ମୋଦି – ଟ୍ରମ୍ପ୍ ମହାମିଳନ ! ଆତଙ୍କବାଦୀଙ୍କୁ ଆଶ୍ରୟ ନଦେବାକୁ ଦୁଇ ନେତାଙ୍କ ନାଲିଆଖି
କନକ ବ୍ୟୁରୋ : ପ୍ରଧାନମନ୍ତ୍ରୀ ମୋଦିଙ୍କ ଆମେରିକା ଗସ୍ତକୁ ବଡ ସଫଳତା । ଜଣେ ବିଶ୍ୱର ସର୍ବ ବୃହତ ଗଣତନ୍ତ୍ରର ପ୍ରଧାନମନ୍ତ୍ରୀ ଓ ଅନ୍ୟଜଣେ ବିଶ୍ୱର ସବୁଠାରୁ ଶକ୍ତିଶାଳୀ ରାଷ୍ଟ୍ରର ରାଷ୍ଟ୍ରପତି । ହ୍ୱାଇଟ ହାଉସରେ ପ୍ରାୟ ସାଢେ ୪ ଘଂଟାର ଆଲୋଚନା ପରେ ମିଳିତ ବିବୃତି ଜାରି କରିବା ସମୟରେ ଦୁଇ ନେତା ପରସ୍ପରକୁ କୁଣ୍ଢେଇ ଧରିଥିଲେ । ଆଉ ଏହି ମୁହୁର୍ତ ଅନେକ ଗୁରୁତ୍ୱପୂର୍ଣ୍ଣ ଦିଗ ଆଡକୁ ଇସାରା କରୁଥିଲା । ଏହାପରେ ଜାରି ହେଲା ପ୍ରେସ ବିବୃତି । ପାକିସ୍ତାନ ଆଡକୁ ଇସାରା କରି ଦୁଇ ନେତା କହିଲେ ନିଜ ମାଟିରେ ଆତଙ୍କବାଦୀଙ୍କୁ ଆଶ୍ରୟ ଦେବାରୁ ନିବୃତ ରହୁ ପାକିସ୍ତାନ ।
Kanak News is now on WhatsApp
Join and get latest news updates delivered to you via WhatsApp
ରାଷ୍ଟ୍ରପତି ଭାବେ ଦାୟିତ୍ୱ ନେବା ପରଠାରୁ ଇସଲାମିକ ଆତଙ୍କବାଦ ପ୍ରତି କଠୋର ଆଭିମୁଖ୍ୟ ଗ୍ରହଣ କରିଆସୁଥିବା ଡୋନାଲ୍ଡ ଟ୍ରମ୍ପ ମୋଦିଙ୍କୁ ଭେଟିବା ପରେ ଆତଙ୍କବାଦ ବିରୋଧୀ ଲଢେଇ ଆଉଏକ ପାଦ ଆଗକୁ ଯିବାର ସୁଯୋଗ ସୃଷ୍ଟି ହୋଇଛି । ଆତଙ୍କବାଦୀ ସଂଗଠନ ଓ ଏହାକୁ ପ୍ରୋତ୍ସାହନ ଦେଉଥିବା କଠୋରପନ୍ଥୀ ବିଚାରଧାରାର ମୂଳପୋଛ କରିବାକୁ ଆହ୍ୱାନ ଦେଇଥିଲେ ଟ୍ରମ୍ପ । ଭାରତର କୂଟନୈତିକ ଚାପ ଫଳରେ, ହିଜବୁଲ ମୁଜାହିଦ୍ଦିନ ଆତଙ୍କବାଦୀ ସୟଦ ସଲାଉଦ୍ଦିନକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିଥିଲା ଆମେରିକା ।
ଭାରତୀୟ ସମୟ ସୋମବାର ରାତି ପ୍ରାୟ ସାଢେ ଗୋଟାଏ ସମୟରେ ହ୍ୱାଇଟ ହାଉସରେ ପହଂଚିବା ପରେ ପ୍ରଧାନମନ୍ତ୍ରୀ ମୋଦି ଓ ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟରେ ୨୦ ମିନିଟ ଧରି ଚାଲିଲା ୱାନ ଟୁ ୱାନ କଥାବାର୍ତା । ଏହାପରେ ଦୁଇ ଦେଶର ଉଚ୍ଚସ୍ତରୀୟ ପ୍ରତିନିଧିଙ୍କ ମଧ୍ୟରେ ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗରେ ହୋଇଥିଲା ଆଲୋଚନା । ରୋଜ ଗାର୍ଡେନରେ ଏକ ମିଳିତ ବିବୃତିରେ ଦୃତ ଗତିିରେ ବୃଦ୍ଧି ପାଉଥିବା ଭାରତର ଆର୍ଥିକ ସ୍ଥିତି ଓ ଟିକସ ସଂସ୍କାର ପ୍ରକ୍ରିୟାକୁ ପ୍ରଂଶସା କରିଥିଲେ ରାଷ୍ଟ୍ରପତି ଟ୍ରମ୍ପ । ଏପରିକି ଆମେରିକା ମଧ୍ୟ ସମାନ ବ୍ୟବସ୍ଥା ଗ୍ରହଣ କରିବାକୁ ଯାଉଥିବା ସୂଚନା ଦେଇଥିଲେ ।
ତେବେ ଦୁଇ ନେତାଙ୍କ ଭିତରେ ପ୍ୟାରିସ ଜଳବାୟୁ ପରିବର୍ତନ ଚୁକ୍ତି ଓ ବହୁ ଚର୍ଚ୍ଚିତ ଏଚ-୧ (ବି) ଭିସା ପ୍ରସଙ୍ଗରେ କୌଣସି ଆଲୋଚନା ହୋଇନଥିଲା । ପ୍ରଥମଥର ପାଇଁ ହ୍ୱାଇଟ ହାଉସରେ ପ୍ରଧାନମନ୍ତ୍ରୀ ମୋଦିଙ୍କ ଲାଗି ଆୟୋଜନ ହୋଇଥିଲା ନୈଶଭୋଜି । ଯେଉଁଥିରେ ଆମେରିକା ଫାଷ୍ଟ ଲେଡି ମେଲାନିଆ ଟ୍ରମ୍ପ ମଧ୍ୟ ସାମିଲ ହୋଇଥିଲେ । ସେହିପରି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଝିଅ ଇଭାଙ୍କା ଟ୍ରମ୍ପଙ୍କୁ ଭାରତ ଆସିବା ଲାଗି ନିମନ୍ତ୍ରଣ କରିଥିଲେ ମୋଦି । ଚଳିତବର୍ଷ ଶେଷ ଆଡକୁ ହେବାକୁ ଥିବା ଅଷ୍ଟମ ବିଶ୍ୱ ଉଦ୍ୟୋଗପତିଙ୍କ ସମ୍ମିଳନୀରେ ଆମେରିକା ପ୍ରତିନିଧି ଦଳର ନେତୃତ୍ୱ ନେବା ପାଇଁ ଅନୁରୋଧ କରିଥିଲେ ମୋଦି ।