ପଞ୍ଜାବର ଗୁଞ୍ଜରବାଲାରୁ ଲଣ୍ଡନର ୧୦ ଡ୍ରାଉନିଂ ଷ୍ଟ୍ରିଟ୍ । ଜାଣନ୍ତୁ କେମିତି ଥିଲା ଋଷି ସୁନକଙ୍କ ପରିବାରର ଏହି ଯାତ୍ରା ?
କନକ ବ୍ୟୁରୋ : ଭାରତୀୟ ବଂଶୋଦ୍ଭବ ଋଷି ସୁନକ ଏବେ ବ୍ରିଟେନର ପ୍ରଧାନମନ୍ତ୍ରୀ ପଦରେ ଅବସ୍ଥାପିତ ହୋଇଛନ୍ତି । ହେଲେ ତାଙ୍କ ପରିବାର ଗତ ୯୦ ବର୍ଷ ମଧ୍ୟରେ ୩ ଟି ମହାଦେଶ ଯାତ୍ରା କରି ଶେଷରେ ବ୍ରିଟେନରେ ବାସ କରୁଛନ୍ତି । ଅବିଭକ୍ତ ଭାରତର ପଞ୍ଜାବ ପ୍ରଦେଶର ମୂଳ ବାସିନ୍ଦା ଥିଲେ ଋଷି ସୁନକଙ୍କ ପରିବାର । ହେଲେ ଏବେ ତାଙ୍କ ପରିବାର ବ୍ରିଟେନର ନାଗରିକ । ପୁଣି ଅନେକ ଦେଶକୁ ଦିନେ ନିଜ ଶାସନ କ୍ଷମତାରେ ବାନ୍ଧିରଖିଥିବା ବ୍ରିଟେନ ଭଳି ଏକ ରାଷ୍ଟ୍ରର ମୁଖ୍ୟ ହୋଇପାରିଛନ୍ତି ଋଷି ସୁନକ ।
Kanak News is now on WhatsApp
Join and get latest news updates delivered to you via WhatsApp
ପଞ୍ଜାବର ଏକ ପରିବାର ଅନେକ ଦଶକ ତଳେ ଏକ ସୁଖମୟ ଜୀବନ ଖୋଜି ଖୋଜି ଏସିଆ ମହାଦେଶରୁ ଆଫ୍ରିକା ମହାଦେଶରେ ପହଂଚିଥିଲେ । ହେଲେ ସେଠାରେ କିଛିଦିନ ବାସ କରିବା ପରେ ପୁଣି ୟୁରୋପ ମହାଦେଶ ପଳାଇଥିଲେ । ଏହି ୩ ମହାଦେଶକୁ ଯାତ୍ରା କରିବା ବେଳେ ସୁନକ ପରିବାରର ୩ ପୀଢିଙ୍କ ସମୟ ବିତି ଯାଇଥିଲା ।
୯୦ ବର୍ଷ ପୂର୍ବେ ଅବିଭକ୍ତ ଭାରତର ପଞ୍ଜାବ ପ୍ରଦେଶରେ ଗୁଞ୍ଜରବାଲାର ଜଣେ ଯୁବକ ନିଜର ସୁନ୍ଦର ଭବିଷ୍ୟତ ପାଇଁ ସାତ ସମୁଦ୍ର ପାରି ହେବାକୁ ନିଜର ସମସ୍ତ ଆୟୋଜନ କରିଥିଲେ । କ୍ଷେତ୍ରୀୟ ସମୁଦାୟର ଏହି ଯୁବକ ଜଣେ ବ୍ୟବସାୟୀ ଥିଲେ । ୧୯୩୫ ମସିହାରେ ଋଷି ସୁନକଙ୍କ ଦାଦା ରାମଦାସ ସୁନକ ଗୁଞ୍ଜରବାଲାରୁ ୫ ହଜାର କିଲୋମିଟର ଦୂର ଯାତ୍ରାରେ ବାହାରିଗଲେ । ତାଙ୍କର ଲକ୍ଷ୍ୟଥିଲା ଆଫ୍ରିକା ମହାଦେଶର ଏକ ଛୋଟ ଦେଶ କେନିଆରେ ବାସ କରିବେ । ସେତେବେଳେ କେନିଆରେ ଇଂଗ୍ରେଜମାନଙ୍କର ଶାସନ ଥିଲା । ରାମଦାସ ସେଠାରେ ପହଂଚିବା ପରେ ଅନେକ ଚେଷ୍ଟା କରି ଏକ କିରାଣୀ ଚାକିରି ଯୋଗାଡ କରିଥିଲେ ।
