ଶ୍ରୀ ଲିଙ୍ଗରାଜଙ୍କ ଶୀତଳ ଷଷ୍ଠୀ ବିଧିରେ ବିଭ୍ରାଟ : ସେବାୟତଙ୍କ ଅସହଯୋଗରୁ ହେଲାନି ମଙ୍ଗନ, କେମିତି ପଡ଼ିବ ହାତଗଣ୍ଠି ?
କନକ ବ୍ୟୁରୋ : ଶ୍ରୀ ଲିଙ୍ଗରାଜଙ୍କ ଶୀତଳ ଷଷ୍ଠୀ ବିଧିରେ ଦେଖାଦେଇଛି ମହାବିଭ୍ରାଟ । ମନ୍ଦିର ପ୍ରଶାସନର ଅବହେଳାକୁ ବିରୋଧ କରି ସେବାୟତମାନେ ଅସହଯୋଗ କରିବାରୁ ହୋଇପାରିଲାନି ଦେବଦମ୍ପତିଙ୍କ ମଙ୍ଗଳକୃତ୍ୟ ବିଧି ସମ୍ପନ୍ନ । ଦିନ ତମାମ୍ ମନ୍ଦିର ନୀତିିରେ ବି ବିଭ୍ରାଟ ଘଟିଥିବା ସୂଚନା ରହିଛି । ମନ୍ଦିର ପ୍ରଶାସନ ଓ ସେବାୟତମାନଙ୍କ ମଧ୍ୟରେ ଲାଗି ରହିଥିବା ଛକାପଞ୍ଝା କାରଣରୁ ଠାକୁରଙ୍କ ବିଧି ବନ୍ଦ ହୋଇଯାଇଥିବାରୁ ଭକ୍ତ ଓ ଶ୍ରଦ୍ଧାଳୁଙ୍କ ମଧ୍ୟରେ ତ୍ରୀବ ପ୍ରତିକ୍ରିୟା ପ୍ରକାଶ ପାଇଛି । ମଙ୍ଗନ ନୀତି ବନ୍ଦ ହୋଇଥିବା ବେଳେ ବାହାଘର ପର୍ବ କିପରି ହେବ ପ୍ରଶ୍ନବାଚୀ ସୃଷ୍ଟି ହୋଇଛି । ଏନେଇ ମନ୍ଦିର ପ୍ରଶାସନ ମଧ୍ୟ ନିରବ ରହିଥିବାରୁ ଏକାମ୍ର କ୍ଷେତ୍ରରେ ଚାପା ଉତେଜନା ସୃଷ୍ଟି ହୋଇଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସୂଚନାନୁଯାୟୀ, ଗତକାଲି ପୂର୍ବାହ୍ନରୁ ସେବାୟତମାନଙ୍କ ଅସହଯୋଗ ଆରମ୍ଭ ହୋଇଥିଲା। ମନ୍ଦିର ପ୍ରଶାସନକୁ ଚେତାଇବାକୁ ମଙ୍ଗଳ ଆଳତି ବେଳରୁ ସେବାୟତ ନିଯୋଗ ପକ୍ଷରୁ ନୀତିରେ ଅସହଯୋଗ କରାଯାଇଥିଲା ଓ ପ୍ରଥମେ ସକାଳୁ ଦୁଇ ଘଣ୍ଟା ନୀତି ବିଳମ୍ବ ହୋଇଥିଲା। ଅବଶ୍ୟ ଏହା ପ୍ରତୀକାତ୍ମକ ଅସହଯୋଗ ଆନ୍ଦୋଳନ ଥିଲା ଓ ୨ଘଣ୍ଟା ନୀତି ବନ୍ଦ କରାଯିବା ପରେ ପୁଣି ନୀତି ସ୍ବାଭାବିକ ହୋଇଥିଲା। ତଥାପି ପ୍ରଶାସନ କିଛି ପଦକ୍ଷେପ ନେଇନଥିଲା। ଫଳରେ ସନ୍ଧ୍ୟାରେ ପୁଣି ନୀତି ବନ୍ଦ ହୋଇଥିଲା।
