କନକ ବ୍ୟୁରୋ: ୨୪ ନିର୍ବାଚନ ହାଇଦ୍ରାବାଦ ପାଇଁ ବେଶ ରୋଚକ ହେବାକୁ ଯାଉଛି । ଦୀର୍ଘ ୪ ଦଶନ୍ଧି ଧରି ୱବୈସୀ ପରିବାର ନିଜାମ ଗଡ଼କୁ କବଜା ରଖିଥିବାବେଳେ ଏଥର ମିଳିବ କଡ଼ା ଟକ୍କର । ହିନ୍ଦୁତ୍ୱକାର୍ଡ ଖେଳି ବିଜେପି ମାଧବୀ ଲତାଙ୍କୁ କରିଛି ପ୍ରାର୍ଥୀ । କୁହାଯାଉଛି ୱବୈସୀଙ୍କ କିଲ୍ଲାରେ ମାଧବୀଙ୍କ ଏଟ୍ରିଂ ବିଜେପି ପାଇଁ ବଡ ଚ୍ୟାଲେଞ୍ଜ ହୋଇପାରେ । କାରଣ ନିର୍ବାଚନ ମଇଦାନରେ ଦେଖିବାକୁ ମିଳିବ କଠୋର ମୁସଲିମ ପ୍ରାର୍ଥୀ ବନାମ କଠୋର ହିନ୍ଦୁ ଚେହେରା ମଧ୍ୟରେ ଲଢ଼େଇ ।
Kanak News is now on WhatsApp
Join and get latest news updates delivered to you via WhatsApp
ଅୱେସୀଙ୍କ ଗଡ଼ରେ ମାଧବୀ ଲତା
- ମାଧବୀ ଲତା ଜଣେ କଠୋର ହିନ୍ଦୁତ୍ୱ ଚେହେରା
- କର୍ଣ୍ଣାଟକରେ ଜନ୍ମିତ, ତେଲେଙ୍ଗାନାରେ ପାଠପଢ଼ା
- ପେଶାରେ ଜଣେ ସମାଜସେବୀ, ନୃତ୍ୟଶିଳ୍ପୀ ଓ ବିିଭିନ୍ନ ସାଂସ୍କୃତିକ ସଂଗଠନ ସହ ଜଡିତ
- ବିଶେଷ କରି ସ୍ୱାସ୍ଥ୍ୟ ଓ ଶିକ୍ଷାକ୍ଷେତ୍ରରେ କାମ ପାଇଁ ଚର୍ଚ୍ଚାରେ ରହିଛନ୍ତି
- ସୋସିଆଲ ମିଡିଆ ଇନଫ୍ଲୁଏନସର
- ଗୋଶାଳା ଚଳାଇବା ସହ ବିଭିନ୍ନ ଶିକ୍ଷାନୁଷ୍ଠାନରେ ହିନ୍ଦୁତ୍ୱ ଉପରେ ଭାଷଣ ଦିଅନ୍ତି
- ମାଧବୀ କୌଣସି ରାଜନୀତି ପରିବାରରୁ ଆସିନାହାଁନ୍ତି
- ପୂର୍ବରୁ ଜଣେ ସକ୍ରିୟ ରାଜନେତ୍ରୀ ମଧ୍ୟ ନଥିଲେ ।
- ତିନ୍ ତଲାକ ପ୍ରସଙ୍ଗରେ ତାଙ୍କ ଭୂମିକା ବେଶ ଚର୍ଚ୍ଚା ସାଉଁଟିଥିଲା
- ମୁସଲିମ ମହିଳାଙ୍କ ଅଧିକାର ଲଢ଼େଇରେ ସାମିଲ ହୋଇ ଲୋକଲୋଚନକୁ ଆସିଥିଲେ
ଅନ୍ୟପଟେ ମାଧବୀ ଯାହାଙ୍କୁ ଟକ୍କର ଦେବାକୁ ଯାଉଛନ୍ତି ସେ ହାଇଦ୍ରବାଦର ଜଣେ ଟାଣୁଆ ନେତା ଅସଉଦ୍ଧିନ ୱବୈସୀ । ଯିଏକି ନିଜ ବୟାନ ପାଇଁ ସବୁବେଳେ ବିବାଦରେ ରୁହନ୍ତି ।
ୱବୈସୀ ବନାମ ମାଧବୀ
- ଏଆଇଏମଆଇଏମ ମୁଖ୍ୟ ୱବୈସୀ ଜଣେ କଠୋର ମୁସଲିମ ଚେହେରା
