ମାଲକାନଗିରି ଚିତ୍ରକୋଣ୍ଡାର ଉପାନ୍ତ ଗାଁରେ ବାଟ ହୁଡିଛି ବିକାଶ: ଗାଁକୁ ନାହିଁ ଭଲ ରାସ୍ତା, ମିଳୁନି ବିଶୁଦ୍ଧ ପିଇବା ପାଣି
କନକ ବ୍ୟୁରୋ: ଆଜି ବି ଗାଁକୁ ପହଁଚିନି ବିକାଶ । ଧୂଆଁବାଣ ସରକାରଙ୍କ ପ୍ରତିଶ୍ରୁତି, ଅକାମୀ ହୋଇଛି ମାଳ ମାଳ ଯୋଜନା । ମାଲକାନଗିରି ଚିତ୍ରକୋଣ୍ଡା ବ୍ଲକ ମଳିଗୁଡା ଗାଁରୁ ଆସିଛି ବିକାଶର ବାସ୍ତବ ଚିତ୍ର । ଗାଁକୁ ଯିବାକୁ ରାସ୍ତା ଖଣ୍ଟିଏ ନଥିବା ବେଳେ ନାହିଁ ବିଦ୍ୟୁତ କି ପିଇବା ପାଣିର ବ୍ୟବସ୍ଥା । ସଂଧ୍ୟା ନଇଁଲେ ମଳିଗୁଡାରେ ଘନ ଅନ୍ଧାର ରାଜୁତି କରୁଥିବା ବେଳେ ଡିବିରି ଆଲୁଅ ସାହାଭରସା । ସେହିପରି ଗ୍ରାମବାସୀଙ୍କ ଶୋଷ ମେଂଟାଇବା ପାଇଁ ନଳକୂପ ଟିଏ ନାହିଁ, ନଦୀ ଜଳ ହିଁ ଲୋକଙ୍କ ଶୋଷ ମେଣ୍ଟାଉଛି । ଏନେଇ ସ୍ଥାନୀୟ ଜନ ପ୍ରତିନିଧିଙ୍କ ଠାରୁ ନେଇ ପ୍ରଶାସନକୁ ଜଣାଉଥିଲେ ମଧ୍ୟ କୌଣସି ସୁଫଳ ମିଳୁନଥିବା ଅଭିଯୋଗ କରିଛନ୍ତି ସ୍ଥାନୀୟ ଅଞ୍ଚଳବାସୀ ।
Kanak News is now on WhatsApp
Join and get latest news updates delivered to you via WhatsApp
ଦୁର୍ଗମ ଇଲାକାର ବିକାଶ ପାଇଁ ସରକାର ଘୋଷଣା କରୁଛନ୍ତି ଯୋଜନା ଉପରେ ଯୋଜନା, ରାଜ୍ୟ ରାଜକୋଷରୁ ଖର୍ଚ୍ଚ ହେଉଛି କୋଟି କୋଟି ଟଙ୍କା । ହେଲେ ମଳିଗୁଡା ଗାଁରେ ସରକାରଙ୍କ ସବୁ ଯୋଜନା ଯେମିତି ଫେଲ୍ ମାରିଛି । ତେବେ ଆଗାମୀ ଦିନରେ ଗାଁରେ ଥିବା ସମସ୍ୟାର ସମାଧାନ ନହେଲେ ଭୋଟ ବର୍ଜନ ସହିତ ଓଡ଼ିଶା ଛାଡି ଆନ୍ଧ୍ରରେ ମିଶିଯିବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ । ପ୍ରତିଶ୍ରୁତି ପାଲଟୁଛି ପ୍ରତରଣା, ଦୁର୍ଗମ ଅଂଚଳକୁ ବିକାଶ ବାଟ ପାଉନଥିବା ବେଳେ ବଢୁଛି ଲୋକଙ୍କ ଯନ୍ତ୍ରଣା ।