କନକ ବ୍ୟୁରୋ : ୨୦୧୯ ମସିହା ଡିସେମ୍ବର ମାସରେ ଚୀନରେ କରୋନା ଭାଇରସର ପ୍ରଥମ ମାମଲା ସାମ୍ନାକୁ ଆସିଥିଲା । ଏହି ମହାମାରୀକୁ ତିନି ବର୍ଷ ପୂରି ସାରିଛି । ଭାରତ ସମେତ ସମଗ୍ର ବିଶ୍ୱରେ ଏହି ମହାମାରୀ ବ୍ୟାପିଥିଲା । ଅନେକ ଦେଶ ଏହି ମହାମାରୀ ବିରୋଧରେ ଲଢ଼ିଥିଲେ ଏବଂ ସଫଳ ମଧ୍ୟ ହୋଇଥିଲେ । କିନ୍ତୁ ଚୀନ୍ ଏବେବି କଠିନ ସମୟ ଦେଇ ଗତି କରୁଛି । ପ୍ରଥମେ ଚୀନରେ ଜିରୋ କୋଭିଡ୍ ନୀତିକୁ ସଫଳ କୁହାଯାଉଥିଲେ ବି ଏବେ କିନ୍ତୁ ସେହି ନୀତି ସରକାରଙ୍କ ବିରୋଧରେ ଜନତାଙ୍କ ଆକ୍ରୋଶର ବଡ଼ କାରଣ ହୋଇଛି । ଜନଅସନ୍ତୋଷକୁ ଦୃଷ୍ଟିରେ ରଖି ସରକାର କଟକଣା ତ କୋହଳ କଲେ, କିନ୍ତୁ ଜିନପିଙ୍ଗଙ୍କ ପାଇଁ ଏହା ବଡ଼ ସମସ୍ୟା ସୃଷ୍ଟି କରିପାରେ ବୋଲି ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଚୀନରେ କରୋନା ସଂକ୍ରମଣ ବୃଦ୍ଧି ପାଇବା ପରେ ଜିନପିଙ୍ଗ ସରକାର ଯେଉଁ ଜିରୋ କୋଭିଡ୍ ନୀତି ଲାଗୁ କରିଥିଲେ, ତାକୁ ନେଇ ଜନତାଙ୍କ ମନରେ ତୀବ୍ର ଆକ୍ରୋଶ ଦେଖାଦେଇଛି । ଆଉ ଦୀର୍ଘ ବର୍ଷ ପରେ ଚୀନର କମ୍ୟୁନିଷ୍ଟ ସରକାର ବିରୋଧରେ ଲୋକେ ରାଜରାସ୍ତାକୁ ଓହ୍ଲାଇଛନ୍ତି । ଦେଶରେ ମହାମାରୀ, ଜନତାଙ୍କ ବିରୋଧ ପ୍ରଦର୍ଶନ, ଖାଦ୍ୟ ସଂକଟ ଏବଂ ଆର୍ଥିକ ବୋଝ ଚୀନ୍ ସରକାରର ଚିନ୍ତା ବଢ଼ାଇ ଦେଇଛି । ଜନତାଙ୍କ ଆକ୍ରୋଶକୁ ଦୃଷ୍ଟିରେ ରଖି ସରକାର କୋଭିଡ୍ ନୀତିକୁ କୋହଳ କରିଛନ୍ତି । କଟକଣାକୁ କୋହଳ କରିବା ସତ୍ୱେ ମଧ୍ୟ ଜିନପିଙ୍ଗଙ୍କ ପ୍ରତି ଜନଅସେନ୍ତାଷ ବଢ଼ିବାରେ ଲାଗିଛି ।
ମହାମାରୀର ପ୍ରଥମ ଲହରରେ ଚୀନର କୋଭିଡ୍ ନୀତି ସଫଳ ହେବା ପରେ ସେଠାକାର ସରକାରୀ ଗଣମାଧ୍ୟମ ଜିନପିଙ୍ଗ ସରକାରଙ୍କ ଖୁବ୍ ପ୍ରଚାର ପ୍ରସାର କରିଥିଲେ । କିନ୍ତୁ ସେହି ପ୍ରଚାର ଏବେ ମାଟିରେ ମିଶିସାରିଛି । କାରଣ ଏବେ ସେହି ନୀତି ଚୀନକୁ ମହାମାରୀ ଆଗରେ ଦୁର୍ବଳ ଓ ଅସହାୟ କରିଦେଇଛି । ଏବେ ଜିନପିଙ୍ଗ କେବଳ ସାମାଜିକ ଓ ଆର୍ଥିକ ନୁହେଁ ବରଂ ରାଜନୈତିକ ଆହ୍ୱାନର ସମ୍ମୁଖୀନ ହେଉଛନ୍ତି ।
