ନିର୍ବାଚନ ପାଣ୍ଠିକୁ ସ୍ୱଚ୍ଛ କରିବ କି ଇଲେକ୍ଟୋରାଲ ବଣ୍ଡ ? ଜନତା ଜାଣିବେନି, ସରକାର ଜାଣିପାରନ୍ତି ଚାନ୍ଦାର ଉତ୍ସ
କନକ ବ୍ୟୁରୋ : ଇଲେକ୍ଟୋରାଲ ବଣ୍ଡ କାର୍ଯ୍ୟକାରୀ ହେବା ନେଇ ଘୋଷଣା ପରେ କିଛି ଏଭଳି ପ୍ରଶ୍ନ ଏବେ ସାମ୍ନାକୁ ଆସିଛି । ନିର୍ବାଚନ ପାଣ୍ଠିରେ ସ୍ୱଚ୍ଛତା ନେଇ ନିଆଯାଇଥିବା ଏହି ପଦକ୍ଷେପ ବିବାଦ ବଢାଇବାର ଆଶଙ୍କା ରହିଛି । ଦାତାଙ୍କ ନାମ ଗୋପନୀୟ ରହୁଥିବା ବେଳେ କେବଳ ବ୍ୟାଙ୍କ ଜାଣିପାରିବ, କେଉଁ ଦଳକୁ କିଏ କେତେ ଟଙ୍କା ଦେଇଛି । ଆଉ ଭାରତୀୟ ରିଜର୍ଭ ବ୍ୟାଙ୍କକୁ ମାଧ୍ୟମ କରି ଶାସନରେ ଥିବା ଦଳ ଜାଣିପାରିବ, ବିରୋଧୀଙ୍କୁ କିଏ ଦେଇଛି କେତେ ଟଙ୍କା । ଫଳସ୍ୱରୂପ ଟଙ୍କା ଦେଇଥିବା ସଂସ୍ଥା ଓ ବିରୋଧୀ ରାଜନୈତିକ ଦଳ ଆକ୍ରୋଶର ଶିକାର ହୋଇପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ଟଙ୍କା କେଉଁଠୁ ଆସୁଛି, କିଏ ଦେଉଛି, ଆଉ କାହା ଖାତାକୁ କେତେ ଯାଉଛି, ସେବାବଦରେ ଜନତା ଜାଣିବାର ସୁଯୋଗ ନାହିଁ । ଏପରିକି ନିର୍ବାଚନ କମିଶନଙ୍କ ପାଖରୁ ମଧ୍ୟ ତଥ୍ୟ ମିଳିବା କାଠିକର ପାଠ ହୋଇଯିବ । ଏପରି କ୍ଷେତ୍ରରେ ସ୍ୱଛତା ନୁହେଁ ବରଂ ଦୁର୍ନୀତିକୁ ଅଧିକ ପ୍ରଶ୍ରୟ ମିଳିବ ବୋଲି ଅନୁମାନ କରାଯାଉଛି ।
ତଥ୍ୟ କହୁଛି, ରାଜନୈତିକ ଦଳକୁ ଅଜଣା ସ୍ରୋତରୁ ପ୍ରାୟ ୭୦ ପ୍ରତିଶତ ଚାନ୍ଦା ମିଳୁଛି । ଇଲେକ୍ଟୋରାଲ୍ ବଣ୍ଡ ହୁଏତ କଳାଧନ କାରବାରକୁ ରୋକିବାରେ କିଛି ମାତ୍ରାରେ ସହାୟକ ହୋଇପାରେ । ହେଲେ କାହା ଟଙ୍କାରେ ଦଳ ଓ ସରକାର ଚାଲୁଛି ତାହା ଜାଣିବା ଆଉ ସମ୍ଭବ ହେବନି ।