କିଏ ନେଲା ଧାନ ବସ୍ତା ବାବଦକୁ ସରକାର ଦେଇଥିବା ଟଙ୍କା? ୧୦ ବର୍ଷ ହେଲା ବରଗଡ ଜିଲ୍ଲାରେ ଚାଷୀଙ୍କୁ ମିଳୁନି ବସ୍ତା ଟଙ୍କା । ସରକାରୀ ରିପୋର୍ଟରେ ଦର୍ଶାଯାଇଛି ବସ୍ତା ବାବଦକୁ ଖର୍ଚ୍ଚ ହୋଇଛି କୋଟି କୋଟି ଟଙ୍କା ।
କନକ ବ୍ୟୁରୋ: ଖାଦ୍ୟ ନୀତି ଅନୁସାରେ, ମଣ୍ଡିରେ ଧାନର ମାନ ଯାଞ୍ଚ କରିବା ପରେ ଧାନକ୍ରୟ ସଂସ୍ଥା ଦ୍ୱାରା ଧାନ କିଣି ମିଲକୁ ପଠାଯାଏ । ମଣ୍ଡିରୁ ମିଲକୁ ଧାନ ଯିବା ବେଳେ ସରକାର ବସ୍ତା ଦେବାର ବ୍ୟବସ୍ଥା ରହିଛି । ତେବେ ବରଗଡ ଜିଲ୍ଲାରେ ଗତ ୧୦ ବର୍ଷ ଭିତରେ ଚାଷୀଙ୍କ ପାଇଁ କେତେ ବସ୍ତା ଆସିଛି? ଏ ବାବଦରେ କେତେ ଟଙ୍କା ଖର୍ଚ୍ଚ ହୋଇଛି? ଆରଟିଆଇ ଆକ୍ଟ ଆଧାରରେ ଏସବୁର ତଥ୍ୟ ଜାଣିବାକୁ ଚେଷ୍ଟା କରିଥିଲେ ରମେଶ ମହାପାତ୍ର ନାମକ ଜଣେ ଚାଷୀ । ଆଉ ଏବେ ଯେଉଁ ତଥ୍ୟ ଆସିଛି, ତାହା ସମସ୍ତଙ୍କୁ ଆଶ୍ଚଯ୍ୟ କରିଛି ।
Kanak News is now on WhatsApp
Join and get latest news updates delivered to you via WhatsApp
ବରଗଡ ଯୋଗାଣ ବିଭାଗ ପକ୍ଷରୁ କୁହାଯାଇଛି, ବସ୍ତା ବାବଦକୁ ୧୦ ବର୍ଷରେ ଖର୍ଚ୍ଚ ହୋଇଛି, ୨୨୦୬ କୋଟି ୯୨ ଲକ୍ଷ ୨୫ ହଜାର ୩୯୬ ଟଙ୍କା । ସେହିଭଳି ରାଜ୍ୟ ଖାଉଟି ଯୋଗାଣ ବିଭାଗର ତଥ୍ୟ କହୁଛି, ଧାନବସ୍ତା ବାବଦକୁ ଏକ କ୍ୱିଣ୍ଟାଲ ପିଛା ଚାଷୀଙ୍କୁ ୯୫ ଟଙ୍କା ଦିଆଯାଉଛି । ହେଲେ ଚାଷୀଙ୍କ ଅଭିଯୋଗ ବସ୍ତା ବାବଦରେ ଟଙ୍କା ଦିଆଯାଉନାହିଁ ।
ସବୁଠାରୁ ଆଶ୍ଚଯ୍ୟକର କଥା ହେଉଛି, ବରଗଡ ଜିଲ୍ଲାରେ ଚାଷୀ ନିଜ ଘରୁ ବସ୍ତାରେ ଧାନ ଭର୍ତ୍ତି କରି ମଣ୍ଡିକୁ ଆଣୁଛନ୍ତି । ସେହି ବସ୍ତାରେ ହିଁ ଧାନ ମଣ୍ଡିକୁ ଯାଉଛି । ଏଥିପାଇଁ ଯୋଗାଣ ବିଭାଗ ଚାଷୀଙ୍କୁ ଟଙ୍କା ଦେବା କଥା, ହେଲେ ସେ ଟଙ୍କା ଚାଷୀଙ୍କୁ ଦିଆଯାଉନଥିବା ବେଳେ କୁଆଡେ ଯାଉଛି ବୋଲି ଚାଷୀ ଅଭିଯୋଗ କରିଛନ୍ତି । ସେପଟେ ଜିଲ୍ଲା ଯୋଗାଣ ଅଧିକାରୀ ନିଜ ମୁଣ୍ଡରୁ ସବୁ ଦୋଷ ଛଡେଇ ଦେଇ ବ୍ୟବସାୟିକ ସଂସ୍ଥା ଉପରେ ଲଦି ଦେଇଛନ୍ତି । ବସ୍ତା ବାବଦକୁ ଆସିଥିବା କୋଟି କୋଟି ଟଙ୍କା କିଏ ନେଲେ, କୁଆଡେ ଗଲା ଏହାର ଉଚ୍ଚସ୍ତରୀୟ ତଦନ୍ତ ଦାବି କରି ଆଗାମୀ ଦିନରେ କୋର୍ଟଙ୍କ ଦ୍ୱାରସ୍ଥ ହେବା ସହ ଆନ୍ଦୋଳନ କରିବେ ବୋଲି ଚାଷୀ ଚେତାବନୀ ଦେଇଛନ୍ତି ।