ସୂର୍ଯ୍ୟପରାଗ ଦେଖିବାରେ ବାଧକ ସାଜିଲା ମେଘାଚ୍ଛନ୍ନ ଆକାଶ : ବିରଳ ମହାଜାଗତିକ ଦୃଶ୍ୟ ଦେଖିବାରୁ ବଞ୍ଚିତ ହୋଇଛନ୍ତି ଦେଖଣାହାରୀ
କନକ ବ୍ୟୁରୋ : ବହୁଚର୍ଚ୍ଚିତ ବିରଳ ବଳୟ ସୂର୍ଯ୍ୟପରାଗ ଦେଖିବାକୁ ଆସିଥିବା ହଜାର ହଜାର ସଂଖ୍ୟାରେ ଛାତ୍ରଛାତ୍ରୀ ନିରାଶ ହୋଇଛନ୍ତି । ଆକାଶ ମେଘାଚ୍ଛନ୍ନ ଥିବା ହେତୁ ସବୁ ବ୍ୟବସ୍ଥା ଥାଇ ମଧ୍ୟ ଏହି ବିରଳ ମହାଜାଗତିକ ଦୃଶ୍ୟ ଦେଖିବାରୁ ବଞ୍ଚିତ ହୋଇଛନ୍ତି ଦେଖଣାହାରୀ । ଭୁବନେଶ୍ବରସ୍ଥିତ ପଠାଣି ସାମନ୍ତ ପ୍ଲାନେଟୋରିୟମ୍ ଏବଂ ବୁର୍ଲ୍ଲାସ୍ଥିତ ଏପିଜେ ଅବ୍ଦୁଲ କାଲାମ୍ ପ୍ଲାନେଟୋରିୟମକୁ ସୂର୍ୟ୍ୟୋପରାଗ ଦେଖିବାକୁ ଆସିଥିବା ଛାତ୍ରଛାତ୍ରୀ, ଅଭିଭାବକ ଏବଂ ଜନସାଧାରଣ ମେଘାଚ୍ଛନ୍ନ ଆକାଶ ଯୋଗୁଁ କ୍ଷୟପ୍ରାପ୍ତ ସୂର୍ୟ୍ୟଙ୍କୁ ଆଦୌ ଦେଖିପାରିନାହାନ୍ତି । ବୁର୍ଲାରେ ଝିପିଝିପି ବର୍ଷା ହେଉଥିବା ବେଳେ ଭୁବନେଶ୍ବରରେ ପାଗ ମେଘୁଆ ରହିଛି। ବହୁ ଛାତ୍ରଛାତ୍ରୀ ସୌରଚଷମା କିଣିଥିଲେ ହେଁ ତାର ଉପଯୋଗ କରିପାରି ନାହାନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ କି ପ୍ଲାନେଟୋରିୟମ୍ ପକ୍ଷରୁ ସୌର ଚଷମା, ୧୪ ନମ୍ବର ୱେଲ୍ଡିଂ କାଚ, ପିନ୍ ହୋଲ୍ ପ୍ରକ୍ଷେପଣ ଓ ଦର୍ପଣର ପ୍ରତିଫଳନ ମାଧ୍ୟମରେ ସୂର୍ଯ୍ୟୋପରାଗ ଦେଖିବା ବ୍ୟବସ୍ଥା ହୋଇଥିଲା । ତେବେ ସୂର୍ଯ୍ୟୋପରାଗ ଆରମ୍ଭ ହେଉଥିବା ସମୟରେ ଅଳ୍ପ କିଛି ମିନିଟ୍ ଲାଗି ଏହି ଦୃଶ୍ୟ କିଛି ଦର୍ଶକ ଦେଖିବାକୁ ପାଇଥିବା କହିଛନ୍ତି।
ସୂଚନା ମୁତାବକ, ପୂର୍ବରୁ ପ୍ଲାନେଟୋରିୟମ୍ ପକ୍ଷରୁ କୁହାଯାଇଥିଲା କି ସକାଳ ୯ଟା ୪୬ ମିନିଟରେ ଓଡ଼ିଶାରେ ସୂର୍ଯ୍ୟୋପରାଗର ସର୍ବାଧିକ ଅଂଶ ଦେଖାଯିବ। ଏହି ସମୟରେ ଚନ୍ଦ୍ର ସୂର୍ଯ୍ୟକୁ ପ୍ରାୟ ୫୫ରୁ ୬୬ ପ୍ରତିଶତ ଘୋଡ଼ାଇଦେବ । ସୂର୍ଯ୍ୟର ଆଲୋକ ମଳିନ ଦେଖାଯିବା ସହ ଏହା ଅଧା ଖଣ୍ଡିଆ ଆକାରରେ ଦୃଶ୍ୟମାନ ହେବ ।
ତେଣୁ ଅଧିକାଂଶ ଦର୍ଶକ ଏହି ସମୟକୁ ଉପଭୋଗ କରିବାକୁ ଅପେକ୍ଷା କରି ରହିଥିଲେ, ପ୍ରତିକୂଳ ପାଗ ହେତୁ ସେମାନଙ୍କୁ ନିରାଶ ହେବାକୁ ପଡ଼ିଛି। ରାଜ୍ୟର ଅନ୍ୟ ସ୍ଥାନରେ ମଧ୍ୟ ପାଗ ମେଘୁଆ ରହିଥିବାରୁ ସମାନ ପରିସ୍ଥିତି ଉପୁଜିଛି । ସମ୍ବଲପୁର, ବାଲେଶ୍ବର ଓ ପୁରୀରେ ସୂର୍ଯ୍ୟୋପରାଗ ସ୍ପଷ୍ଟ ଦେଖାଯାଉ ନ ଥିବା ଖବର ହସ୍ତଗତ ହୋଇଛି । ଏହି ମହାଜାଗତିକ ଦୃଶ୍ୟ ସମଗ୍ର ଓଡ଼ିଶାରେ ଆଂଶିକ ଭାବେ ଦେଖାଯାଉଛି । ଓଡ଼ିଶାରେ ସକାଳ ୮ଟା ୧୯ ମିନିଟରୁ ସୂର୍ଯ୍ୟୋପରାଗ ଆରମ୍ଭ ହୋଇଛି ଏବଂ ପୂର୍ବାହ୍ନ ୧୧ଟା ୨୮ ମିନି୍ଟରେ ଶେଷ ହେବ ।