ସନ୍ଧ୍ୟାରେ ବଲ୍ଲଭ ପରେ ଦ୍ବିପ୍ରହର ଧୂପ ନୀତି ହୋଇଥିଲା ଓ ଏହା ପରେ ଠାକୁରାଣୀଙ୍କ ଦ୍ବିପ୍ରହର ଧୂପ ହୋଇଥିଲା । ସୂଚନାଯୋଗ୍ୟ, ବିଧି ଅନୁସାରେ ଏହି ସମୟରେ ଶଙ୍କୁଡ଼ି ଭୋଗ ପ୍ରସ୍ତୁତି ହୁଏ। ଏହା ପରେ ଶଙ୍କୁଡ଼ି ଭୋଗ ମନ୍ଦିର ବେଢ଼ା ପରିକ୍ରମା କରାଯାଇଥା’ନ୍ତା । ଏହା ପରେ ଲିଙ୍ଗରାଜଙ୍କ ବିବାହ ପାଇଁ ଅଷ୍ଟଚଣ୍ଡୀଙ୍କୁ ନିମନ୍ତ୍ରଣ ହୋଇଥା’ନ୍ତା ଓ ବଡ଼ସିଂହାର ପରେ ପହୁଡ଼ ପଡ଼ିଥାନ୍ତା। କିନ୍ତୁ ପୂର୍ବ ଘୋଷଣା ଅନୁଯାୟୀ ବ୍ରାହ୍ମଣ ନିଯୋଗ ଓ ପୂଜାପଣ୍ଡା ନିଯୋଗ ପକ୍ଷରୁ ନୀତିରେ ଅସହଯୋଗ କରାଗଲା । ଦ୍ବିପ୍ରହର ଧୂପ ନୀତି ପରେ ସେବାୟତମାନେ ଆଉ କୌଣସି ନୀତିରେ ସାମିଲ ହୋଇନଥିଲେ । ଫଳରେ ଠାକୁରଙ୍କ ବିବାହ ପାଇଁ ମଙ୍ଗନ ବିଧି ଅନୁଷ୍ଠିତ ହୋଇପାରିଲା ନାହିଁ ।
ବଡ଼ କଥା ହେଉଛି, ମନ୍ଦିରର ଦୁଇ ପ୍ରମୁଖ ନିଯୋଗ ବ୍ରାହ୍ମଣ ନିଯୋଗ ଓ ପୂଜାପଣ୍ଡା ନିଯୋଗ ପକ୍ଷରୁ ପୂର୍ବରୁ ଏନେଇ ଚେତାବନୀ ଦିଆଯାଇଥିଲା । ମନ୍ଦିର ପ୍ରଶାସନ ପକ୍ଷରୁ ଅନୁଷ୍ଠିତ ବୈଠକରେ ବ୍ରାହ୍ମଣ ନିଯୋଗ ସମ୍ପାଦକ ବିରଞ୍ଚି ପତି ଓ ପୂଜାପଣ୍ଡା ନିଯୋଗ ସମ୍ପାଦକ ସଚ୍ଚିକାନ୍ତ ପୂଜାପଣ୍ଡା ଚଳିତ ବର୍ଷ ଶୀତଳ ଷଷ୍ଠୀ ଯାତ୍ରାରେ ସହଯୋଗ କରିବେ ନାହିଁ ବୋଲି ଲିଖିତ ଜଣାଇଥିଲେ । ହେଲେ ପ୍ରଶାସନ ସେମାନଙ୍କ ଏହି ଚେତାବନୀକୁ ହାଲୁକା ଭାବେ ନେଲା। ଫଳରେ ସେମାନେ ନୀତିରେ ଅସହଯୋଗ କଲେ ବୋଲି ନିଯୋଗ ପକ୍ଷରୁ କୁହାଯାଇଛି ।