ପାକିସ୍ତାନରେ ହୋଇନପାରେ ଏସିଆ କପ୍ ! ଭାରତ ଦେଲା ବଡ ଝଟକା, ଜାଣନ୍ତୁ ଏସିଆ କପ୍ ଆୟୋଜନ ରେସରେ କିଏ ଆଗରେ?
କନକ ବ୍ୟୁରୋ : ପାକିସ୍ତାନ କ୍ରିକେଟ ବୋର୍ଡକୁ ଲାଗିବ ବଡ ଝଟକା । କାରଣ ପାକିସ୍ତାନରେ ଖେଳାଯିବନି ଏସିଆ କପ୍ । ପାକିସ୍ତାନ ବଦଳରେ ଅନ୍ୟ କୌଣସି ଦେଶରେ ଏସିଆ କପ୍ ଖେଳାଯିବା ନେଇ ବିଚାର ଚାଲିଛି । ପୂର୍ବରୁ ପାକିସ୍ତାନରେ ଏସିଆ କପ୍ ଖେଳାଯିବା ନେଇ ନିର୍ଦ୍ଧାରିତ ହୋଇଥିଲା । କିନ୍ତୁ ପାକିସ୍ତାନରେ ଏସିଆ କପ୍ ଖେଳାଗଲେ ଭାରତ ନିଜର ଟିମ୍ ପଠାଇବ ନାହିଁ ବୋଲି ମନା କରିଥିଲା । ଯାହାଫଳରେ ପାକିସ୍ତାନରେ ଏହି ଟୁର୍ଣ୍ଣାମେଣ୍ଟ ଖେଳାଯିବ କି ନାହିଁ ତାହାକୁ ନେଇ ପ୍ରଶ୍ନ ଉଠିବା ଆରମ୍ଭ ହୋଇଥିଲା । ତେବେ ଏହି ଟୁର୍ଣ୍ଣାମେଣ୍ଟରେ ଯେପରି ଭାରତ ଭାଗ ନେଇପାରିବ ସେଥିପାଇଁ ଏସିଆ କପରେ ହାଇବ୍ରିଡ ମଡେଲ ଆପଣାଇବାକୁ ପାକିସ୍ତାନ କହିଥିଲା । ହାଇବ୍ରିଡ ମଡେଲ ଅନୁଯାୟୀ, ପାକିସ୍ତାନ ନିଜର ମ୍ୟାଚ୍ ହୋମ ଭେନ୍ୟୁରେ ଖେଳିବାକୁ ଥିବା ବେଳେ ଭାରତ ମ୍ୟାଚ୍ ପାଇଁ ଅନ୍ୟ ଏକ ଭେନ୍ୟୁ ନିର୍ଦ୍ଧାରିତ ହୋଇଥାଆନ୍ତା । ଅଥାର୍ତ ଭାରତ ଏସିଆ କପରେ ଭାଗ ନେଇ ୟୁଏଇରେ ମ୍ୟାଚ୍ ଖେଳିଥାନ୍ତା । କିନ୍ତୁ ଏହି ହାଇବ୍ରିଡ୍ ମଡେଲକୁ ଅନ୍ୟ ଦେଶ ପସନ୍ଦ କରିନଥିଲେ । କାରଣ ଏହି ପ୍ରସାରଣକାରୀ ସଂସ୍ଥା ଏହି ଟୁର୍ଣ୍ଣାମେଣ୍ଟ ପାଇଁ ଭିନ୍ନ ଭିନ୍ନ ଟିମ୍ ଭିନ୍ନ ଦେଶକୁ ପଠାଇବା ସପକ୍ଷରେ ନଥିଲେ । ସେହିଭଳି ଭାରତ ସହ ମ୍ୟାଚ୍ ଖେଳିବାକୁ ପାକିସ୍ତାନରୁ ୟୁଏଇକୁ ବିମାନରେ ଯିବା ଆସିବା ପ୍ରସ୍ତାବକୁ ମଧ୍ୟ ଏସିସିର ସଦସ୍ୟ ଖାରଜ କରିଥିଲେ । ଯେଉଁଥିପାଇଁ ଏସିସି ବୈଠକରେ ପାକିସ୍ତାନର ହାଇବ୍ରିଡ ମଡେଲକୁ କେହି ସମର୍ଥନ କରିନଥିଲେ । କିନ୍ତୁ ଏବେ ପ୍ରଶ୍ନ ଉଠୁଛି, ଯଦି ପାକିସ୍ତାନରେ ଏସିଆ କପ୍ ଆୟୋଜିତ ହେବନି ତେବେ କେଉଁ ଦେଶରେ ଏହି ଟୁର୍ଣ୍ଣାମେଣ୍ଟ ଖେଳାଯିବ?
