କନକ ବ୍ୟୁରୋ: ବିଶ୍ୱକପ ୨୦୨୩ରେ ଭାରତ ଚମତ୍କାର ପ୍ରଦର୍ଶନ କରୁଛି । ସବୁ ମ୍ୟାଚରେ ବିଜୟୀ ହେବା ସହ ଦଳ ସେମି ଫାଇନାଲରେ ନିଜ ସ୍ଥାନ ପକ୍କା କରିସାରିଛି । ବୋଲିଂ, ବ୍ୟାଟିଂ ଓ ଫିଲ୍ଡିଂରେ ଦଳ ଦମଦାର ପ୍ରଦର୍ଶନ କରିବା ସହ ବିପକ୍ଷ ଦଳକୁ ନିଜ ଦମ ଦେଖାଇ ସାରିଛି । ତେବେ ଏହାକୁ ନେଇ କ୍ୟାପଟେନ ରୋହିତ ଶର୍ମାଙ୍କ ବୟାନ ଏବେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି । ପ୍ରେସ କନଫରେନ୍ସ କରି ନିଜ ଅଧିନାୟକତ୍ୱ ଓ କ୍ରିକେଟପ୍ରେମୀଙ୍କ ଭାବନାକୁ ନେଇ ଏମିତି କିଛି କହିଛନ୍ତି ଯାହାକୁ ନେଇ ଏବେ ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଅଧିନାୟକ ରୋହିତ ଶର୍ମା ପ୍ରେସ କନଫରେନ୍ସ କରି କହିଛନ୍ତି, ଏବେ ଆମେ ମ୍ୟାଚ ଜିତୁଛୁ, ସବୁ ଠିକଠାକ ଚାଲିଛି ହେଲେ ଗୋଟିଏ ଖରାପ ମ୍ୟାଚ ମୋତେ ଖରାପ କ୍ୟାପଟେନ କରିଦେବ । ଅଧିନାୟକ ହିସାବରେ ଏବେ ମୋତେ ମିଳୁଥିବା ପ୍ରଶଂସାକୁ ନେଇ ମୁଁ ଚିନ୍ତିତ ନୁହେଁ । ଅନେକ ସମୟରେ ମ୍ୟାଚର ସ୍ଥିତିକୁ ବୁଝିବାକୁ ପଡେ, ସ୍କୋର ବୋର୍ଡକୁ ଦେଖି ନିର୍ଣ୍ଣୟ ନେବାକୁ ପଡେ । ବେଳେବେଳେ ନିଷ୍ପତ୍ତି କାମ କରେ ଆଉ ବେଳେବେଳେ କମା କରେନି । ଏଥିପାଇଁ ଆମକୁ ପ୍ରସ୍ତୁତ ରହିବାକୁ ପଡେ ।
ସେ ନିଜ ବ୍ୟାଟିଂକୁ ନେଇ କହିଛନ୍ତି କି, ମୁଁ ମୋ ଖେଳକୁ ଏଞ୍ଜୟ କରୁଛି, ହେଲେ ଟିମର ପରିସ୍ଥିତି ସବୁବେଳେ ମୋ ମୁଣ୍ଡରେ ରହିଛି । ଏମିତି ନୁହେଁ କି କ୍ରିଜକୁ ଯାଇ କିଛି ନବୁଝି ନସୁଝି ବ୍ୟାଟ ବୁଲେଇବାରେ ଲାଗିଯିବି । ମୋତେ ବ୍ୟାଟର ଠିକ ଭାବେ ବ୍ୟବହାର କରିବା ଜଣା । ଭଲ ବ୍ୟାଟିଂ କରି ଟିମକୁ ଭଲ ସ୍ଥିତିରେ ପହଞ୍ଚାଇବା ମୋ କାମ । ମୁଁ ଓପନିଂ କରିବା ସମୟରେ ସବୁ ଶୂନରୁ ଆରମ୍ଭ ହୋଇଥାଏ ତେଣୁ ସ୍କୋର ଲକ୍ଷ୍ୟ ସ୍ଥଳରେ କେମିତି ପହଞ୍ଚିବ ତାହା ମୁଁ ଭାବିଥାଏ ।
ଚଳିତ ବିଶ୍ୱକପରେ ଭାରତ ଏବେ ଯାଏଁ ଭଲ ପ୍ରଦର୍ଶନ କରିଆସୁଛି । ଦଳ ସେମିଫାଇନାଲ ଖେଳିବା ପକ୍କା ହୋଇସାରିଲାଣି । ଦଳ ପାଇଁ କ୍ୟାପଟେନ ରୋହିତ ଶର୍ମା ଓ ବିରାଟ କୋହଲି ସଞ୍ଜିବନୀ ସଦୃଶ କାମ କରୁଛନ୍ତି । ଉଭୟ ବ୍ୟାଟ୍ସମ୍ୟାନ ଦଳ ପାଇଁ ଏବେ ଯାଏଁ ଚମତ୍କାର ବ୍ୟାଟିଂ କରି ଦଳକୁ ବିଜୟୀ କରାଇଛନ୍ତି । ସେହିପରି କେବଳ ବ୍ୟାଟ୍ସମ୍ୟାନ ନୁହେଁ ବୋଲରମାନେ ମଧ୍ୟ ଦଳ ପାଇଁ ସଙ୍କଟମୋଚକ ସାଜିଛନ୍ତି । କେତେବେଳେ ଯଶପ୍ରିତ ବୁମରାହ ତ କେତେବେଳେ ମହମ୍ମଦ ସାମି ବିଶ୍ୱକପରେ ନିଜର ଦମ ଦେଖାଉଛନ୍ତି ।
ପୂର୍ବରୁ କିଛି ଟୁର୍ଣ୍ଣାମେଣ୍ଟରେ ଟିମ ଇଣ୍ଡିଆର ପରାଜୟ ପରେ ଫ୍ୟାନମାନେ ଅଧିନାୟକ ରୋହିତ ଶର୍ମାଙ୍କୁ ସମାଲୋଚନା କରିଥାନ୍ତି । କେବଳ ସେତିକି ନୁହେଁ ଅଧିନାୟକ ପଦ ଛାଡିବା ଦାବି ମଧ୍ୟ ଉଠିଥାଏ । ଏଭଳି ସମାଲୋଚନାର ଶିକାର କେବଳ ରୋହିତ ନୁହେଁ ବିରାଟ କୋହଲି ମଧ୍ୟ ହୋଇସାରିଛନ୍ତି । ଯେଉଁଥିପାଇଁ ତାଙ୍କୁ ଅଧିନାୟକ ପଦ ଛାଡିବାକୁ ପଡିଛି ବୋଲି ଚର୍ଚ୍ଚା ହେଉଛି ।