ଯାଜପୁର: ଟ୍ରେନ ଚକା ତଳେ ଜୀବନ ଗଲା, ବେସାହାରା ହେଲା ପରିବାର । ରୋଜଗାରିଆ ପୁଅଙ୍କ ମୃତ୍ୟୁ ପରେ କେମିତି ଚଳିବେ ପରିବାର? ସେପଟେ ଦୁର୍ଘଟଣା ପରେ ଚେତିଲା ରେଳ ବିଭାଗ
କନକ ବ୍ୟୁରୋ: ଯାଜପୁର ରୋଡରେ ମାଲବାହୀ ୱାଗନ୍ ମାଡିଯାଇ ୬ ନିରୀହ ଜୀବନ ନେଇ ଯାଇଛି । ପରିବାରର ରୋଜଗାରିଆ ଲୋକର ମୃତ୍ୟୁ ପରେ ଏବେ ଘରେ ଶୋକାକୂଳ ପରିବେଶ । କାନ୍ଦ ବୋବାଳିରେ ଫାଟି ପଡୁଛି ସାରା ପରିବେଶ । ଆଉ ଏହାରି ଭିତରେ ମୃତକଙ୍କ ପରିବାରକୁ ରାଜ୍ୟ ସରକାରଙ୍କ ତରଫରୁ ସବୁ ପ୍ରକାର ସହାୟତା ଯୋଗାଇଦେବାପାଇଁ ଚାଲିଛି ପ୍ରୟାସ ।
Kanak News is now on WhatsApp
Join and get latest news updates delivered to you via WhatsApp
ସବୁଦିନ ଭଳି ମଜୁରୀ ଲାଗିବାକୁ ଯାଇଥିଲେ, ଘର ଲୋକ ଖରାବେଳେ ଖାଇବାକୁ ଟିଫିନରେ ଭାତ ଭର୍ତ୍ତି କରି ଦେଇଥିଲେ । କହିଯାଇଥିଲେ ବେଳାବେଳି ଘରକୁ ଫେରି ଆସିବେ । ହେଲେ ଯିବାବେଳେ ଜାଣିନଥିଲେ ଯେଉଁଠିକୁ କାମ କରିବାକୁ ଯାଉଛନ୍ତି, ସେଠି ଜଗି ବସିଥିଲା ଯମ । ଆଉ ଏମିତି ହଠାତ୍ ଚାଲିଯିବ ଜୀବନ ।
ଘରର ଏକମାତ୍ର ରୋଜଗାରିଆ ମଣିଷର ମୃତ୍ୟୁ ଘଟିଛି । କାନ୍ଦବୋବାଳିରେ ଫାଟି ପଡୁଛି ପୂରା ଅଞ୍ଚଳ । ସ୍ତବ୍ଧ ହୋଇଯାଇଛନ୍ତି ସମ୍ପର୍କୀୟ ଓ ପରିଜନ । ଆଖିରୁ ଶୁଖୁନି ଲୁହ । ଗୁରୁତ୍ୱପୂର୍ଣ୍ଣ କଥା ହେଉଛି, ଯେଉଁମାନଙ୍କ ମୃତ୍ୟୁ ହୋଇଛି, ସେମାନେ ସମସ୍ତେ ଦିନ ମଜୁରିଆ ଥିଲେ । ମୂଲ ଲାଗିଲେ ପରିବାର ଚଳେ । ଦିନେ କାମକୁ ନଗଲେ ଚଳିବା ମୁସ୍କିଲ । ଆଉ ସେଥିପାଇଁ ତ ଅସହ୍ୟ ତାତିରେ ବି, କାମ କରିବାକୁ ଯାଇଥିଲେ ଏହି ଶ୍ରମିକମାନେ ।
ବିଡମ୍ବନାର ବିଷୟ ହେଉଛି, ଅଚାନକ କାଳବୈଶାଖୀ ଝଡ ବର୍ଷା ଆସିବାରୁ, ସେମାନେ ଅନ୍ୟ ଦିନ ମାନଙ୍କ ଭଳି, ବୁଧବାର ବି ମାଲଗାଡିର ୱାଗନ ତଳେ ଆଶ୍ରୟ ନେଇଥିଲେ । ହେଲେ, ଅଚାନକ ଗଡିବା ଆରମ୍ଭ କରିବା ସହ ତଳେ ଥିବା ଶ୍ରମିକଙ୍କ ଉପରେ ମାଡି ଯାଇଥିଲା । ଶବ ବ୍ୟବଛେଦ ପରେ ମୃତକଙ୍କୁ ଅନ୍ତିମ ସଂସ୍କାର କରାଯାଇଛି ।
ୱାଗନ ମାଡି ଯାଇ ୬ଜଣଙ୍କ ମୃତ୍ୟୁ ହେବା ପରେ, ମୃତକଙ୍କ ପରିବାରକୁ ଭେଟିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ମୃତକଙ୍କ ପରିବାରକୁ ଭେଟି ୨୦ ହଜାର ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରିଛନ୍ତି । ମନ୍ତ୍ରୀ ପ୍ରୀତିରଞ୍ଜନ ଘଡେଇ ମଧ୍ୟ ମୃତକଙ୍କ ପରିବାରକୁ ଯାଇ ଭେଟିଛନ୍ତି । ସମସ୍ତ ପ୍ରକାର ସହାୟତା ଦେବାକୁ ପ୍ରତିଶ୍ରୁତି ଦେଇଛନ୍ତି । ମୃତକଙ୍କ ପରିବାରକୁ ୫ଲକ୍ଷ ଟଙ୍କାର ଅନୁକମ୍ପା ରାଶି ଦେବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ।
ଅନ୍ୟପଟେ ଟ୍ରେନ୍ ଦୁର୍ଘଟଣା ପରେ ରେଳ ବିଭାଗ ତତ୍ପର ହୋଇଛି । ଟ୍ରାକରେ ରହୁଥିବା ବଗି ପାଇଁ ଚେନ୍ ଲକିଂ ବ୍ୟବସ୍ଥା କରିଛି । ତେବେ ପୂର୍ବରୁ କାହିଁକି ଚେନ ଲକିଂ ବ୍ୟବସ୍ଥା କରାଯାଇ ନଥିଲା, ସେ ନେଇ ପ୍ରଶ୍ନ ଉଠିଛି । ହୁଏତ ପୂର୍ବରୁ ଏଭଳି ଚେନ୍ ଲକିଂ ବ୍ୟବସ୍ଥା ହୋଇଥିଲେ, ୬ଜଣଙ୍କ ଜୀବନ ବଞ୍ଚିଯାଇଥାନ୍ତା ।