କନକ ବ୍ୟୁରୋ : ଦିଲ୍ଲୀର କଞ୍ଝାୱାଲା ଠାରେ ନୂଆବର୍ଷ ରାତିରେ ହୋଇଥିବା ଦୁର୍ଘଟଣାକୁ ନେଇ ସମସ୍ତ ସତ ମାନିଛନ୍ତି କାରରେ ଥିବା ଅଭିଯୁକ୍ତମାନେ । ଗିରଫ ହୋଇଥିବା ଅଭିଯୁକ୍ତମାନେ ଜେରାବେଳେ ପୋଲିସ ସାମ୍ନାରେ ଘଟଣାର ସବୁ ସତ କହିଛନ୍ତି । ସେମାନେ ମାନିଛନ୍ତି କି ସେମାନେ ଜାଣିଥିଲେ ଦୁର୍ଘଟଣା ପରେ କାରତଳେ ଅଞ୍ଜଳୀ ଫଶିରହିଛି । ହେଲେ ଭୟରେ ସେମାନେ ଗାଡି ନଅଟକାଇ ଆଗକୁ ଆଗକୁ ଯାଇଥିଲେ । ଏହି କ୍ରମରେ ସେମାନେ ଗାଡିକୁ ଗୋଟିଏ ରାସ୍ତାରେ ନନେଇ ଏପଟ ସେପଟ କରିଥିବା କଥା ମଧ୍ୟ ମାନିଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଅଭିଯୁକ୍ତମାନଙ୍କୁ ପଚରା ଉଚରା ବେଳେ ସେମାନେ କହିଛନ୍ତି କି, ସେମାନଙ୍କର ଡର ଥିଲା କି ଅଞ୍ଜଳୀ କାର ତଳୁ ଯଦି ବାହାରକୁ ବାହାରି ଯାଉଛି ତେବେ ତାଙ୍କ ଉପରେ ହତ୍ୟା ମାମଲା ରୁଜୁ ହୋଇପାରେ । ଏହି କାରଣରୁ ଦୁର୍ଘଟଣା ପରେ ଅଞ୍ଜଳୀ କାର ତଳେ ଫଶି ରହିଥିଲେ ବି ନା ସେମାନେ ଗାଡି ଅଟକାଇଥିଲେ ନା ଅଞ୍ଜଳୀକୁ ବଞ୍ଚାଇବାକୁ ଚେଷ୍ଟା କରିଥିଲେ ।
ସେମାନେ କହିଛନ୍ତି କି, ଦୁର୍ଘଟଣା ପରେ ସେମାନେ ଭୟଭୀତ ହୋଇପଡିଥିଲେ । ଏଣୁ ଗାଡିକୁ ଏପଟ ସେପଟ କରି ଅନେକ ବୁଲାଇଥିଲେ । ଏହାସହ କେତେବେଳେ ଅଞ୍ଜଳୀ କାର ତଳୁ ବାହରିଯିବ ତାହାକୁ ଅପେକ୍ଷା କରିଥିଲେ । ଏହାସହ ଅଭିଯୁକ୍ତମାନେ ପ୍ରଥମେ ପୋଲିସକୁ କହିଥିଲେ କି କାର ଭିତରେ ଉଚ୍ଚସ୍ୱରରେ ମ୍ୟୁଜିକ ବାଜୁଥିବାରୁ ତାଙ୍କୁ କିଛି ଶୁଭାଯାଇ ନଥିଲା । ହେଲେ ଏବେ ଏହା ମିଥ୍ୟା ବୋଲି ସ୍ୱୀକାର କରିଛନ୍ତି ଅଭିଯୁକ୍ତମାନେ । ସେମାନେ ପୋଲିସକୁ ଭ୍ରମିତ କରିବାକୁ ଏଭଳି କହିଥିବା କଥା ମଧ୍ୟ ସ୍ୱୀକାର କରିଛନ୍ତି ।
ସେପଟେ ଏହି ମାମଲାରେ ମୋଟ ୭ ଜଣ ଗିରଫ ହୋଇଥିବା ବେଳେ ୨ ଜଣଙ୍କୁ କୋର୍ଟ ଜାମିନ ପ୍ରଦାନ କରିଛନ୍ତି । ସପ୍ତମ ଅଭିଯୁକ୍ତ ଭାବେ ଗିରଫ ହୋଇଥିବା ଅଂକୁଶଙ୍କୁ ଶନିବାର ଦିନ ରୋହିଣୀ କୋର୍ଟ ୨୦ ହଜାର ଟଙ୍କା ମୁଚାଲିକାରେ ଜାମିନ ପ୍ରଦାନ କରିଛନ୍ତି ।