ଆଇପିଏସରୁ ମିଜୋରାମର ନୂଆ ମୁଖ୍ୟମନ୍ତ୍ରୀ! ଜାଣନ୍ତୁ, ଲାଲଦୁହୋମାଙ୍କ ରାଜନୈତିକ କ୍ୟାରିୟର ।
କନକ ବ୍ୟୁରୋ: ମିଜୋରାମରେ ବଦଳିବ ସରକାର । ଭୋଟ୍ ଗଣତିର ଟ୍ରେଣ୍ଡ ଅନୁସାରେ ଏଠାରେ ଆଗରେ ରହିଛି ବିରୋଧୀ ଦଳ ଜେଡପିଏମ୍ । ପୂର୍ବରୁ ମିଜୋରାମରେ ଶାସନ କରୁଥିବା ଏମଏନଏଫକୁ ପଛରେ ପକାଇ ଲାଲଦୁହୋମାଙ୍କ ଜୋରାମ ପିପୁଲ ମୁଭମେଣ୍ଟ ଆଗରେ ରହିଛି । ତେବେ ଜନମତର ଏହି ଟ୍ରେଣ୍ଡ ପରେ ଲାଲଦୁହୋମା ମିଜୋରାମର ନୂଆ ମୁଖ୍ୟମନ୍ତ୍ରୀ ହେବା ଏକପ୍ରକାର ସ୍ପଷ୍ଟ ହେଇଛି । ତେବେ ଜଣେ ପ୍ରଶାସନିକ ଅଧିକାରୀରୁ ରାଜ୍ୟର ମୁଖ୍ୟମନ୍ତ୍ରୀ ଭାବେ ଦାବିଦାର ହେବା ପର୍ଯ୍ୟନ୍ତ ଲାଲଦୁହୋମାଙ୍କ ଯାତ୍ରା କିଛି ଏଭଳି ଥିଲା…
Kanak News is now on WhatsApp
Join and get latest news updates delivered to you via WhatsApp
୧୯୭୭ରେ ବନିଥିଲେ ଆଇପିଏସ୍
ଲାଲଦୁହୋମା ମିଜୋରାମର ଯୁବବର୍ଗଙ୍କ ଭିତରେ ଜଣେ ପରିଚିତ ନାମ । ଗତ କିଛି ବର୍ଷ ଧରି ସେ ମିଜୋରାମର ବିକାଶ ପାଇଁ ରାଜ୍ୟକୁ କଂଗ୍ରେସ ଏବଂ ଏମଏନଏଫ କବଳରୁ ମୁକ୍ତି କରିବାକୁ ନାରା ଦେଇଥିଲେ । ତେବେ ଲାଲଦୁହୋମା ୧୯୭୭ ମସିହାରେ ଆଇପିଏସ୍ ଭାବେ ଗୋଆରେ ନିଯୁକ୍ତ ହେଇଥିଲେ । ସେଠାରେ ସେ ଜଣେ ସ୍କ୍ୱାର୍ଡ ଲିଡର ଭାବେ କାମ କରିଥିଲେ । ତେବେ ଏହି ସମୟରେ ସେ ବିଭିନ୍ନ ତସ୍କରୀ ଉପରେ ଛାପା ମାରିବା ସହିତ କଡା କାର୍ଯ୍ୟାନୁଷ୍ଠାନ ନେଇଥିଲେ, ଯାହା ପରେ ଜାତୀୟ ଗଣମାଧ୍ୟମରେ ତାଙ୍କୁ ନେଇ ଚର୍ଚ୍ଚା ହେଇଥିଲା । ଏହାପରେ ତାଙ୍କ କାମକୁ ଦେଖି ୧୯୮୨ ମସିହାରେ ତାଙ୍କୁ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରାଗାନ୍ଧୀଙ୍କ ସୁରକ୍ଷା ପ୍ରଭାରୀ ଭାବେ ଦାୟିତ୍ୱ ଦିଆଯାଇଥିଲା ।
୧୯୮୪ ମସିହାରେ ସାଂସଦ
ଇନ୍ଦିରା ଗାନ୍ଧୀଙ୍କ ସୁରକ୍ଷା ଦାୟିତ୍ୱରେ ରହିବାର ୨ ବର୍ଷ ପରେ ଲାଲଦୁହୋମା ରାଜନୀତିରେ ପ୍ରବେଶ କରିବାକୁ ଇଚ୍ଛା କରିଥିଲେ । ଆଉ ୧୯୮୪ ମସିହାରେ ସେ ସାଂସଦ ଭାବେ ନିର୍ବାଚିତ ହେଇଥିଲେ । ତେବେ ଏହାର ୪ ବର୍ଷ ପରେ ସେ କଂଗ୍ରେସରୁ ଇସ୍ତଫା ଦେଇ ଦେଇଥିଲେ । ଆଉ ତା ପରେ ତାଙ୍କୁ ଲୋକସଭାରୁ ମଧ୍ୟ ଅଯୋଗ୍ୟ କରିଦିଆଯାଇଥିଲା ।
କଂଗ୍ରେସ ଛାଡିବା ପରେ ଲାଲଦୁହୋମା ଜୋରାମ ନ୍ୟାସନାଲିଷ୍ଟ୍ ପାର୍ଟିର ସ୍ଥାପନା କରିଥିଲେ । ଏହାପରେ ୨୦୧୮ ବିଧାନସଭା ନିର୍ବାଚନରେ ସେ ବିରୋଧୀ ଦଳ ନେତା ଭାବେ କାମ କରିଥିଲେ । ହେଲେ ୨୦୨୦ ମସିହାରେ ଦଳ ବିରୋଧୀ କାନୁନର ଉଲ୍ଲଘଂନ ପାଇଁ ତାଙ୍କ ବିଧାନସଭା ସଦସ୍ୟତା ପଦ ବି ରଦ୍ଦ ହେଇଯାଇଥିଲା । ହେଲେ ଏବେ ସେହି ନେତା ମିଜୋରାମର ଆଗାମୀ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ।