କଂଗ୍ରେସ ନେତା ଅଜୟ ମାକେନଙ୍କ ଦାବି, ଅରବିନ୍ଦ କେଜ୍ରିୱାଲଙ୍କ ବାସଭବନ ପାଇଁ ୪୫ ନୁହେଁ ଖର୍ଚ୍ଚ ହୋଇଛି ୧୭୧ କୋଟି ଟଙ୍କା
କନକ ବ୍ୟୁରୋ : ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ମୁଖ୍ୟମନ୍ତ୍ରୀ ଆବାସକୁ ନେଇ ଆରୋପ ପ୍ରତ୍ୟାରୋପ ଲାଗି ରହିଛି । ବିଜେପି ଠାରୁ ନେଇ କଂଗ୍ରେସ ପର୍ଯ୍ୟନ୍ତ ଏହି ପ୍ରସଙ୍ଗରେ କେଜ୍ରିୱାଲକୁ ଘେରିବାରେ ଲାଗିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି କ୍ରମରେ ଆଜି କଂଗ୍ରେସ ନେତା ଅଜୟ ମାକେନ ଏକ ସାମ୍ବାଦିକ ସମ୍ମିଳନୀ କରି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଉପରେ ଗମ୍ଭୀର ଅଭିଯୋଗ ଆଣିଛନ୍ତି । ସେ କହିଛନ୍ତି କି, କେଜ୍ରିୱାଲ ନିଜକୁ ସାଧାରଣ ଲୋକ ବୋଲି ଦେଖେଇ ହେବାକୁ ନିଜ ସାଇଜ୍ ଠାରୁ ବଡ ସାଇଜର କପଡା ପିନ୍ଧୁଛନ୍ତି ଓ ଟଙ୍କିକିଆ କଲମ ପକେଟରେ ଲଗାଉଛନ୍ତି । ହେଲେ ନିଜ ପାଇଁ ମୁଖ୍ୟମନ୍ତ୍ରୀ ବାସ ଭବନ ନାମରେ ରାଜକୋଷରୁ ୧୭୧ କୋଟି ଟଙ୍କା ଖର୍ଚ୍ଚ କରୁଛନ୍ତି । ମାକେନ ଦାବି କରିଛନ୍ତି କି କେଜ୍ରିୱାଲଙ୍କ ମୁଖ୍ୟମନ୍ତ୍ରୀ ଆବାସ ମରାମତିରେ ୪୫ କୋଟି ଟଙ୍କା ନୁହେଁ ବରଂ ୧୭୧ କୋଟି ଟଙ୍କା ଖର୍ଚ୍ଚ କରାଯାଇଛି ।
କେବଳ ସେତିକି ନୁହେଁ ମାକେନ ଅଭିଯୋଗ କରିଛନ୍ତି ଯେ, କେଜ୍ରିୱାଲଙ୍କ ମୁଖ୍ୟମନ୍ତ୍ରୀ ବାସଭବନ ବଢାଇବା ପାଇଁ ଅଧିକାରୀଙ୍କର ଘର ଭଙ୍ଗା ଯାଇଛି ଓ ଅଧିକାରୀଙ୍କ ପାଇଁ ୧୨୬ କୋଟି ଟଙ୍କାର ୨୧ଟି ଫ୍ଲାଟ କିଣାଯାଇଛି । ଏହି ଖର୍ଚ୍ଚକୁ ବି କେଜ୍ରିୱାଲଙ୍କ ବାସଭବନ ମରାମତି ଖର୍ଚ୍ଚସହ ଯୋଡା ଯିବାର ଆବଶ୍ୟକତା ରହିଛି ବୋଲି ଅଜୟ ମାକେନ ଦାବି କରିଛନ୍ତି ।