ନବୀନ ନିବାସରେ ନିର୍ବାଚନୀ ରଣନୀତି । ପଦ୍ମପୁର ଫଳାଫଳ ପରେ ଦାୟିତ୍ୱରେ ଥିବା ନେତାଙ୍କୁ ନେଇ କବାଟିକିଳା ବୈଠକ, ୨୦୨୪ ପାଇଁ ଦଳର ଜୋରଦାର ପ୍ରସ୍ତୁତି ।
କନକ ବ୍ୟୁରୋ : ୨୦୨୪ ପାଇଁ ବିଜେଡିର ପ୍ରସ୍ତୁତି । ପଦ୍ମପୁର ଉପନିର୍ବାଚନ ଫଳାଫଳ ପରେ ନବୀନ ନିବାସରେ ତୁହାକୁ ତୁହା ସମୀକ୍ଷା ବୈଠକ । ପଦ୍ମପୁର ଦାୟିତ୍ୱରେ ଥିବା ନେତାଙ୍କୁ ନେଇ ବସିଲା ଏହି ବୈଠକ । ଆୟୋଜିତ ଏହି ବୈଠକରେ ସଙ୍ଗଠନ ସମ୍ପାଦକ ପ୍ରଣବ ପ୍ରକାଶ ଦାସ, ସୁଶାନ୍ତ ସିଂ ଓ ଦେବୀ ମିଶ୍ର ପ୍ରମୁଖ ତୁଙ୍ଗ ନେତା ସାମିଲ ହୋଇଛନ୍ତି । ତେବେ ପଦ୍ମପୁର ବିଜୟର ସମୀକ୍ଷା ସହ ୨୦୨୪ ପାଇଁ ମଧ୍ୟ ରଣନୀତି ପ୍ରସ୍ତୁତ କରାଯାଉଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ରାଜ୍ୟରେ ଆଗୁଆ ନିର୍ବାଚନ ପାଇଁ ଚର୍ଚ୍ଚା ହେଉଥିବା ବେଳେ, ଆଉ ଗୋଟିଏ ପଟେ ବିଜୁ ଜନତା ଦଳ ଭିତରେ ଭିତରେ ଜୋରଦାର ପ୍ରସ୍ତୁତି ଚଳାଇଛି । ୧୨୫ ମିଶନ ନେଇ ଆଗଉ ଥିବା ବିଜେଡି ୧୪୭ ବିଧାନସଭା କ୍ଷେତ୍ରରେ ସର୍ଭେ କାମ ଆରମ୍ଭ କରିଛି । ବର୍ତମାନର ବିଧାୟକ ଓ ସାଂସଦଙ୍କ ଲୋକପ୍ରିୟତା, ଭାବମୂର୍ତିିର ରିପୋର୍ଟ ସଂଗ୍ରହ କରି ଦଳର ସୁପ୍ରିମୋଙ୍କୁ ପ୍ରଦାନ କରାଯିବ । କେଉଁ ନିର୍ବାଚନମଣ୍ଡଳୀରେ ସରକାରୀ ବିରୋଧୀ ହାୱା ରହିଛି, ତାର ମଧ୍ୟ ସର୍ଭେ କରୁଛି ଶାସକ ଦଳ । ଆଉ ଏହି ସର୍ଭେ ଆଧାରରେ ଦଳ ୨୦୨୪ ପାଇଁ ପ୍ରାର୍ଥୀ ଚୟନ କରିବ ବୋଲି କୁହାଯାଉଛି ।
୨୦୨୪ ପାଇଁ ବିଜେଡି ସ୍ୱତନ୍ତ୍ର ରଣନୀତି କରୁଥିବାବେଳେ ଲୋକପ୍ରିୟତା ହରାଇଥିବା ଓ ଭଲ ପ୍ରଦର୍ଶନ ନଥିବା ନେତା ଛାନିଆ ହେଲେଣି । ୨୦୧୯ରେ ବିଜେଡି ୫୦ରୁ ଅଧିକ ବିଧାୟକଙ୍କ ଟିକେଟ କଟାଯାଇଥିଲା । ଏଥିସହ ୨୦୧୯ ପରେ ରାଜ୍ୟରେ ହୋଇଥିବା ୭ଟି ଉପନିର୍ବାଚନରେ ୪ଜଣ ମହିଳା ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇ ବଡ ସଂକେତ ଦେଇଛି ବିଜେଡି । ଅନ୍ୟପଟେ ବୟସ୍କଙ୍କୁ ଆଉ ଭରସା କରି ନପାରନ୍ତି ବିଜେଡି ସୁପ୍ରିମୋ । ତେବେ ଗ୍ରାଉଣ୍ଡ ରିପୋର୍ଟକୁ ଆଧାର କରି ସୁପ୍ରିମୋ ଟିକେଟ ଦେବେ ବୋଲି ଅନୁମାନ କରୁଛନ୍ତି ବିଜେଡି ବିଧାୟକ ।