କରୋନାର ଅନ୍ତ ପାଇଁ କରିବାକୁ ହେବ ଏହି ଦୁଇଟି କାମ। ପଢନ୍ତୁ, କଣ କହିଲେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ମୁଖ୍ୟ?
କନକ ବ୍ୟୁରୋ: କରୋନା ଭାଇରସର ନୂଆ ଭାରିଆଣ୍ଟ ଓମିକ୍ରନ୍ ଏବେ ସାରା ବିଶ୍ୱରେ ଭୟ ବୃଦ୍ଧି କରିବାରେ ଲାଗିଛି । ଗୋଟିଏ ପଟେ ବିଶ୍ୱରେ ପୁଣି କୋଭିଡ୍ ସଂକ୍ରମଣ ସୀମା ଡେଉଁଥିବାବେଳେ, ଦେଶରେ ମଧ୍ୟ ଗତ ୨୪ ଘଣ୍ଟା ଭିତରେ ପାଖାପାଖି ୨ ଲକ୍ଷ କୋଭିଡ୍ ସଂକ୍ରମିତ ଚିହ୍ନଟ ହୋଇଛନ୍ତି । ତେବେ ଓମିକ୍ରନ୍ କଥା କହିଲେ, ଦେଶରୁ ଏବେ ସୁଦ୍ଧା ୪୮୬୮ ଓମିକ୍ରନ୍ କେସ୍ ଚିହ୍ନଟ ହୋଇସାରିଲେଣି । ଆଉ ଏହାରି ଭିତରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ମୁଖ୍ୟ ପୁଣି ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ପ୍ରମୁଖ ସୋମବାର କହିଛନ୍ତି ଯେ, ମହାମାରୀକୁ ଅନ୍ତ କରିବା ସମ୍ଭବ ହେଲେ ସେଥିପାଇଁ କିଛି ପଦକ୍ଷେପ ଗ୍ରହଣ କରିବାକୁ ପଡିବ । ହୁ ଚିଫ୍ ଟେଡ୍ରୋସ୍ ଏଡନାମ କହିଛନ୍ତି, କୋଭିଡକୁ ନିଶ୍ଚୟ ହରାଇହେବ, ହେଲେ ଦୁନିଆର ସବୁ ସବୁ ସରକାର ଓ ଭ୍ୟାକ୍ସିନ ଉତ୍ପାଦକଙ୍କୁ କିନ୍ତୁ ଏଥିପାଇଁ କିଛି କାମ କରିବାକୁ ପଡିବ । ପ୍ରଥମଟି ହେଉଛି, ଯେଉଁ ଦେଶରେ ଭ୍ୟାକ୍ସିନ୍ ପହଞ୍ଚୁନାହିଁ, ହେଲେ ସେଠାରେ ସଂକ୍ରମଣ ବୃଦ୍ଧି ପାଉଛି ସେହି ଦେଶକୁ ଭ୍ୟାକ୍ସିନ୍ ଯୋଗାଣ କରାଯାଉ । ତା ସହିତ ଦ୍ୱିତୀୟ କଥାଟି ହେଉଛି ଲୋକଙ୍କୁ ଭ୍ୟାକ୍ସିନ୍ ଦେବା ପାଇଁ ଆବଶ୍ୟକ ସମସ୍ତ ପ୍ରକାର ସଂଶାଧନକୁ ପୂରଣ କରାଯାଉ । ଆମେ ସେତେବେଳେ ସୁରକ୍ଷିତ ହୋଇପାରିବା, ଯେତେବେଳେ ଦୁନିଆର ପ୍ରତିଟି ବ୍ୟକ୍ତି ସୁରକ୍ଷିତ ରହିବେ ବୋଲି ସେ କହିଛନ୍ତି ।
ଏହାପୂର୍ବରୁ ହୁ ମୁଖ୍ୟ କହିଥିଲେ ଯେ, ପୃଥିବୀର କୌଣସି ଦେଶ ମହାମାରୀ କବଳରୁ ରକ୍ଷା ପାଇନାହିଁ । ଆମ ପାଖରେ କୋଭିଡକୁ ରୋକିବାକୁ କିମ୍ବା ଚିକିତ୍ସା କରିବାକୁ କୌଣସି ପ୍ରକାର ଉପକରଣ ନାହିଁ । ଭ୍ୟାକ୍ସିନର ଅସମାନତା (ବିଭିନ୍ନ ଛୋଟ ଛୋଟ ଦେଶରେ ଏବେ ବି ପହଞ୍ଚିଛି କରୋନା ଟିକା) ଯେତେ ଲମ୍ବା ସମୟ ପର୍ଯ୍ୟନ୍ତ ଜାରି ରହିବ, ସେତେ ପର୍ଯ୍ୟନ୍ତ ଆମେ ସୁରକ୍ଷିତ ହୋଇପାରିବା ନାହିଁ ।
ସେ ଆହୁରି ମଧ୍ୟ କହିଥିଲେ ଯେ, କୋଭିଡ୍ ମହାମାରୀକୁ ଏବେ ତିନି ବର୍ଷ ପୂରା ହେବାକୁ ଯାଉଛି । ଯଦି ଆମେ ସମସ୍ତେ ମିଶିକରି ଲଢେଇ କରିବା ତେବେ ଆମେ ଏହାକୁ ହରାଇ ପାରିବା । ୨୦୨୨ ମଧ୍ୟଭାଗ ସୁଦ୍ଧା ବିଶ୍ୱର ପ୍ରାୟ ସବୁ ଦେଶ ନିଜ ଲୋକଙ୍କର ୭୦ ପ୍ରତିଶତ ଟିକାକରଣ କରିବାକୁ ଲକ୍ଷ୍ୟ ରଖାଯାଇଛି ବୋଲି ସେ କହିଥିଲେ ।