ଋଷି ସୁନକଙ୍କ ଜେଜେ ରାମଦେବ ସୁନକ ଓ ଜେଜେମା ସୁହାଗ ରାଣୀଙ୍କର ମୋଟ ୬ ଜଣ ସନ୍ତାନ ଥିଲେ । ସେମାନଙ୍କ ମଧ୍ୟରୁ ୩ ଜଣ ପୁଅ ଓ ୩ ଜଣ ଝିଅ ଥିଲେ । ହେଲେ ଋଷି ସୁନକଙ୍କ ବପା ୟଶବୀର ସୁନକଙ୍କୁ ଯେତେବେଳେ ୧୭ ବର୍ଷ ବୟସ ହୋଇଥିଲା ସୁନକ ପରିବାର କେନିଆ ଛାଡି ବ୍ରିଟେନ ଚାଲିଆସିଥିଲେ । ସେତେବେଳେ ୟଶବୀର ସୁନକଙ୍କୁ ଲିଭରପୁଲ ବିଶ୍ୱବିଦ୍ୟାଳୟରେ ତାଙ୍କୁ ଡାକ୍ତରୀ ପଢିବାର ସୁଯୋଗ ମିଳିଯାଇଥିଲା ।
ସେପଟେ ଋଷି ସୁନକଙ୍କ ପରିବାର ଭାରତୀୟ ସଂସ୍କୃତି ସହ ଭଲଭାବେ ଜଡିତ ଥିଲେ । ତାଙ୍କ ଜେଜେବାପା ରାମଦାଶ ସୁନକ ୧୯୭୧ ମସିହାରେ ସାଉଥମ୍ପଟନର ଏକ ବୈଦିକ ହିନ୍ଦୁ ମନ୍ଦିର ସ୍ଥାପନା କରିଥିଲେ । ୧୯୮୦ ମସିହାରେ ଋଷି ସୁନକଙ୍କ ପିତା ୟଶବୀର ସୁନକ ଏହି ମନ୍ଦିରର ଟ୍ରଷ୍ଟି ଭାବେ ଯୋଡି ହୋଇଥିଲେ ।
ଅନ୍ୟପଟେ ଋଷି ସୁନକଙ୍କ ମା’ଙ୍କ କଥା ଯଦି ଆଲୋଚନା କରାଯାଏ ତେବେ ଋଷି ସୁନକଙ୍କ ଅଜା ବି ପଞ୍ଜାବ ପ୍ରଦେଶର ବାସିନ୍ଦା । ହେଲେ ଋଷିଙ୍କ ଅଜା ବି ବ୍ରିଟେନ ସରକାରରେ ଜଣେ ବରିଷ୍ଠ ଅଧିକାରୀ ଥିଲେ । ଏହି ସମୟରେ ଋଷିଙ୍କ ମା ଓଷା ଓ ଋଷିଙ୍କ ବାପାଙ୍କ ମଧ୍ୟରେ ବ୍ରିଟେନରେ ଭେଟ ହୋଇଥିଲା । ୧୯୭୭ ମସିହାରେ ୟଶବୀର ଓ ଓଷାଙ୍କ ମଧ୍ୟରେ ବିବାହ ହୋଇଥିଲା ଓ ୧୯୮୦ ମସିହାରେ ଋଷି ସୁନକଙ୍କର ଜନ୍ମ ହୋଇଥିଲା ।
ଋଷି ସୁନକ ତାଙ୍କ ଅତୀତକୁ ଇମାନଦାରୀ ସହକାରେ ସ୍ୱିକାର କରନ୍ତି ଋଷି ସୁନକ । ଏହାସହ ତାଙ୍କ ପରିବାରକୁ ନେଇ ମଧ୍ୟ ସେ ଗର୍ବ କରନ୍ତି । ସେ କହନ୍ତି କି ମୁଁ ଯେଉଁଠୁ ଆସିଛି ତାହାକୁ ନେଇ ମୋ ଭିତରେ ଗର୍ବ ରହିଛି । ମୁଁ କିଏ ଏହା ମୋର ଅସ୍ତିତ୍ୱରେ ଯୋଡି ହୋଇ ରହିବ । ମୋର କାମ ଏହା ସୁନିଶ୍ଚିନ୍ତ କରିବା କି ବ୍ରିଟିସ ଓ ଭାରତୀୟ କାହାଣୀର ଶେଷ ନୁହେଁ ବରଂ ପ୍ରାରମ୍ଭ କରିବା ।