୨୪ ତାରିଖରେ ରଥଯାତ୍ରା ପାଳିବାକୁ ଗ୍ୱାଲିୟର ଇସ୍କନ ପକ୍ଷରୁ ପ୍ରସ୍ତୁତି । ତୀବ୍ର ବିରୋଧ କଲେ ସେବାୟତ । ଇସ୍କନ ଅନୁଗାମୀଙ୍କୁ ପୁରୀରେ ପୂରାଇ ନ ଦେବାକୁ ଚେତାବନୀ
କନକ ବ୍ୟୁରୋ: ବିଶ୍ୱ ପ୍ରସିଦ୍ଧ ରଥଯାତ୍ରା ତିଥି ଅନୁସାରେ ୨୦ତାରିଖରେ ପାଳନ ହେବ । କିନ୍ତୁ ମଧ୍ୟପ୍ରଦେଶ ଗ୍ୱାଲିୟର ଇସ୍କନ ପକ୍ଷରୁ ଆସନ୍ତା ୨୪ତାରିଖରେ ରଥଯାତ୍ରା ପାଳିବାକୁ ପ୍ରସ୍ତୁତି ଚାଲିଛି । ସୋସିଆଲ ମିଡିଆରେ ଏହାର ପ୍ରଚାର ପ୍ରସାର ମଧ୍ୟ କରାଯାଉଛି । ତେବେ ଅଦିନିଆ ରଥଯାତ୍ରା ଜଗନ୍ନାଥ ସଂସ୍କୃତି ପ୍ରତି ଘୋର ଅପମାନ ବୋଲି କହିବା ସହ ଏହାକୁ ପ୍ରବଳ ବିରୋଧ କରିଛନ୍ତି ଶ୍ରୀମନ୍ଦିର ସେବାୟତ ।
Kanak News is now on WhatsApp
Join and get latest news updates delivered to you via WhatsApp
୨୦ ତାରିଖରେ ରଥଯାତ୍ରା ହେଉଥିବା ବେଳେ ଇସ୍କନ ପକ୍ଷରୁ ମଧ୍ୟପ୍ରଦେଶର ଗ୍ୱାଲିୟରରେ ଆସନ୍ତା ୨୪ତାରିଖରେ ରଥଯାତ୍ରା କରିବା ପାଇଁ ପ୍ରସ୍ତୁତି ଚାଲିଛି । ଇସ୍କନ ପକ୍ଷରୁ ଏହି ରଥଯାତ୍ରା ପାଳନ ନେଇ ସୋସିଆଲ ମିଡିଆରେ ସୂଚନା ଦିଆଯାଇଛି । ପୂର୍ବରୁ ୧୮ ତାରିଖ ପାଇଁ ଦିନ ଧାର୍ଯ୍ୟ ହୋଇଥିଲା, କୌଣସି କାରଣ ବଶତଃ ଏହାକୁ ୨୪ ତାରିଖକୁ ଘୁଞ୍ଚାଇ ଦିଆଯାଇଛି ।
- ଜୁନ ୨୪ରେ ଗ୍ୱାଲିୟରରେ ଇସ୍କନ କରିବ ରଥଯାତ୍ରା
- ଅଦିନିଆ ରଥଯାତ୍ରାକୁ ତୀବ୍ର ବିରୋଧ କଲେ ସେବାୟତ
- ଇସ୍କନ ଅନୁଗାମୀଙ୍କୁ ପୁରୀରେ ନପୂରାଇ ଦେବାକୁ ଚେତାବନୀ
ଅଦିନିଆ ରଥଯାତ୍ରାକୁ ପୂର୍ବରୁ ମଧ୍ୟ ବିବାଦ ସୃଷ୍ଟି ହୋଇଥିଲା । ଆଲୋଚନା ପରେ ଭାରତରେ ଆଷାଢ଼ ମାସ ଶୁକ୍ଳ ପକ୍ଷ ଦ୍ୱିତୀୟା ତିଥିରେ ରଥଯାତ୍ରା ହେବ ବୋଲି ନିଷ୍ପତି ହୋଇଥିଲା । କିନ୍ତୁ ବିଦେଶରେ ଏଥିପାଇଁ ସମୟ ଲାଗିବ ବୋଲି କହିଥିଲେ ଇସ୍କନ କର୍ତୃପକ୍ଷ । ସେମାନଙ୍କ ଯୁକ୍ତି ଥିଲା, ଶନିବାର, ରବିବାର ଛୁଟିଦିନ ହୋଇଥିବାରୁ ବିଦେଶରେ ହେଉଥିବା ରଥଯାତ୍ରାରେ ଅଧିକ ଜନ ସମାଗମ ହୋଇଥାଏ ।
୨୪ ତାରିଖରେ ଗ୍ୱାଲିୟରରେ ଇସ୍କନ ପକ୍ଷରୁ ରଥଯାତ୍ରା ଆୟୋଜନ ନେଇ ପୋଷ୍ଟର ସୋସିଆଲ୍ ମିଡିଆରେ ପ୍ରକାଶ ପାଇବାରେ ଚିହିଁକି ଉଠିଛନ୍ତି ଶ୍ରୀମନ୍ଦିର ସେବାୟତ । କହିଛନ୍ତି, ଅଦିନିଆ ରଥଯାତ୍ରା ଜଗନ୍ନାଥ ସଂସ୍କୃତି ପ୍ରତି ଘୋର ଅପମାନ । ରଥଯାତ୍ରା କେବେ ହେବ ସ୍କନ୍ଦ ପୁରାଣରେ ଉଲ୍ଲେଖ ରହିଛି । ଯଦି ଏହାକୁ ନମାନି ଇସ୍କନ ଏପରି ଆୟୋଜନ କରିବ, ତେବେ ଇସ୍କନ ଅନୁଗାମୀଙ୍କୁ ପୁରୀରେ ପୂରାଇ ଦିଆଯିବନାହିଁ ବୋଲି ଚେତାବନୀ ଦେଇଛନ୍ତି ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମାଧବ ମହାପାତ୍ର । ଅଦିନିଆ ରଥଯାତ୍ରାକୁ ନେଇ ଦୃଢ଼ ଆଇନ ଆଣିବାକୁ ସେ ଦାବି କରିଛନ୍ତି । ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି, ଏ ନେଇ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ।
ଅଦିନିଆ ରଥଯାତ୍ରାକୁ ନେଇ ବିବାଦ ତେଜୁଥିବା ବେଳେ ଏ ନେଇ ପ୍ରତିକ୍ରିୟା ଦେଇନାହାନ୍ତି ଭୁବନେଶ୍ୱର ଇସ୍କନ କର୍ତୃପକ୍ଷ । ତେବେ କିଛି ଇସ୍କନ ଭକ୍ତଙ୍କ ଯୁକ୍ତି ହେଉଛି, ଦେଶ ବିଦେଶରେ ଶ୍ରୀଜଗନ୍ନାଥ ସଂସ୍କୃତିର ପ୍ରଚାର ପ୍ରସାର ହେଉଛି ମୁଖ୍ୟ ଉଦ୍ଦେଶ୍ୟ, ୯ ଦିନିଆ ରଥଯାତ୍ରା ସମୟରେ ଶ୍ରୀଜିଉଙ୍କ ରଥଯାତ୍ରା କରାଯାଉଛି ।