ବିଦେଶରେ ଚାକିରି ଦେବାକୁ କହି ଶହେରୁ ଅଧିକ ଲୋକଙ୍କଠାରୁ ଟଙ୍କା ଠକେଇ । ୨ କୋଟିରୁ ଅଧିକ ଟଙ୍କା ନେଇ ଫେରାର ଦଲାଲ ।
କନକ ବ୍ୟୁରୋ: ବିଦେଶରେ ଚାକିରି ଦେବାକୁ କହି ଶହେରୁ ଅଧିକ ଲୋକଙ୍କ ଠାରୁ ଟଙ୍କା ଠକେଇ । ଅଭିଯୁକ୍ତ ଦଲାଲ ପ୍ରାୟ ୨ କୋଟିରୁ ଅଧିକ ଟଙ୍କା ନେଇ ଫେରାର ହୋଇଯାଇଛି । ଗଞ୍ଜାମ ଜିଲ୍ଲା ଜରଡ଼ା ଥାନା ଅଞ୍ଚଳରେ ଏହି ଘଟଣା ଚହଳ ପକାଇଛି । ଟଙ୍କା ଦେଇ ନିରାଶ ହୋଇଥିବା ଲୋକେ ଜରଡ଼ା ଥାନାର ଦ୍ୱାରସ୍ଥ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଟଙ୍କା ଦେଇଥିବା ଲୋକମାନେ ଅଭିଯୋଗ କରିଛନ୍ତି ଯେ, ଜରଡ଼ା ଥାନା ଅନ୍ତର୍ଗତ ଚୁଡ଼ିଆଲାଞ୍ଜି ଗାଁର ଏସ୍ ଯୋଗେଶ ରେଡ୍ଡୀ ପୋଲାଣ୍ଡରେ ଚାକିରି କରାଇ ଦେବାକୁ କହି ଦେଢ଼ଲକ୍ଷ ଲେଖାଏଁ ଟଙ୍କା ନେଇଯାଇଛନ୍ତି । ତାଙ୍କ କହିବା ଅନୁଯାୟୀ ଚାକିରି ଆଶାୟୀମାନେ ଏକାଧିକ ଆକାଉଣ୍ଟକୁ ଟଙ୍କା ପଠାଇଥିଲେ । ଜରଡ଼ା, କେ ନୂଆଗାଁ, ଗୋଳନ୍ଥରା ଥାନା ଅଞ୍ଚଳର ବିଭିନ୍ନ ଗାଁ ଲୋକଙ୍କ ସହ ପଡ଼ୋଶୀ ଆନ୍ଧ୍ରପ୍ରଦେଶର ଇଛାପୁର, କାବିଟି ଓ କାଞ୍ଚିଲି ଥାନା ଅଞ୍ଚଳର ଲୋକ ମଧ୍ୟ ଏହି ଠକେଇର ଶିକାର ହୋଇଛନ୍ତି ।
ତେବେ ୧୨୦ରୁ ଅଧିକ ଲୋକଙ୍କ ଟଙ୍କା ନେଇ ଯୋଗେଶ ଫେରାର ହୋଇଯାଇଛନ୍ତି । ଏପଟେ ଟଙ୍କା ଦେଇଥିବା ଲୋକମାନେ ନିରାଶ ହୋଇପଡ଼ିଛନ୍ତି । ଶେଷରେ ସେମାନେ ଜରଡ଼ା ଥାନରେ ଲିଖିତ ଏତଲା ଦେଇଛନ୍ତି । ଏହାପରେ ଜରଡ଼ା ଥାନା ପୋଲିସ୍ ତଦନ୍ତ ଆରମ୍ଭ କରିଛି । ଲୋକମାନେ ଯେଉଁସବୁ ଆକାଉଣ୍ଟକୁ ଟଙ୍କା ପଠାଇଥିଲେ, ସେସବୁ ଆକାଉଣ୍ଟ ନେଇ ଖୋଳତାଡ଼ କରୁଛି ପୋଲିସ୍ ।