିଛନ୍ତି, ଏକନାଥ ସିନ୍ଦେଙ୍କ ପାଇଁ ମୁଁ ସବୁକିଛି କରିଛି । ଏକନାଥ ସିନ୍ଦେଙ୍କ ପୁଅ ଜଣେ ଶିବସେନା ସାଂସଦ । ସିନ୍ଦେଙ୍କୁ ଗୁରୁତ୍ବପୂର୍ଣ୍ଣ ବିଭାଗ ଦେଇଛି । କିନ୍ତୁ ସେ ମୋ ବିରୋଧରେ ବିଭିନ୍ନ ଅଭିଯୋଗ ଆଣୁଛନ୍ତି । ମୁଁ କ୍ଷମତା ଲୋଭି ନୁହେଁ । ଯେଉଁ ଲୋକମାନେ କହୁଥିଲେ ଶିବସେନା ପାଇଁ ଜୀବନ ଦେଇଦେବୁ ଆଜି ସେମାନେ ଅନ୍ୟତ୍ର ଚାଲି ଯାଇଛନ୍ତି । ବିଦ୍ରୋହୀ ବିଧାୟକମାନେ ଶିବସେନାକୁ ଭାଙ୍ଗିଦେବାପାଇଁ ଚେଷ୍ଟା ଚଳାଇଛନ୍ତି ।