ମୃତଦେହ ବ୍ୟବଚ୍ଛେଦ ପାଇଁ ଲାଞ୍ଚ ଅଭିଯୋଗ : ୫୦୦ ଟଙ୍କା ଦେବା ପରେ ଶବ ବ୍ୟବଚ୍ଛେଦ କରିବାକୁ ରାଜି ହେଲେ କର୍ମଚାରୀ
କନକ ବ୍ୟୁରୋ : ଶବ ବ୍ୟବଚ୍ଛେଦ ପାଇଁ ଲାଞ୍ଚ । ୫୦୦ ଟଙ୍କା ଲାଞ୍ଚ ଦେବା ପରେ ଶବ ବ୍ୟବଚ୍ଛେଦ କରିବାକୁ ରାଜି ହେଲେ କର୍ମଚାରୀ । ଏଭଳି ଅଭାବନୀୟ ଚିତ୍ର ଆସିଛି ନୟାଗଡ ଜିଲ୍ଲା ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରୁ । ଗତକାଲି ବାଇଝରି ଗାଁର ନୀଳାଚଳ ନାୟକଙ୍କ ପୁଅ ସମୀର ପୋଖରୀରେ ବୁଡି ପ୍ରାଣ ହରାଇଥିଲା । ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଦଶପଲ୍ଲା ଗୋଷ୍ଠୀ ସ୍ୱାସ୍ଥାକେନ୍ଦ୍ରକୁ ପଠାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ହେଲେ ଏହା ଆମ କାମ ନୁହେଁ କହି ମୃତଦେହକୁ ଦୀର୍ଘ ସମୟ ଧରି ପକାଇ ରଖିଥିଲେ ସ୍ୱାସ୍ଥ୍ୟକେନ୍ଦ୍ରର ଚତୁର୍ଥ ଶ୍ରେଣୀ କର୍ମଚାରୀ । ଏପରିକି ହଜାରେ ଟଙ୍କା ନଦେଲେ ଶବ ବ୍ୟବଚ୍ଛେଦ କରିବେ ନାହିଁ ବୋଲି ଅଡି ବସିଥିଲେ । ତେବେ କଥାବାର୍ତ୍ତା ପରେ ୫୦୦ ଟଙ୍କା ନେଇ ଶବ ବ୍ୟବଚ୍ଛେଦ କରିବାକୁ ରାଜି ହୋଇଥିଲେ ।
ସମ୍ପୃକ୍ତ କର୍ମଚାରୀ ଲାଞ୍ଚ ନେଉଥିବାର ଭିଡିଓ ଏବେ ଭାଇରାଲ ହେବାରେ ଲାଗିଛି । ଆଉ ଭିଡିଓ ଭାଇରାଲ ହେବା ପରେ ପୁରା ଘଟଣା ସମସ୍ତଙ୍କ ସାମ୍ନାକୁ ଆସିଛି । ବ୍ୟବଚ୍ଛେଦ ପାଇଁ ଲାଞ୍ଚ ନେବା ଘଟଣା ଜଣାପଡିବା ପରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ତଦନ୍ତ କରାଯିବ ବୋଲି କହିଛନ୍ତି ।