ରାଜ୍ୟରେ ଥମୁନି ଜେଲ ଅନ୍ତେବାସୀଙ୍କ ମୃତ୍ୟୁ ଘଟଣା । ମାଲାକନଗିରି ଉପ କାରାଗାରରୁ ପୁଣି ଜଣେ ଅନ୍ତେବାସୀଙ୍କ ଝୁଲନ୍ତା ମୃତଦେହ ଉଦ୍ଧାର ।
କନକ ବ୍ୟୁରୋ : ରାଜ୍ୟରେ ଥମୁନି ଜେଲ ଅନ୍ତେବାସୀଙ୍କ ମୃତ୍ୟୁ ଘଟଣା । ମାଲାକନଗିରି ଉପ କାରାଗାରରୁ ପୁଣି ଜଣେ ଅନ୍ତେବାସୀଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ଗତକାଲି ଭୋର ସମୟରୁ ପାଇଖାନା ଭିତରୁ ପୁଣି ଜଣେ ଅନ୍ତେବାସୀଙ୍କ ଝୁଲନ୍ତା ମୃତ ଦେହ ଉଦ୍ଧାର ହୋଇଛି । ଗୋଟିଏ ହତ୍ୟା ମାମଲାରେ ମାଲକାନଗିରି ଏମଭି ୩୩ ଗାଁର ବିଧାନ ମିର୍ଧା ଓ ତାଙ୍କ ଦ୍ୱିତୀୟ ପତ୍ନୀ ଗତ ୪ ବର୍ଷ ଧରି ବିଚାରୀଧୀନ କଏଦୀ ଭାବେ ସଜା କାଟୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହା ପୂର୍ବରୁ ୨୦୨୦ ଡିସେମ୍ବରରେ ମାଲକାନଗିରି ଉପକାରାଗରରେ ଜଣେ ବିଚାରାଧିନ କଏଦୀ ନିଜ ବେକ କାଟି ଆତ୍ମହତ୍ୟା କରିଥିଲେ । ୨୦୧୬ ଅଗଷ୍ଟ ଓ ସେପ୍ଟେମ୍ବର ମାସରେ ଦୁଇ କଏଦୀଙ୍କ ଝୁଲନ୍ତା ମୃତ ଦେହ ଉଦ୍ଧାର ହୋଇଥିଲା । କେବଳ ଓଡିଶାରେ ଗତ ୧୦ ବର୍ଷରେ ୫୪୬ ଜଣ ଅନ୍ତେବାସୀ ଆତ୍ମହତ୍ୟା କରିଥିବା ନେଇ ଗୃହରେ ବିଧାୟକ ସୌମ୍ୟରଂଜନ ପଟ୍ଟାନାୟକଙ୍କ ପ୍ରଶ୍ନ ଉତର ରଖିଥିଲେ ଗୃହ ରାଜ୍ୟ ମନ୍ତ୍ରୀ ତୁଷାରୀକାନ୍ତ ବେହେରା ।
ସାରା ଭାରତ ବର୍ଷ ତୁଳନାରେ ଉତର ପ୍ରଦେଶ ପରେ ଓଡିଶା ଜେଲରେ ମାନସିକ ରୋଗୀଙ୍କ ସଂଖ୍ୟା ସର୍ବାଧିକ । ରାଜ୍ୟରେ ୮୭ଟି ଜେଲରେ ୮୦୦ ରୁ ଅଧିକ ମାନସିକ ଭାବେ ଦୁର୍ବଳ ଅନ୍ତେବାସୀ ଥିବା ନେଇ ଜେଲ ଡିଜି ମନୋଜ କୁମାର ଛାବ୍ରା ସୂଚନା ଦେଇଛନ୍ତି । ମାଲକାନଗିରି ଜିଲ୍ଲାରେ ସର୍ବାଧିକ ମାନସିକ ରୋଗୀ ଥିବା ବେଳେ କୋରାପୁଟ ଓ ଜୟପୁର ଦ୍ୱିତୀୟ ଏବଂ ତୃତୀୟ ସ୍ଥାନରେ ରହିଛି । ଗତ ଡିସେମ୍ବର ମାସରେ ବହୁ ଚର୍ଚ୍ଚିତ ମମିତା ମେହେର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କ ଜେଲ ଭିତରେ ମୃତ୍ୟୁ ହୋଇଥିଲା । ଏହା ପରେ ରାଜ୍ୟର ସମସ୍ତ ଜେଲରେ ଅନ୍ତେବାସୀଙ୍କ ମାନସିକ ସ୍ଥିତି ଯାଞ୍ଚ ଲାଗି ବ୍ୟବସ୍ଥା ଆରମ୍ଭ ହୋଇ ଥିଲା । ତଥାପି କିନ୍ତୁ ଜେଲ ଭିତରେ ଅନ୍ତେବାସୀଙ୍କ ମୃତ୍ୟୁ ଥମିବାର ନାଁ ଧରୁନାହିଁ ।