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ପାକିସ୍ତାନର ବିକଳ୍ପ ଭେନ୍ୟୁ ଭାବେ ୟୁଏଇକୁ ନେଇ ଚର୍ଚ୍ଚା ହେଉଥିଲା । କିନ୍ତୁ ସେପ୍ଟେମ୍ବରରେ ୟୁଏଇର ପରିବେଶ ଖେଳାଳୀଙ୍କୁ ଏତେଟା ସୁହାଇବନି । ତେଣୁ ଏସିଆ କପ ଆୟୋଜନ ରେସରେ ଏବେ ଶ୍ରୀଲଙ୍କା ଆଗରେ ରହିଛି । ଶ୍ରୀଲଙ୍କାର ଯେଉଁ କେତୋଟି ଷ୍ଟାଡିୟମ ଖେଳାଯିବ ପରସ୍ପର ମଧ୍ୟରେ ତାହାର ଦୂରତା କମ । ତେଣୁ ବିଭିନ୍ନ ଷ୍ଟାଡିୟମକୁ ଯାତ୍ରା ପାଇଁ ଅଧିକ ସମୟର ଆବଶ୍ୟକତା ପଡିବନି । ତେବେ ଏଭଳି ନିଷ୍ପତ୍ତି ନିଆଯିବା ପାଇଁ କାର୍ଯ୍ୟକାରୀ ସମିତିର ଅନୁମତି ଆବଶ୍ୟକ । ତେଣୁ ଆସନ୍ତା ମାସରେ ଏନେଇ ଏସିସିର ବୈଠକ ହେବା ସହ ଚୂଡାନ୍ତ ନିଷ୍ପତ୍ତି ନିଆଯାଇପାରେ ।
ଅନ୍ୟପଟେ ଯଦି ଏମିତି ହୁଏ ତେବେ ପାକିସ୍ତାନ ଏସିଆ କପରେ ଭାଗ ନେବ କି ନାହିଁ ତାହା ସବୁଠୁ ବଡ ପ୍ରଶ୍ନ । ଏପରିକି ବର୍ଷ ଶେଷ ଆଡକୁ ଭାରତରେ ଖେଳାଯିବାକୁ ଥିବା ବିଶ୍ୱକପରେ ପାକିସ୍ତାନକୁ ମଧ୍ୟ ଦେଖିବାକୁ ନ ମିଳିପାରେ । କାରଣ ଭାରତ ବାହାରେ ବିଶ୍ୱକପର କୌଣସି ମ୍ୟାଚ୍ କରିବା ସପକ୍ଷରେ ଆଇସିସି ରହିନପାରେ । ଏଭଳିସ୍ଥଳେ ପାକିସ୍ତାନ ମଧ୍ୟ ଭାରତରେ ଖେଳାଯିବାକୁ ଥିବା ବିଶ୍ୱକପରେ ଭାଗ ନେଇନପାରେ । ଆଇସିସି ଇଭେଣ୍ଟ ହୋଇଥିବାରୁ ପାକିସ୍ତାନ କଣ ପଦକ୍ଷେପ ନେବ ତାହା ଉପରେ ସମସ୍ତଙ୍କର ନଜର ରହିଛି । ଦୀର୍ଘ ବର୍ଷ ହେବ ଭାରତ-ପାକିସ୍ତାନ ମଧ୍ୟରେ କୂଟନୈତିକ ସମ୍ପର୍କ ଭଲ ନଥିବା ବେଳେ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ସିରିଜ ମଧ୍ୟ ଖେଳାଯାଉନାହିଁ । ତେଣୁ ଆଇସିସି ଇଭେଣ୍ଟରେ ଉଭୟ ଦେଶ ମୁହାଁମୁହିଁ ହୋଇଥାନ୍ତି । ତେଣୁ ଆଇସିସି ବିଶ୍ୱକପରେ ଖେଳିବାକୁ ଯଦି ପାକିସ୍ତାନ ରାଜି ନହୁଏ ତେବେ କ୍ରିକେଟପ୍ରେମୀଙ୍କୁ ନିରାଶ ହେବାକୁ ପଡିବ ।