ଆଦର୍ଶ ବିଦ୍ୟାଳୟରେ ଶିକ୍ଷକ ଅଭାବ । ଏବେ ବି ଫାଙ୍କା ପଡିଛି ୧୫୬୧ ଶିକ୍ଷକ ଓ ୧୬୬ ଜଣ ଅଣଶିକ୍ଷକ ପଦବୀ । ଗୃହରେ ଉତ୍ତର ରଖିଲେ ମନ୍ତ୍ରୀ ।
କନକ ବ୍ୟୁରୋ : ଆଦର୍ଶ ବିଦ୍ୟାଳୟରେ ଶିକ୍ଷକ ଅଭାବ । ଖାଲି ପଡିଛି ୧୫୬୧ ଶିକ୍ଷକ ଓ ୧୬୬ ଜଣ ଅଣଶିକ୍ଷକ ପଦବୀ । ବିଧାନସଭା ଅଧିବେଶନରେ ଏନେଇ ଗୃହରେ ତଥ୍ୟ ରଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ।
Kanak News is now on WhatsApp
Join and get latest news updates delivered to you via WhatsApp
ବିଧାନସଭାର ଦ୍ୱିତୀୟ ପର୍ଯ୍ୟାୟ ଅଧିବେଶନ ଆଜି ଆରମ୍ଭ ହୋଇଥିବା ବେଳେ ବିଜେପି ବିଧାୟକ ମୋହନ ଚରଣ ମାଝୀ ଆଦର୍ଶ ବିଦ୍ୟାଳୟ ସମ୍ପର୍କିତ କିଛି ପ୍ରଶ୍ନର ଉତ୍ତର ଜାଣିବାକୁ ଚାହିଁଥିଲେ । ଆସନ୍ତା ଶିକ୍ଷାବର୍ଷରୁ ସମସ୍ତ ବ୍ଲକରେ ଆଦର୍ଶ ବିଦ୍ୟାଳୟରେ ପାଠପଢା ଆରମ୍ଭ ନିମନ୍ତେ କି ପଦକ୍ଷେପ କେଉଁ ପର୍ଯ୍ୟାୟରେ ପହଞ୍ଚିଛି । ସମସ୍ତ ଆଦର୍ଶ ବିଦ୍ୟାଳୟ ନିମନ୍ତେ କେତେ ସଂଖ୍ୟକ ଶିକ୍ଷକଙ୍କର ଆବଶ୍ୟକତା ରହିଛି? କେତେ ସଂଖ୍ୟକ ଶିକ୍ଷକ ପଦବୀ ଫାଙ୍କା ପଡିଛି, ଚଳିତବର୍ଷ ଶିକ୍ଷା ବର୍ଷ ଆରମ୍ଭ ସୁଦ୍ଧ କେତେ ପଦବୀ ପୂରଣ କରାଯିବ ସେନେଇ ଉତ୍ତର ଜାଣିବାକୁ ଚାହିଁଥିଲେ ।
ଏହାର ଉତ୍ତରରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ତୁଷାରକାନ୍ତି ବେହେରା କହିଛନ୍ତି, ୨୦୨୨-୨୩ ଶିକ୍ଷାବର୍ଷରେ ସମସ୍ତ ବ୍ଲକରେ ଆଦର୍ଶ ବିଦ୍ୟାଳୟରେ ପାଠପଢା ଆରମ୍ଭ ହୋଇଛି । ଛାତ୍ରଛାତ୍ରୀ ଓ ଶିକ୍ଷକଙ୍କ ଅନୁପାତ ୨୫:୧ ଏବଂ ଶୈକ୍ଷିକ ଆବଶ୍ୟକତାକୁ ଦୃଷ୍ଟିରେ ରଖି ପ୍ରତି ଆଦର୍ଶ ବିଦ୍ୟାଳୟରେ ଷଷ୍ଠରୁ ଦଶମ ଏବଂ ଏକାଦଶ-ଦ୍ୱାଦଶ ବିଜ୍ଞାନ ତଥା ବାଣିଜ୍ୟ ଶ୍ରେଣୀ ପାଇଁ ୨୩ଟି ଶିକ୍ଷକ ଓ ୫ଟି ଅଣଶିକ୍ଷକ ପଦବୀକୁ ମଞ୍ଜୁରୀ ପ୍ରଦାନ କରାଯାଇଛି । ଏବେ ଆବଶ୍ୟକତା ଦୃଷ୍ଟିରୁ ୫୭୭୨ଟି ପଦବୀକୁ ମଞ୍ଜୁରୀ ପ୍ରଦାନ କରାଯାଇଛି । ଏହାସତ୍ତେ୍ୱ ମଧ୍ୟ ଏବେ ୧୫୬୧ ଶିକ୍ଷକ ଓ ୧୬୬ ଜଣ ଅଣଶିକ୍ଷକ ପଦବୀ ଖାଲି ରହିଛି । ଏହି ପଦବୀକୁ ଖୁବଶୀଘ୍ର ପୂରଣ କରିବାକୁ ପଦକ୍ଷେପ ନେଉଛନ୍ତି ସରକାର । ସେହିଭଳି ଏଯାବତ୍ ୬୫ଟି ଆଦର୍ଶ ବିଦ୍ୟାଳୟର କାର୍ଯ୍ୟ ଶେଷ ହୋଇନଥିବା ତଥ୍ୟ ସାମ୍ନାକୁ ଆସିଛି ।