ବର୍ଷାର ଲୁଚକାଳି ଖେଳ, ଚାଷୀଙ୍କ ପାଇଁ କାଳ । ଏ ବର୍ଷ ଧୋକା ଦେଲା ମୌସୁମୀ, ଟାଇଁଟାଇଁ ଖରା ଚାଷୀଙ୍କୁ କଲାଣି ହତାସ । ଝାରସୁଗୁଡା ଓ ଗଞ୍ଜାମରୁ ଆସିଲା ଚାଷୀ ଦୁର୍ଦ୍ଦଶାର ବିକଳ ଚିତ୍ର ।
କନକ ବ୍ୟୁରୋ: ଜୁଲାଇ ଓ ଅଗଷ୍ଟ ମାସର ବର୍ଷା ରେକର୍ଡକୁ ଦେଖିଲେ ଲାଗୁଛି ଝାରସୁଗୁଡାରେ ଗଜା ମରୁଡି ହେବ କି? ଚଳିତବର୍ଷ ଜୁଲାଇ ମାସରେ ୨୨୭.୬୦ ମିଲିମିଟର ବର୍ଷା ରେକର୍ଡ଼ ହୋଇଥିବା ବେଳେ ଏହା ସ୍ୱାଭାବିକ ଠାରୁ ୧୫୮.୨ ମିଲିମିଟର କମ୍ । ସେହିଭଳି ଅଗଷ୍ଟ ପହିଲାରୁ ୯ ତାରିଖ ସୁଦ୍ଧା ମାତ୍ର ୨.୬୦ ମିଲିମିଟର ବର୍ଷା ହୋଇଛି, ଗତବର୍ଷ ଏହି ସମୟରେ ୧୩୮.୬ ମିଲିମିଟର ବର୍ଷା ହୋଇଥିଲା ଅର୍ଥାତ ଗତବର୍ଷ ତୁଳନାରେ ଏବର୍ଷ ୧୩୬ ମିଲିମିଟର କମ୍ ବର୍ଷା ରେକର୍ଡ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୧୫ ଦିନ ହେଲା ବର୍ଷାର ଦେଖା ନାହିଁ, ପାଣି ଅଭାବରୁ ଧାନ ବିଲ ଫାଟି ଆଁ କରିଛି । ଆଉ ଫଟା ବିଲରେ ବସି ଚାଷୀ ବର୍ଷାକୁ ଅପେକ୍ଷା କରିଛି, ଆକାଶକୁ ଚାହିଁ ରହଛି, ବାଦଲମାନେ ଆକାଶରେ ଭାସି ଯାଉଛନ୍ତି କିନ୍ତୁ ବର୍ଷାର ଦେଖାନାହିଁ । ଫଳରେ ବହୁସ୍ଥାନରେ ପହ୍ଳା ରୁଆ କାମ ମଧ୍ୟ ଅଧାରେ ଅଟକିଛି । ଚାଷ କାମ ଆରମ୍ଭରୁ ବର୍ଷା ହୋଇଥିଲା, ଯାହାକୁ ଆଶ୍ରା କରି ଚାଷୀ ଧାନ ତଳି ଓ ବୁଣା କାମ କରିଥିଲେ । ହେଲେ ପରବର୍ତୀ ସମୟରେ ବର୍ଷା ଉଭାନ ସାଙ୍ଗକୁ ଉଠା ଜଳ ସେଚନ ବ୍ୟବସ୍ଥା ନଥିବାରୁ ଚାଷୀଙ୍କ ମୁଣ୍ଡରେ ଚଡକ ପଡିଛି ।
ସେହିପରି ଗଞ୍ଜାମ ଜିଲ୍ଲାର ବୁଗୁଡାରେ ବର୍ଷା ଅଭାବରୁ ଗଜା ମରୁଡିର ପଦଧ୍ୱନୀ ଦେଖିବାକୁ ମିଳିଲାଣି । ଏପଟେ ବର୍ଷା ନାହିଁ, ସେପଟେ ବୁଗୁଡାର ୮ ହଜାର ୩୬୭ ଏକର ଜମିକୁ ପାଣି ଯୋଗାଉଥିବା ବାଘୁଆ ଡ୍ୟାମ କେନାଲ ବି ଶୁଖିଲା ପଡିଛି । ଫଳରେ ତଳି ଜଳି ଗଲାଣି । ହେକ୍ଟର ହେକ୍ଟର ଜମି ଫାଟି ଆଁ କଲାଣି । ତଳି ବଞ୍ଚେଇ ରଖିବା ପାଇଁ କିଛି ଚାଷୀ ମଟର ଲଗାଇ, ନଳକୂଅରୁ ପାଣି ଆଣି ଜମିରେ ମଡାଉଛନ୍ତି ହେଲେ ତାହା ପର୍ଯ୍ୟାପ୍ତ ନୁହେଁ । ତେଣୁ ଆଗକୁ ଯଦି ବର୍ଷା ନହୁଏ, ତେବେ ମରୁଡି ଆଶଙ୍କାକୁ ଏଡାଇବା ବିଲକୁଲ୍ ସହଜ ନୁହେଁ ।
ଆଗାମୀ ସପ୍ତାହେ ମଧ୍ୟରେ ବର୍ଷା ନହେଲେ ଧାନ ଫସଲ ନଷ୍ଟ ହେବ ବୋଲି ଆଶଙ୍କା ପ୍ରକାଶ ପାଇଥିବା ବେଳେ ଜଳସେଚନ ପ୍ରକଳ୍ପ ଗୁଡିକ କାମରେ ଆସୁନଥିବାରୁ ଚାଷୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।