- ହିନ୍ଦୁ ବିରୋଧୀ ବୟାନ ପାଇଁ ଚର୍ଚ୍ଚାରେ ରହିଥାନ୍ତି ଅସଦୁଦ୍ଦିନ
- ୱବୈସୀ ପରିବାରର ମୁଖ୍ୟ ଚେହେରା ହେଉଛନ୍ତି ଅସଦୁଦ୍ଦିନ
- ୧୯୮୪ରୁ ଏଆଇଏମଆଇଏମ ହାଇଦ୍ରାବାଦ ଲୋକସଭା ଆସନରୁ ଜିତି ଆସୁଛି
- ୱବୈସୀଙ୍କ ବାପା ସୁଲତାନ ସଲାଉଦ୍ଧିନ ଏହି ଆସନରେ ୬ଥର ଜିତିଥିଲେ ।
- ଏହାପରଠୁ ଅସଦୁଦ୍ଦିନ ୱବୈସୀ ୪ଥର ଏକତରଫା ଜିତୁଛନ୍ତି
- କେସିଆର ସରକାରରେ ୱବୈସୀଙ୍କ ଭାଇ ମନ୍ତ୍ରୀ ରହିଥିଲେ
ହାଇଦ୍ରାବାଦର ଗୋଟିଏ କଥା ହେଉଛି ଏଠାକାର ମୁସଲିମ ଭୋଟର ହିଁ ସର୍ବେସବା । ଇତିହାସ କହୁଛି କେବଳ ୮ ପ୍ରତିଶତ ମୁସଲିମ ଭୋଟର ହିଁ ବିଜେପିକୁ ଭୋଟ ଦେବା ରେକର୍ଡ ରହିଛି । ଏପରିକି ୭ଟି ବିଧାନସଭା ଆସନରୁ ୬ରେ ଏଆଇଏମଆଇଏମର କବଜା । ପ୍ରଶ୍ନ ଉଠୁଛି ମାଧବୀ ଲତା ଜଣେ ହିନ୍ଦୁ ଚେହେରା ତେଣୁ କିଭଳି ମୁସଲିମ ବହୁଳ ଆସନରେ ଭୋଟରଙ୍କୁ ଆକୃଷ୍ଟ କରିବେ ଓ ନିର୍ବାଚନ ଜିତିବେ । ସେପଟେ ହାଇଦ୍ରାବାଦରେ ଜଣେ କଠୋର ମୁସଲିମ ଚେହେରାଙ୍କ ବିପକ୍ଷରେ କଠୋର ହିନ୍ଦୁ ପ୍ରାର୍ଥୀ ମାଧବୀଙ୍କୁ ଓହ୍ଲାଇ ବିଜେପି ୱବୈସୀଙ୍କୁ କଡ଼ା ଟକ୍କର ଦେବାକୁ ଯାଉଛି ।
୨୦୧୯ରେ ଭାଗବତ ରାଓଙ୍କୁ ଟିକେଟ ଦେଇ ନିରାଶ ହୋଇଥିଲା ବିଜେପି । ଗତଥର ନିର୍ବାଚନରେ ୱବୈସୀଙ୍କୁ ୫ଲକ୍ଷ ୧୭ହଜାର ୪୭୧ ଭୋଟ ମିଳିଥିବାବେଳେ ବିଜେପି ପ୍ରାର୍ଥୀ ଭାଗବତ ରାଓଙ୍କ ଖାତାକୁ ଆସିଥିଲା । କେବଳ ୨ଲକ୍ଷ ୩୫ହଜାର ୨୮୫ ଭୋଟ । ଯଦି ଅନ୍ୟ ଦିଗ ଉପରେ ନଜର ପକାଇବା ତେବେ ୧୦ବର୍ଷ ମଧ୍ୟରେ ହାଇଦ୍ରବାଦରେ ବିଜେପିର ଭୋଟ ସଂଖ୍ୟା ବଢ଼ିଛି । ୨୦୧୪ ଲୋକସଭା ନିର୍ବାଚନରେ ୭ ପ୍ରତିଶତ, ୨୦୧୩ ବିଧାନସଭା ନିର୍ବାଚନରେ ୧୫ ପ୍ରତିଶତ ଭୋଟ ପାଇଥିଲା । ଶେଷ ବିଧାନସଭା ନିର୍ବାଚନରେ ବିଜେପି ପ୍ରଥମ ଥର ପାଇଁ ୮ଟି ଆସନ କବଜା କରିଥିଲା । ଆଗକୁ ହାଇଦ୍ରାବାଦ ଲଢ଼େଇ କିଭଳି ରହୁଛି ତା ଉପରେ ସମସ୍ତଙ୍କ ନଜର ଅଟକିଛି ।