ସମୟ ଗଡୁଛି ସନ୍ଦେହ ବଢୁଛି : କେବେହେବ ବିଜେପୁର ଉପନିର୍ବାଚନ ପାଇଁ ତାରିଖ ଘୋଷଣା
କନକ ବ୍ୟୁରୋ : ରାଜ୍ୟ ପରେ ରାଜ୍ୟର ଉପନିର୍ବାଚନ ତାରିଖ ଘୋଷଣା ହେଉଛି । ହେଲେ ଘୋଷଣା ହେଉନାହିଁ ବିଜେପୁର ଉପନିର୍ବାଚନର ତାରିଖ । ସେପଟେ ବିଧାୟକ ସୁବଳ ସାହୁଙ୍କ ମୃତ୍ୟୁକୁ ଫେବ୍ରୁୟାରୀ ୧୮ ତାରିଖରେ ୬ ମାସ ପୁରୁଛି । ଅଗଷ୍ଟ ମାସରେ ବିଜେପୁର ବିଧାୟକ ସୁବଳ ସାହୁଙ୍କ ଦେହାନ୍ତ ହୋଇଥିଲା । ସେହି ଦିନକୁ ହିସାବ କଲେ ଫେବ୍ରୁୟାରୀ ୧୮ ତାରିଖ 
ଅର୍ଥାତ ବିଧାୟକ ପଦ ଖାଲି ପଡିବାର ୬ ମାସ ଭିତରେ ନିର୍ବାଚନ ହେବା କଥା । ହେଲେ ଏହି ତାରିଖକୁ ନେଇ ସୃଷ୍ଟି ହୋଇଛି ଦ୍ୱନ୍ଦ୍ୱ । କାରଣ ବିଜେପୁର ନିର୍ବାଚନ ମାମଲାକୁ ଅକ୍ଟୋବର ମାସରେ ଖାରଜ କରି ନିର୍ବାଚନ ପାଇଁ ପଥ ପରିଷ୍କାର କରିଥିଲେ ହାଇକୋର୍ଟ । ଏହି ଦିନକୁ ହିସାବକୁ ନେଲେ ଏପ୍ରିଲ ୧୬ ତାରିଖରେ ପୂରିବ ୬ ମାସ ।
Kanak News is now on WhatsApp
Join and get latest news updates delivered to you via WhatsApp
ସୁବଳ ସାହୁଙ୍କ ମୃତ୍ୟୁ ତାରିଖକୁ ହିସାବକୁ ନିଆଯିବ ନା ଯେଉଁଦିନ ହାଇକୋର୍ଟ ବିଜେପୁର ନିର୍ବାଚନ ମାମଲାକୁ ଖାରଜ କରିଥିଲେ, ତାକୁ ହିସାବକୁ ନିଆଯିବ, ସେ ନେଇ ସୃଷ୍ଟି ହୋଇଛି ବଡ଼ ଧରଣର ସଂଶୟ । ସେପଟେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି, ନିର୍ବାଚନ ପାଇଁ ପ୍ରସ୍ତୁତି ଶେଷ ହୋଇଛି । ଗୁଜରାଟରୁ ଇଭିଏମ୍ ଓ ଭିଭିପାଟ୍ ମେସିନ୍ ମଧ୍ୟ ପହଁଚିଛି । କେବଳ ଅପେକ୍ଷା କେବେ ନିର୍ବାଚନ ତାରିଖ ଘୋଷଣା କରିବେ ନିର୍ବାଚନ କମିସନ୍ ।
ବିଜେପୁର ଆସନ, ରାଜ୍ୟର ଦୁଇ ପ୍ରମୁଖ ଦଳ ବିଜେଡି ଓ ବିଜେପି ପାଇଁ ସମ୍ମାନର ପ୍ରଶ୍ନ ହୋଇ ରହିଛି । ବିଜେଡି ଅଭିଯୋଗ କରିଛି, ମୋଦି ସରକାରଙ୍କ ଚାପରେ ବିଜେପୁର ଉପନିର୍ବାଚନର ତାରିଖ ଘୋଷଣା କରୁନାହାନ୍ତି ନିର୍ବାଚନ କମିସନ୍ । ଯେଉଁ ଅଭିଯୋଗକୁ ଭିତ୍ତିହୀନ କହିଛି ବିଜେପି ।