କରୋନାକୁ ରୋକିବା ପାଇଁ ଚୀନ୍ ନିଜ ଦେଶରେ ଯେଉଁ ଟିକାକରଣ ଅଭିଯାନ ଆରମ୍ଭ କରିଥିଲା, ତାହା ଫଳପ୍ରଦ ହୋଇପାରିନାହିଁ । ଏପରିକି ଚୀନ୍ ମଧ୍ୟ ବିଦେଶୀ ଟିକା ଉପରେ ସନ୍ଦେହ ପ୍ରକଟ କରିଥିଲା । ଚୀନରେ ଆରମ୍ଭରୁ ହିଁ ଟିକାକରଣ ପ୍ରକ୍ରିୟା ମନ୍ଥର ଗତିରେ ଚାଲିଆସିଛି । ସରକାର ୬୦ ବର୍ଷରୁ ଊଦ୍ଧ୍ୱର୍ ବୟସ ବର୍ଗଙ୍କ ପାଇଁ ଟିକାକରଣ ବାଧ୍ୟତାମୂଳକ କରିଥିଲେ । କିନ୍ତୁ ବୟସ୍କ ଟିକା ନେବାକୁ ଏବେବି ଅନିଚ୍ଛା ଦେଖାଉଛନ୍ତି । ହେଲେ ଗତ ଦୁଇମାସ ଧରି ସରକାର ଦେଶରେ ବୟସ୍କଙ୍କୁ ଟିକାକରଣ ଉପରେ ଜୋର ଦେଉଥିବା ଦେଖିବାକୁ ମିଳିଛି ।
ଜିନପିଙ୍ଗଙ୍କ କଟକଣା ପାଇଁ ସମସ୍ୟା?
– ସାମାଜିକ, ଅର୍ଥନୈତିକ ଓ ରାଜନୈତିକ ସଂକଟ
– ଦେଶରେ ବଢ଼ୁଛି ବେକାରୀ ସମସ୍ୟା
– ସହରରେ ବେକାରୀଙ୍କ ଯୁବକଙ୍କ ହାର ୧୮%
– ଘରୋଇ ଉଡ଼ାଣ ହାର ୪୫% ହ୍ରାସ
– ସିନେମା ହଲରେ ବକ୍ସ ଅଫିସ୍ କଲେକ୍ସନ ୬୪% ହ୍ରାସ
– କୋଭିଡ୍-୧୯ ଟେଷ୍ଟିଂରେ ଚଳିତ ବର୍ଷ ଜିଡିପିର ୧.୫% ଖର୍ଚ୍ଚ
– ଟେଷ୍ଟିଂ ପିଛା ୩୫ କମ୍ପାନୀ ନେଇଛନ୍ତି ୧ଲକ୍ଷ ୭୦ହଜାର ଟଙ୍କା
– ମହଙ୍ଗା ହେଉଛି ରୋଗ ନିୟନ୍ତ୍ରଣ ବ୍ୟବସ୍ଥା
ମହାମାରୀକୁ ନିୟନ୍ତ୍ରଣ କରିବା ଓ ଜନତାଙ୍କ ଆକ୍ରୋଶକୁ କିପରି ସାମ୍ନା କରିବେ, ତାହା ଜିନପିଙ୍ଗଙ୍କ ପାଇଁ ବଡ଼ ସମସ୍ୟା ସୃଷ୍ଟି କରିଛି । ତିନି ଦଶନ୍ଧି ପରେ କମ୍ୟୁନିଷ୍ଟ ସରକାରକୁ ଏବେ ବଡ଼ ବିରୋଧର ସାମ୍ନା କରିବାକୁ ପଡ଼ୁଛି । ଏଭଳି ସ୍ଥିତିରେ ଲୋକଙ୍କ ଭରସା କିପରି ଜିତିବେ, ତା’ ଉପରେ ସରକାର ଗୁରୁତ୍ୱ ଦେବା ଦରକାର ।